’n Jong meisie met ’n wonderlike hoop

DIE uitgewers van die Ontwaak! het ’n brief ontvang van ’n 12-jarige meisie met die naam Stephanie. “Ek wil graag vir julle vertel hoe baie die publikasies my al op skool gehelp het”, het sy geskryf. “Onlangs het ons ’n taak gekry om te doen met die tema ‘Kulturele verskille’. Ek en my gesin het deur die publikasies gegaan en artikels en prente uitgesny wat by die tema pas. Toe het ek alles wat ons gevind het, op ’n plakkaat geplak.” Stephanie se onderwyseres het die klas gevra om die vyf beste take te kies. “Die volgende dag”, skryf Stephanie, “het ek gehoor dat my taak een van die vyf bestes was.”

Een van die bronne wat Stephanie gekies het, was die Ontwaak! van 22 Oktober 1998 met die titel “Sal alle mense mekaar ooit liefhê?” As een van Jehovah se Getuies glo Stephanie vas dat mense van verskillende kulture in vrede kan leef. Trouens, sy maak deel uit van ’n internasionale broederskap waarin voormalige vyande—insluitende Tutsi’s en Hutu’s, Duitsers en Russe, Armeniërs en Turke, Japannese en Amerikaners—deur Bybelwaarheid verenig is. Saam probeer hulle hulle Skepper navolg. Hoe? Een van die Bybeltekste wat Stephanie in haar taak gebruik het, gee die antwoord: “God [is] nie partydig . . . nie, maar in elke nasie is die mens wat hom vrees en regverdigheid beoefen vir hom aanneemlik” (Handelinge 10:34, 35). Jehovah se Getuies werk hard om soortgelyke onpartydigheid in hulle verhoudings met ander aan die dag te lê.

Stephanie sien uit na die vervulling van die Bybel se belofte dat God se Koninkryk binnekort regverdige toestande op ons aarde gaan teweegbring (Openbaring 21:3, 4). In ’n wêreld waar baie jongmense bang en onseker oor die toekoms is, staan sy uit as iemand met ’n wonderlike hoop.