“Kom nader aan God, en hy sal nader aan julle kom”

Voor en ná—Sy het die krag gevind om te verander

SANDRA, ’n vrou in Mexiko, het haarself beskryf as die swart skaap van haar familie. Haar tienerjare is bederf weens die feit dat sy verwerp is en nie liefde ontvang het nie. Sy sê: “Deur my adolessente jare het ek gedurig ’n gevoel van leegheid gehad, asook baie twyfelgedagtes oor my bestaan en oor die lewe.”

Op hoërskool het Sandra die wyn begin drink wat haar pa in die huis gehad het. Mettertyd het sy haar eie drank gekoop en ’n alkoholis geword. “Ek wou nie meer lewe nie”, erken sy. Uit radeloosheid het Sandra dwelms begin gebruik. “Al wat my gehelp het om my probleme te vergeet”, sê sy, “was wat ek in my handsak gedra het: ’n drankbottel, ’n paar pille of ’n bietjie dagga.”

Nadat Sandra haar mediese studies voltooi het, het haar alkoholprobleem vererger. Sy het selfmoord probeer pleeg. Maar sy het dit oorleef.

Sandra het haar tevergeefs tot talle verskillende godsdienste gewend vir geestelike hulp en emosionele ondersteuning. Sy het moedeloos en wanhopig gevoel en het herhaaldelik tot God uitgeroep: “Waar is u? Waarom help u my nie?” Toe haar gevoel van eiewaarde ’n laagtepunt bereik het, het sy een van Jehovah se Getuies ontmoet wat met haar gesels het. Dit het tot ’n Bybelstudie gelei. Sandra is diep geraak toe sy geleer het dat ‘Jehovah naby die gebrokenes van hart is’.—Psalm 34:18.

Sandra se Bybelonderrigter het haar gehelp om te verstaan dat Jehovah God in ag neem dat ons swak is weens die sonde en onvolmaaktheid wat ons van Adam oorgeërf het. Sandra het geleer dat God nie van ons verwag om volmaak aan regverdige standaarde te voldoen nie (Psalm 51:5; Romeine 3:23; 5:12, 18). Sy was bly om uit te vind dat Jehovah nie op ons swakhede konsentreer en nie meer van ons vereis as wat ons kan doen nie. Die psalmis het gevra: “As u op oortredings ag gegee het, o Jah, o Jehovah, wie sou kon bly staan?”—Psalm 130:3.

’n Belangrike Bybelwaarheid wat Sandra se hart verbly het, was oor Jesus Christus se losprysoffer. Daardeur gee Jehovah uit barmhartigheid aan gehoorsame mense ’n regverdige posisie ondanks hulle onvolmaakthede (1 Johannes 2:2; 4:9, 10). Ja, ons kan “vergifnis van ons oortredings” kry en sodoende gehelp word om enige gevoelens van nutteloosheid te oorkom.—Efesiërs 1:7.

Sandra het waardevolle lesse uit die voorbeeld van die apostel Paulus geleer. Hy het groot waardering gehad vir die goedhartige en genadige manier waarop God sy vorige sondes vergewe het en hom in sy moeilike stryd teen herhaalde swakhede ondersteun het (Romeine 7:15-25; 1 Korintiërs 15:9, 10). Paulus het sy lewenswyse verander, ‘sy liggaam gekasty en dit as ’n slaaf gelei’ sodat hy op die weg kon bly wat deur God goedgekeur word (1 Korintiërs 9:27). Hy het nie toegelaat dat sy sondige neigings hom as ’n slaaf lei nie.

Sandra se swakhede het haar geteister, maar sy het daarteen bly stry. Sy het opreg tot Jehovah gebid vir hulp om dit te oorkom en hom gevra om haar barmhartig te wees (Psalm 55:22; Jakobus 4:8). Omdat Sandra aangevoel het dat God persoonlik in haar belangstel, kon sy haar lewe verander. “Ek geniet dit om die Bybel voltyds vir ander te leer”, sê sy. Sandra het die voorreg gehad om haar ouer en jonger suster te help om Jehovah te leer ken. Terwyl Sandra “aan almal goed doen”, gebruik sy ook haar mediese kennis by streekbyeenkomste van Jehovah se Getuies.—Galasiërs 6:10.

Wat van Sandra se verslawings? Sy sê met vertroue: “My verstand is helder. Ek drink en rook nie meer nie, en ek gebruik ook nie meer dwelms nie. Ek het dit nie nodig nie. Ek het gevind waarna ek gesoek het.”

[Lokteks op bladsy 9]

“Ek het gevind waarna ek gesoek het”

[Venster op bladsy 9]

Die krag van Bybelbeginsels

Hier is ’n paar Bybelbeginsels wat baie al gehelp het om met verontreinigende verslawings te breek:

“Laat ons ons van elke verontreiniging van die vlees en die gees reinig en heiligheid in die vrees van God tot volmaaktheid bring” (2 Korintiërs 7:1). God seën diegene wat hulle gereinig het en onrein gebruike vermy.

“Die vrees van Jehovah beteken om te haat wat sleg is” (Spreuke 8:13). Eerbiedige vrees vir God help ’n mens om slegte gewoontes, waaronder dwelmmisbruik, die rug toe te keer. Wanneer iemand verander, behaag hy nie net Jehovah nie, maar word hy ook teen skrikwekkende siektes beskerm.

“[Wees] onderdanig en gehoorsaam . . . aan regerings en owerhede as heersers” (Titus 3:1). In baie lande is die besit of gebruik van sekere dwelms teen die wet. Ware Christene sal nie onwettige dwelms besit of gebruik nie.