Jehovah—’n God wat ons beslis wil leer ken

KAN dit wees dat iets belangriks in jou lewe ontbreek? As jy nie veel van God weet nie, is dit beslis die geval. Waarom? Want, soos miljoene mense ontdek het, bring dit groot voordele in die lewe mee as ’n mens die God van die Bybel leer ken. Hierdie voordele begin onmiddellik en strek tot in die toekoms.

Jehovah God, die Outeur van die Bybel, wil hê dat ons hom moet leer ken. Die psalmis het geskryf: “Sodat mense kan weet dat u, wie se naam Jehovah is, u alleen die Allerhoogste oor die hele aarde is.” Hy weet dat dit tot ons voordeel is om hom te ken. “Ek, Jehovah, is jou God, die Een wat jou leer om jouself te bevoordeel.” Hoe bevoordeel dit ons om Jehovah God, die Allerhoogste, te ken?—Psalm 83:18; Jesaja 48:17.

’n Besliste voordeel is dat ons die leiding kry om die daaglikse probleme die hoof te bied, ’n vaste hoop vir die toekoms het en gemoedsrus geniet. En as ons Jehovah goed ken, beweeg dit ons om ’n ander gesindheid te ontwikkel oor die belangrikste vraagstukke waarvoor mense oor die hele wêreld vandag te staan kom. Wat is hierdie vraagstukke?

Het jou lewe ’n doel?

Ondanks die mensdom se verstommende tegnologiese vooruitgang vra mense vandag nog dieselfde basiese vrae: ‘Waarom is ek hier? Wat lê vir my voor? Wat is die doel van die lewe?’ As iemand nie bevredigende antwoorde kry nie, sal sy lewe nie ’n ware doel hê nie. Is baie mense bewus van hierdie leemte in hulle lewe? Volgens ’n studie wat in die laat 1990’s in Duitsland gedoen is, het die helfte van die respondente soms of dikwels gevoel dat die lewe geen doel het nie. Dalk bestaan daar ’n soortgelyke situasie waar jy woon.

Sonder ’n doel in die lewe het ’n persoon nie juis iets waarop hy sy persoonlike doelwitte kan grond nie. Baie probeer vir hierdie leemte vergoed deur ’n suksesvolle loopbaan na te streef of deur rykdom bymekaar te maak. Die leë gevoel kan nogtans blywend wees. Die gevoel dat hulle geen doel in die lewe het nie, maak selfs dat party nie meer wil lewe nie. Dit was die geval met ’n pragtige jong vrou wat, volgens die International Herald Tribune, haar hele lewe lank omring was “deur ongelooflike rykdom en eindelose voorregte”. Hoewel sy in weelde geleef het, was sy eensaam en was die lewe vir haar doelloos. Sy het slaappille gedrink, en hulle het haar dood aangetref. Jy weet dalk van ander eensames wie se lewe tragies geëindig het.

Maar het jy al mense hoor sê dat die wetenskap ons alles oor die lewe kan vertel? Die Duitse weekblad Die Woche sê: “Al is die wetenskap waar, is dit geestelik swak. Evolusie kom primitief voor, en selfs kwantumfisika, met al sy onvoorspelbare veranderings, bied allesbehalwe vertroosting en sekuriteit.” Wetenskaplike ontdekkings het baie gedoen om lewe in sy verskillende vorme te beskryf en die natuurlike kringlope en prosesse wat lewe onderhou, te verduidelik. Tog kan die wetenskap nie vir ons sê waarom ons hier is en wat vir ons voorlê nie. As ons uitsluitlik op die wetenskap vertrou, bly ons vrae oor die doel van die lewe onbeantwoord. Gevolglik is daar, soos die koerant Süddeutsche Zeitung berig het, “’n algemene behoefte aan leiding”.

Wie is in ’n beter posisie om sulke leiding te gee as die Skepper? Aangesien hy die mens op die aarde geplaas het, sal hy beslis weet waarom hulle hier is. Die Bybel verduidelik dat Jehovah die mensdom geskep het sodat hulle die aarde kon bevolk en as opsigters daaroor kon toesig hou. In al hulle bedrywighede moes mense sy eienskappe, soos geregtigheid, wysheid en liefde, weerspieël. As ons eers verstaan waarom Jehovah ons geskep het, sal ons weet waarom ons hier is.—Genesis 1:26-28.

Wat kan jy doen?

Gestel jy het in die verlede geen bevredigende antwoorde gevind nie op vrae soos: ‘Waarom is ek hier? Wat lê vir my voor? Wat is die doel van die lewe?’ Die Bybel stel voor dat jy Jehovah intiem leer ken. Trouens, Jesus het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.” Jy word ook aangemoedig om godvrugtige eienskappe, veral liefde, aan te kweek en dit jou ten doel te stel om onder God se inkomende Messiaanse Koninkryk te leef. Dan sal jy ’n doel in die lewe hê, asook ’n wonderlike, vaste hoop vir die toekoms. Jy sal heel waarskynlik antwoorde vind op die basiese vrae wat jou tot dusver gekwel het.—Johannes 17:3; Prediker 12:13.

Kan dit werklik ’n verskil maak? Hans is iemand wat sal weet.a Jare gelede het hy ’n vae geloof in God gehad, maar sy geloof het geen invloed op sy lewe gehad nie. Hans het gehou van dwelms, onsedelike vroue, geringe misdade en motorfietse. “Maar my lewe was leeg en nie werklik bevredigend nie”, verduidelik hy. Toe Hans in sy middeltwintigerjare was, het hy besluit om God persoonlik te leer ken deur die Bybel noukeurig te lees. Nadat hy Jehovah intiem leer ken het en begryp het wat die doel van die lewe is, het hy sy lewenswyse verander en hom as een van Jehovah se Getuies laat doop. Hy is al die afgelope tien jaar in die voltydse diens. Hy sê vol oortuiging: “Om Jehovah te dien, is die beste manier om te lewe. Niks kan daarmee vergelyk word nie. Kennis van Jehovah het my ’n doel in die lewe gegee.”

Die doel van die lewe is natuurlik nie al waaroor mense bekommerd is nie. Namate wêreldtoestande versleg, is al hoe meer mense besorg oor ’n ander belangrike kwessie.

Waarom het dit gebeur?

Wanneer ’n tragedie plaasvind, is daar dikwels een vraag wat in die slagoffer se gedagtes vassteek: Waarom het dit gebeur? Die vermoë om ’n tragedie emosioneel te verwerk, hang grootliks af van ’n bevredigende antwoord op hierdie vraag. As daar geen bevredigende antwoord is nie, duur die lyding voort en kan die slagoffer verbitterd raak. Neem byvoorbeeld Bruni se ondervinding.

“Jare gelede het my babadogtertjie gesterf”, verduidelik Bruni, nou ’n middeljarige moeder. “Ek het aan God geglo, en daarom het ek na die plaaslike priester toe gegaan vir vertroosting. Hy het vir my gesê dat God Susanne hemel toe geneem het, waar sy nou ’n engeltjie is. Nie alleen het my lewe ná haar dood in duie gestort nie, maar ek het God gehaat omdat hy haar van my af weggeneem het.” Bruni se pyn en lyding het etlike jare voortgeduur. “Toe het een van Jehovah se Getuies vir my uit die Bybel gewys dat ek geen rede het om God te haat nie. Jehovah het nie vir Susanne hemel toe geneem nie, en sy is nie ’n engel nie. Haar siekte was die gevolg van menslike onvolmaaktheid. Susanne slaap in die dood en wag dat Jehovah haar opwek. Ek het ook geleer dat hy mense gemaak het om vir ewig op ’n paradysaarde te lewe en dat dit binnekort sal plaasvind. Toe ek eers verstaan het watter soort persoon Jehovah werklik is, het ek nader aan hom gekom, en dit het my pyn verlig.”—Psalm 37:29; Handelinge 24:15; Romeine 5:12.

Miljoene mense word deur die een of ander soort teëspoed geraak: ’n persoonlike tragedie, oorlog, hongersnood of ’n natuurramp. Bruni het verligting gevind toe sy in die Bybel gesien het dat Jehovah nie vir tragedies verantwoordelik is nie, dat dit nooit sy voorneme was dat die mensdom moes ly nie en dat hy binnekort ’n einde aan boosheid gaan maak. Die blote feit dat goddeloosheid aan die toeneem is, is ’n teken dat ons nou in “die laaste dae” van hierdie stelsel van dinge lewe. Die dramatiese verbetering waarna ons almal so uitsien, is op hande.—2 Timoteus 3:1-5; Matteus 24:7, 8.

Leer God ken

Hans en Bruni het voorheen ’n vae begrip van God gehad. Hulle het aan hom geglo sonder dat hulle veel van hom geweet het. Toe hulle tyd ingeruim het om juiste kennis van Jehovah in te neem, is hulle pogings beloon. Hulle het bevredigende antwoorde op die belangrikste vrae van ons dag gevind. Dit het hulle gemoedsrus en ’n vaste hoop vir die toekoms gegee. Miljoene knegte van Jehovah het ’n soortgelyke ondervinding gehad.

Kennis van Jehovah begin by ’n noukeurige studie van die Bybel, wat ons vertel van hom en wat hy van ons verwag. Dit is wat party in die eerste eeu gedoen het. Volgens die geskiedskrywer en geneesheer Lukas het lede van die Joodse gemeente in Berea, Griekeland, “die woord met die grootste gretigheid van verstand [van Paulus en Silas] ontvang en die Skrif elke dag sorgvuldig ondersoek of hierdie dinge so was”.—Handelinge 17:10, 11.

Eerste-eeuse Christene het ook in gemeentes bymekaargekom (Handelinge 2:41, 42, 46; 1 Korintiërs 1:1, 2; Galasiërs 1:1, 2; 2 Tessalonisense 1:1). Dieselfde is vandag die geval. Gemeentes van Jehovah se Getuies kom ook bymekaar vir vergaderinge wat veral bedoel is om mense te help om nader aan Jehovah te kom en hom met vreugde te dien. Assosiasie met plaaslike Getuies hou nog ’n voordeel in. Aangesien mense al hoe meer soos die God word wat hulle aanbid, weerspieël Jehovah se Getuies—al is dit in beperkte mate—eienskappe wat Jehovah self openbaar. As ons dus saam met Getuies vergader, help dit ons om Jehovah selfs beter te leer ken.—Hebreërs 10:24, 25.

Klink dit na baie moeite om net een Persoon te leer ken? Inspanning is beslis nodig. Maar is dit nie die geval met baie dinge in die lewe wat jy wil bereik nie? Dink aan die inspanning wat ’n topatleet se oefenprogram verg. Jean-Claude Killy, ’n Franse skiër wat ’n goue medalje by die Olimpiese Spele gewen het, sê wat dit verg om ’n suksesvolle internasionale sportman te wees: “Jy moet 10 jaar voor die tyd begin en dit jare en jare lank beplan en daagliks daaraan dink . . . Jy span jou elke dag, 365 dae per jaar, geestelik en fisies in.” Al daardie tyd en inspanning om aan ’n wedloop deel te neem wat dalk net tien minute duur! Hoeveel meer—en hoeveel blywender—is die voordele wat dit inhou om Jehovah te leer ken.

’n Verhouding wat al hoe hegter word

Wie van ons wil hê dat iets belangriks in ons lewe ontbreek? Nie een van ons nie. As jy dus enigsins voel dat jy nie ’n ware doel in die lewe het nie, of as jy na ’n verduideliking soek oor waarom teëspoed ons tref, moet jy vasbeslote wees om Jehovah, die God van die Bybel, te leer ken. Dit kan jou lewe permanent verbeter.

Sal ons ooit ophou om van Jehovah te leer? Diegene wat hom al dekades lank dien, is nou nog verwonderd oor wat hulle van hom geleer het en nog steeds leer. Wanneer ons hierdie dinge leer, maak dit ons gelukkig en bring dit ons al hoe nader aan hom. Mag ons net soos die apostel Paulus voel wat geskryf het: “O die diepte van God se rykdom en wysheid en kennis! Hoe ondeurgrondelik is sy oordele en hoe onnaspeurlik sy weë! Want ‘wie het Jehovah se denke leer ken, of wie het sy raadgewer geword?’”—Romeine 11:33, 34.

[Voetnoot]

[Lokteks op bladsy 5]

Mense vra steeds dieselfde basiese vrae: ‘Waarom is ek hier? Wat lê vir my voor? Wat is die doel van die lewe?’

[Lokteks op bladsy 6]

“Toe ek eers verstaan het watter soort persoon Jehovah werklik is, het ek nader aan hom gekom”

[Lokteks op bladsy 7]

“Om Jehovah te dien, is die beste manier om te lewe. Niks kan daarmee vergelyk word nie. Kennis van Jehovah het my ’n doel in die lewe gegee”