Die prag van Jehovah se skepping

“Die bome van Jehovah word versadig”

HET jy al ooit in ’n woud gestaan terwyl die sonstrale tussen die hoë bome deur skyn? Kon jy die blare in die windjie hoor ritsel?—Jesaja 7:2.

In sommige dele van die aarde, gedurende ’n sekere tyd van die jaar, verander die blare van verskeie bome in ’n kleuregloed van rooi, oranje, geel en ander skakerings. Dit lyk amper asof die woude aan die brand is! Hoe goed pas dit tog by hierdie woorde: “Word vrolik, o berge, met vreugdegeroep, o woud en al die bome daarin!”—Jesaja 44:23.a

Amper ’n derde van die landmassa van die planeet Aarde word deur woude bedek. Die woude en die oorvloed lewensvorme daarin verheerlik hulle Ontwerper en Skepper, Jehovah God, op luisterryke wyse. “Loof Jehovah . . . vrugtebome en alle seders”, het die geïnspireerde psalmis gesing.—Psalm 148:7-9.

“Bome is noodsaaklik vir die mens se bestaan weens die materiële en estetiese waarde daarvan”, sê die boek The Trees Around Us. Woude beskerm, onderhou en verbeter die mens se varswatervoorraad. Bome suiwer ook die lug. Deur middel van die wonderlike proses van fotosintese word koolstofdioksied, water, minerale en sonlig deur die blaarselle in voedingstowwe en suurstof omgesit.

Die woud is ’n meesterstuk wat prag en ontwerp betref. Reusebome is gewoonlik die indrukwekkendste lede van die woud. Tussen hulle groei tallose varings, mosse, rankplante, struike en kleiner plantjies. Hierdie plante is afhanklik van die omgewing wat deur die bome geskep word, aangesien hulle in die bome se skadu groei en die vog absorbeer wat deur die woud voorsien word.

In sommige woude met bladwisselende bome kan daar gedurende die laaste deel van die jaar tot 25 miljoen blare op ’n enkele hektaar van die woudvloer val. Wat gebeur daarmee? Al hierdie organiese materiaal word uiteindelik deur insekte, swamme, wurms en ander organismes omgesit in humus, ’n noodsaaklike bestanddeel van vrugbare grond. Ja, niks word vermors terwyl hierdie swygsame werkers die grond vir nuwe groei voorberei nie.

Onder die dooie blare wemel die woudgrond van lewe. Volgens die boek The Forest “kan tot 1 350 klein diertjies . . . gevind word in ’n gedeelte wat ’n vierkante voet [30 cm²] groot en ’n duim [2,5 cm] diep is, en dit sluit nie die miljarde mikro-organismes in wat daar in elke hand vol grond is nie”. Verder wemel die woud van reptiele, voëls, insekte en soogdiere. Wie moet die lof ontvang vir hierdie prag en verskeidenheid? Die Skepper daarvan sê tereg: “Aan my behoort al die wilde diere van die woud, die diere op ’n duisend berge.”—Psalm 50:10.

Party diere is met die merkwaardige vermoë geskep om te hiberneer en die felheid van ’n koue winter asook lang tydperke van voedselskaarste te oorleef. Maar nie alle diere slaap deur die winter nie. Selfs in die middel van die winter kan jy ’n trop edelherte oor ’n stuk veld sien huppel. Edelherte hiberneer nie en bêre ook nie voedsel weg nie, maar jy kan hulle in die woud sien wei terwyl hulle aan sagte takkies en uitspruitsels vreet, soos die bygaande foto uit Duitsland toon.

Die Skrif verwys redelik dikwels na plantlewe. Volgens een telling word byna 130 verskillende plante in die Bybel genoem, waaronder sowat 30 boomsoorte. Die plantkundige Michael Zohary lewer kommentaar oor hoe betekenisvol hierdie verwysings is en sê: “Selfs in gewone nievakkundige sekulêre lektuur vind ’n mens nie soveel verwysings na plante wat met verskeie aspekte van die lewe verband hou, as wat jy in die Bybel sal vind nie.”

Bome en woude is pragtige gawes van ’n liefdevolle Skepper. Dié van ons wat al tyd in ’n woud deurgebring het, sal beslis saamstem met die psalmis se woorde: “Die bome van Jehovah word versadig, die seders van die Libanon wat hy geplant het, waar die voëls nes maak.”—Psalm 104:16, 17.

[Voetnoot]

[Venster/Prente op bladsy 9]

Een van die indrukwekkendste vrugtebome in die Midde-Ooste is die amandelboom. Vroeg in die jaar—lank voor die meeste ander bome—ontwaak die boom uit sy slaap. Die eertydse Hebreërs het die amandelboom die ontwaker genoem, met verwysing na sy vroeë bloeisels. Dit is amper asof die boom met ’n mantel fyn pienk of wit bloeisels ontwaak.—Prediker 12:5.

Van die sowat 9 000 bekende voëlsoorte word ongeveer 5 000 as sangvoëls geklassifiseer. Hulle sang verbreek die stilte diep in die woud (Psalm 104:12). Die sanggors sing byvoorbeeld verskeie opgewekte liedjies. Gryskopsangers, soos die een op die foto, is sangertjies met ’n treffende grys, geel en olyfgroen veredos.—Psalm 148:1, 10.

[Prent op bladsy 9]

Woud in Normandië, Frankryk