“Kom nader aan God, en hy sal nader aan julle kom”

Voor en ná—donker verlede, helder toekoms

“DIE woord van God is lewend en oefen krag uit en is skerper as enige tweesnydende swaard . . . en kan gedagtes en bedoelings van die hart onderskei” (Hebreërs 4:12). Dit is wat die apostel Paulus gesê het oor die deurdringende krag van God se boodskap. Die vermoë wat dit het om die hart te bereik, is veral gedurende die eerste eeu G.J. duidelik gesien. Ondanks die onheilsame invloed wat in daardie tyd geheers het, het diegene wat Christene geword het, hulle met die nuwe persoonlikheid beklee.—Romeine 1:28, 29; Kolossense 3:8-10.

Die krag wat God se woord het om mense te verander, waarvan ons in die Bybel lees, is vandag net so duidelik. Neem die voorbeeld van ’n lang, sterk man met die naam Richard. Omdat Richard ’n verskriklike humeur gehad het, het hy oor die geringste dingetjie in ’n vuisgeveg betrokke geraak. Sy lewe is deur geweld bederf. Richard het selfs by ’n boksklub aangesluit. Hy het hard geoefen en die swaargewigbokskampioen van Wesfale, Duitsland, geword. Hy het ook baie gedrink en dikwels by bakleiery betrokke geraak. By een so ’n geleentheid is iemand dood, en Richard het amper in die tronk beland.

Wat van Richard se huwelik? “Voordat ek en Heike die Bybel begin studeer het”, sê hy, “het elkeen maar sy eie gang gegaan. Heike het baie tyd saam met haar vriendinne deurgebring, terwyl ek besig was met my stokperdjies—hoofsaaklik boks, branderplankry en duik.”

Toe Richard en Heike die Bybel saam met Jehovah se Getuies begin studeer het, was hy oorweldig deur die gedagte dat hy skynbaar onmoontlike veranderinge sou moes aanbring om volgens die hoë standaarde in God se Woord te lewe. Maar namate Richard Jehovah God beter leer ken het, het hy ’n sterk begeerte ontwikkel om hom te behaag. Hy het besef dat God mense wat geweld liefhet of wat dit as vermaak gebruik, nie goedkeur nie. “[Jehovah se] siel haat beslis elkeen wat geweld liefhet”, het Richard geleer.—Psalm 11:5.

Richard en Heike was ook gefassineer deur die hoop om vir ewig in ’n paradys op aarde te lewe. Hulle wou saam daar wees! (Jesaja 65:21-23). Die uitnodiging “kom nader aan God, en hy sal nader aan julle kom” het Richard diep getref (Jakobus 4:8). Hy het besef hoe belangrik dit is om ag te slaan op hierdie geïnspireerde raad: “Moenie afgunstig raak op die man van geweld nie, en moet ook nie enige van sy weë kies nie. Want die slinkse persoon is vir Jehovah verfoeilik, maar Sy intimiteit is met die regskapenes.”—Spreuke 3:31, 32.

Ondanks ’n sterk begeerte om sy weë te verander, het Richard geweet dat hy dit nie in sy eie krag kon doen nie. Hy het besef dat hy God se hulp deur gebed moet vra. Hy het dus opgetree in ooreenstemming met Jesus se woorde aan Sy apostels: “Hou aan . . . bid, sodat julle nie in versoeking kom nie. Die gees is natuurlik gretig, maar die vlees is swak.”—Matteus 26:41.

Nadat hy geleer het wat God se beskouing van geweld en vlae van toorn is, was Richard oortuig daarvan dat boks ’n onaanvaarbare sport is. Met Jehovah se hulp en die aanmoediging van diegene wat die Bybel saam met hom gestudeer het, het Richard geweld die rug toegekeer. Hy het boks opgegee en nie meer by bakleiery betrokke geraak nie; hy het ook besluit om sy gesinslewe te verbeter. “Die waarheid wat ek uit die Bybel geleer het, het my gehelp om te dink voordat ek optree”, sê Richard, wat nou ’n saggeaarde opsiener in een van die gemeentes van Jehovah se Getuies is. Hy voeg by: “Die beginsels van liefde en respek rig my nou in my verhouding met my vrou en kinders. Gevolglik het ons gesin baie hegter geword.”

Mense wat verkeerd ingelig is, beskuldig Jehovah se Getuies soms daarvan dat hulle gesinne verwoes. Maar voorbeelde van individue soos Richard weerlê hulle bewerings. Bybelwaarheid kan in werklikheid lei tot stabiliteit in die gesin en ’n helder toekoms vir diegene wat ’n donker verlede gehad het.—Jeremia 29:11.

[Lokteks op bladsy 9]

“Die hoop om op ’n paradysaarde te lewe, het my die motivering gegee om te verander”

[Venster op bladsy 9]

Die krag van Bybelbeginsels

Die Bybel kan ’n kragtige invloed op mense se lewe uitoefen. Hier is ’n paar skriftuurlike beginsels wat gewelddadige mense gehelp het om te verander:

“Hy wat nie gou toornig word nie, is beter as ’n sterk man, en hy wat sy gees beheers, as die een wat ’n stad inneem” (Spreuke 16:32). Onbeheerste woede is ’n teken van swakheid, nie van krag nie.

“Die insig van ’n mens vertraag beslis sy toorn” (Spreuke 19:11). Insig in ’n situasie help ’n mens om verder as die oënskynlike redes vir ’n konfrontasie te sien, en dit kan ’n woedeuitbarsting voorkom.

‘Moenie omgaan met iemand wat gou woedend word nie, sodat jy nie met sy paaie vertroud raak nie’ (Spreuke 22:24, 25). Christene vermy wyslik omgang met diegene wat geneig is tot woede.