Waarom hulle kerk toe gaan

“DIE Republiek Korea het nou byna vier keer soveel Presbiteriane as Amerika.” Hierdie stelling in die tydskrif Newsweek het baie lesers moontlik verbaas, aangesien die meeste mense aan Korea dink as ’n Konfusiaanse of Boeddhistiese gemeenskap. Vandag sal ’n besoeker heelwat “Christenkerke” daar vind, wat gewoonlik aan hulle rooi neonkruise uitgeken kan word. Op Sondae is dit iets algemeens om mense in groepies van twee of drie, met die Bybel in die hand, kerk toe te sien gaan. Volgens ’n opname wat in 1998 gedoen is, gaan amper 30 persent van Koreane na óf ’n Katolieke óf ’n Protestantse kerk—meer as dié wat bely dat hulle Boeddhiste is.

Deesdae is dit op enige plek ongewoon om so ’n hoë persentasie mense gereeld kerk toe te sien gaan. Nogtans gebeur dit nie net in Korea nie, maar ook in ander Asiatiese lande, asook in Afrika en Latyns-Amerika. Waarom is daar nog so baie wat bely dat hulle in God glo, terwyl onverskilligheid teenoor godsdiens blykbaar wêreldwyd toeneem? Waarom gaan hulle kerk toe?

’n Gallup-opname het aan die lig gebring dat meer as die helfte van Korea se kerkgangers op soek is na gemoedsrus; ongeveer ’n derde hoop om ná die dood vir ewig te lewe en 1 uit 10 strewe na gesondheid, rykdom en sukses.

In China stroom baie mense na die kerke omdat hulle iets probeer vind om die geestelike leemte te vul wat gelaat word namate die Kommunistiese ideologie deur kapitalistiese strewes vervang word. Elke jaar word miljoene Bybels in China gedruk en versprei, en dit lyk of mense dit net so gretig lees as Mao se rooi boekie.

Sommige Katolieke in Brasilië, veral die jonger geslag, is nie tevrede met die belofte van geluk in die hiernamaals nie—hulle wil dit nou hê. Die nuustydskrif Tudo sê: “As dit die bevrydingsteologie was wat die hart en verstand in die sewentigerjare beweeg het, is dit vandag die teologie van welvaart.” In ’n opname in Brittanje is kerkgangers gevra om een ding omtrent hulle kerk te noem waarvan hulle hou. Kameraadskap is feitlik altyd genoem.

Hoewel baie mense dus nog in God glo, is dit duidelik dat die meeste meer besorg is oor wat hulle nou kan kry as oor wat voorlê—of selfs oor God. Wat dink jy is die regte rede vir geloof in God? Wat sê die Bybel oor die saak? Jy sal die antwoord in die volgende artikel vind.