’n Geboorte wat onthou moet word

‘Daar is vandag vir julle ’n Redder gebore, wat Christus die Here is.’—Lukas 2:11.

ONGEVEER tweeduisend jaar gelede het ’n vrou in die dorp Betlehem aan ’n seuntjie geboorte gegee. Min van die plaaslike inwoners het besef hoe belangrik hierdie geboorte was. Maar ’n paar herders, wat die nag saam met hulle kuddes in die veld deurgebring het, het ’n menigte engele gesien en hulle hoor sing: “Heerlikheid aan God in die hoogtes daar bo, en op aarde vrede onder mense van welwillendheid.”—Lukas 2:8-14.

Die herders het Maria en haar man, Josef, toe in ’n stal gevind, net soos die engele gesê het. Maria, wat die kind Jesus genoem het, het hom in ’n krip in die stal neergelê (Lukas 1:31; 2:12). Vandag, tweeduisend jaar later, beweer omtrent ’n derde van die hele mensdom dat hulle Jesus Christus volg. En die gebeure wat met sy geboorte verband hou, vorm die grondslag van ’n verhaal wat waarskynlik meer dikwels as enige ander verhaal in die mensegeskiedenis vertel is.

In Spanje, ’n land met ’n sterk Katolieke tradisie en ’n liefde vir tradisionele fiëstas, het baie maniere ontstaan om daardie unieke nag in Betlehem te herdenk.

Die Spaanse Kersfees

Sedert die 13de eeu is die Kerstoneel een van die bekendste aspekte van Spaanse feesvierings. Baie gesinne maak ’n klein model van die krip waarin Jesus neergelê is. Kleifigure stel die herders en die wyse manne (of “drie konings”) sowel as Josef, Maria en Jesus voor. Groter Kerstonele met amper lewensgrootte figure word dikwels gedurende die Kerstyd naby stadsale opgerig. Fransiskus van Assisi het hierdie gebruik blykbaar in Italië begin om mense se aandag op die Evangelieverslag van Jesus se geboorte te vestig. Fransiskaanse monnike het dit later in Spanje en baie ander lande gewild gemaak.

Die wyse manne, of magiërs, speel ’n prominente rol in Spaanse Kersvierings, baie soos Sinterklaas, of Kersvader, in ander lande. Op 6 Januarie, Día de Reyes (die Dag van die Konings), gee die wyse manne glo vir Spaanse kinders geskenke, net soos die wyse manne volgens die volksgeloof vir die pasgebore Jesus geskenke gebring het. Maar min mense is daarvan bewus dat die Evangelieverslag nie meld hoeveel wyse manne Jesus besoek het nie. Dit sou akkurater wees om hulle as sterrewiggelaars eerder as konings te identifiseer.a Daarbenewens het Herodes ná die besoek van die wyse manne al die seuntjies in Betlehem “van twee jaar en jonger” laat doodmaak in ’n poging om Jesus te vermoor. Dit gee te kenne dat hulle besoek ’n hele ruk ná Jesus se geboorte plaasgevind het.—Matteus 2:11, 16.

Sedert die 12de eeu bied party Spaanse dorpe ’n toneelopvoering aan van Jesus se geboorte, insluitende die besoek van die herders aan Betlehem en die latere besoek van die wyse manne. Deesdae hou die meeste Spaanse stede op 5 Januarie ’n cabalgata, of optog, waarin die “drie konings” op indrukwekkende sierwaens deur die middestad ry en lekkers aan toeskouers uitdeel. Tradisionele Kersversierings en villancicos (Kersliedere) dra by tot die vrolike stemming van die feestelike geleentheid.

Die meeste Spaanse families hou daarvan om op Oukersaand (24 Desember) ’n spesiale ete te hê. Die tradisionele kos sluit dinge in soos turrón (amandel-en-heuning-lekkers), marsepein, droë vrugte, gebraaide lamsvleis en seekos. Familielede, selfs dié wat ver woon, wend ’n spesiale poging aan om vir hierdie geleentheid bymekaar te kom. Gedurende nog ’n tradisionele ete, op 6 Januarie, eet die gesin ’n roscón de reyes, ’n ringvormige koek van “die Konings” waarin ’n sorpresa (klein figuurtjie) weggesteek is. ’n Soortgelyke gebruik in Romeinse tye het ’n slaaf, in wie se stuk koek die weggesteekte figuurtjie was, in staat gestel om ’n dag lank “koning” te wees.

“Die gelukkigste en besigste tyd van die jaar”

Ongeag watter plaaslike gebruike ontstaan het, Kersfees het nou die wêreld se vernaamste feestelike geleentheid geword. The World Book Encyclopedia beskryf Kersfees as “die gelukkigste en besigste tyd van die jaar vir miljoene Christene en party nie-Christene regoor die wêreld”. Is dit ’n goeie ding?

Die geboorte van Christus is ongetwyfeld ’n geskiedkundige gebeurtenis. Die feit dat dit volgens die engele se aankondiging “vrede onder mense van welwillendheid” sou bring, toon duidelik hoe belangrik dit was.

Nietemin “is die geboorte van Jesus nie in die vroeë dae van die Christelike godsdiens as ’n fees gevier nie”, sê die Spaanse joernalis Juan Arias. As dit die geval is, waar het Kersfees dan vandaan gekom? Wat is die beste manier om die geboorte en lewe van Jesus te onthou? Jy sal die antwoorde op hierdie vrae in die volgende artikel vind.

[Voetnoot]