“My hulp is van Jehovah”

Jongmense wat Jehovah loof, verryk hulle lewe

“EK WIL die beste uit die lewe hê!” Dit is hoe ’n tienerseun sy verwagtings beskryf het. Maar hoe kan ’n jongmens die heel beste uit die lewe kry? Die Bybel gee ’n reguit antwoord: “Hou jou Skepper in gedagte terwyl jy jonk is!”—Prediker 12:1, Contemporary English Version.

Dit is nie net volwassenes wat Jehovah kan loof en dien nie. Samuel, ’n seun van Elkana en Hanna, was baie jonk toe hy Jehovah by die tabernakel gedien het (1 Samuel 1:19, 20, 24; 2:11). ’n Jong Hebreeuse meisietjie het volkome vertroue in Jehovah getoon toe sy voorgestel het dat die Siriese leërhoof Naäman na die profeet Elisa gaan om van melaatsheid genees te word (2 Konings 5:2, 3). In Psalm 148:7, 12 word seuns sowel as meisies beveel om Jehovah te loof.a Toe Jesus net 12 jaar oud was, het hy intens daarin belanggestel om sy Vader te dien (Lukas 2:41-49). Omdat hulle uit die Skrif onderrig is, het party van die seuns wat Jesus by die tempel gesien het, uitgeroep: “Red tog die Seun van Dawid!”—Matteus 21:15, 16.

Jehovah word vandag geloof

Vandag is daar baie jongmense onder Jehovah se Getuies wat trots is op hulle oortuigings en moedig in skole en elders met ander daaroor praat. Kyk na twee voorbeelde.

In Brittanje het die 18-jarige Stephanie se klas aborsie en ander etiese geskille bespreek. Die onderwyser het gesê dat aborsies nou algemeen aanvaar word en dat geen jong meisie rede sou hê om teen hierdie gebruik beswaar te maak nie. Toe almal in die klas met sy beskouing saamstem, het Stephanie gevoel dat sy haar Bybelse standpunt eenvoudig moet verdedig. Die geleentheid om dit te doen, het gekom toe die onderwyser Stephanie om haar mening gevra het. Hoewel sy eers senuweeagtig was, het Stephanie die geleentheid gebruik om die skriftuurlike beskouing te verduidelik. Sy het Eksodus 21:22-24 geparafraseer en verduidelik dat, as dit verkeerd is om ’n ongebore baba te beseer, ’n aborsie ongetwyfeld in stryd met God se wil sal wees.

Die onderwyser, ’n geestelike, het nog nooit hierdie verse gelees nie. Stephanie se moedige getuienis het aanleiding gegee tot talle goeie gesprekke met haar klasmaats oor verskeie onderwerpe. Een meisie neem nou gereeld die nuutste nommers van Die Wagtoring en Ontwaak!, en twee ander klasmaats het die streekbyeenkoms van Jehovah se Getuies bygewoon om te sien hoe Stephanie haar toewyding aan God deur waterdoop simboliseer.

Die sesjarige Vareta, van Suriname, Suid-Amerika, het die geleentheid aangegryp om God te loof toe haar onderwyseres vertroosting uit die Skrif nodig gehad het. Die onderwyseres was drie dae afwesig, en toe sy terugkom, het sy haar leerlinge gevra of hulle weet waarom sy weg was. Hulle het geantwoord: “Was Juffrou dan nie siek nie?” “Nee”, het die onderwyseres geantwoord. “My suster is oorlede, en ek voel baie hartseer. Daarom moet julle stil wees.”

Daardie middag, terwyl haar ma ’n middagslapie geniet het, het Vareta deur ouer tydskrifte geblaai en die opskrifte gelees. Sy het afgekom op Die Wagtoring van 15 Julie 2001, met die opskrif: “Is daar lewe ná die dood?” Sy het haar ma opgewonde wakker gemaak en gesê: “Mammie, Mammie, kyk! Ek het ’n tydskrif oor die dood vir my onderwyseres gekry!” Die tydskrif is saam met ’n brief van Vareta af na die onderwyseres gestuur. Sy het geskryf: “Dit is spesiaal vir Juffrou. In die Paradys sal Juffrou weer Juffrou se suster sien, want Jehovah lieg nooit nie. Hy het belowe dat hy ’n paradys gaan bring, nie in die hemel nie, maar op aarde.” Die onderwyseres het haar innige waardering uitgespreek vir die Bybelse vertroosting wat hierdie artikels voorsien het.

Bou vir die toekoms

Jehovah is “die gelukkige God”, en hy wil hê dat jongmense gelukkig moet wees (1 Timoteus 1:11). Sy eie Woord sê: “Geniet jou jeug. Wees bly terwyl jy jonk is” (Prediker 11:9, Today’s English Version). Jehovah sien verder as die hede en weet wat die langtermyngevolge van goeie sowel as slegte gedrag is. Daarom vermaan sy Woord jongmense: “Dink dan nou aan jou Grootse Skepper in die dae van jou jonkheid, voordat die rampspoedige dae kom, of die jare aangebreek het wanneer jy sal sê: ‘Ek het geen behae daarin nie.’”—Prediker 12:1.

Ja, Jehovah wil hê dat jongmense die kosbare gawe van die lewe ten volle moet geniet. Deur aan God te dink en hom te loof, kan jongmense ’n betekenisvolle, lonende lewe lei. Selfs wanneer hulle uitdagings die hoof moet bied, kan hulle met vertroue sê: “My hulp is van Jehovah.”—Psalm 121:2.

[Voetnoot]

[Lokteks op bladsy 9]

“Loof Jehovah van die aarde af, . . . jong manne en ook maagde.”—PSALM 148:7, 12.

[Venster op bladsy 8]

JEHOVAH ONDERSTEUN JONGMENSE

“U is my hoop, o Soewereine Heer Jehovah, my vertroue van my jeug af.”—Psalm 71:5.

“[God versadig] jou hele lewe met die goeie . . . ; jou jeug word deurentyd vernuwe net soos dié van ’n arend.”—Psalm 103:5.