Jehovah sal jou hoegenaamd nie verlaat nie
CHRISTENE in Judea het wrede vervolging ondervind, en hulle het te kampe gehad met die materialistiese beskouing van die mense om hulle. Om hulle aan te moedig, het die apostel Paulus die woorde aangehaal wat Jehovah vir die Israeliete gesê het toe hulle die Beloofde Land binnegegaan het. Paulus het geskryf: “Ek sal jou hoegenaamd nie verlaat of jou ooit versaak nie” (Hebreërs 13:5; Deuteronomium 31:6). Hierdie belofte het die eerste-eeuse Hebreeuse Christene ongetwyfeld versterk.
Dieselfde belofte moet ons versterk om sorge die hoof te bied wat ontstaan omdat ons lewe in “kritieke tye . . . wat moeilik is om deur te kom” (2 Timoteus 3:1). As ons op Jehovah vertrou en dienooreenkomstig optree, sal hy ons selfs in die moeilikste omstandighede onderskraag. Om te sien hoe Jehovah volgens hierdie belofte kan optree, kan ons byvoorbeeld kyk na die situasie wat ontstaan wanneer ’n mens skielik jou werk verloor.
’n Onverwagte situasie
Die aantal werklose mense neem wêreldwyd toe. Volgens ’n Poolse tydskrif word werkloosheid as “een van die moeilikste sosio-ekonomiese probleme” beskou. Nywerheidslande is geen uitsondering nie. Byvoorbeeld, selfs onder die lede van die Organisasie vir Ekonomiese Samewerking en Ontwikkeling het die getal werkloses teen 2004 “tot meer as 32 miljoen gestyg en ’n hoër vlak bereik as tydens die Groot Depressie van die 1930’s”. Volgens die Sentrale Statistiekkantoor was driemiljoen mense in Pole in Desember 2003 werkloos, wat “18 persent uitmaak van alle burgerlikes wat oud genoeg is om te werk”. Een bron het gesê dat die werkloosheidsyfer onder die swart bevolking in Suid-Afrika in 2002 47,8 persent bereik het!
Skielike werkloosheid en onverwagte afdankings is vir baie, insluitende Jehovah se knegte, ’n wesenlike gevaar. “Tyd en onvoorsiene gebeurtenisse” tref enigiemand (Prediker 9:11). Ons vind dalk dat ons soos die psalmis Dawid sê: “Die benoudhede van my hart het vermeerder” (Psalm 25:17). Sal jy sulke ongunstige omstandighede die hoof kan bied? Dit kan jou emosionele, geestelike en materiële welsyn raak. Sal jy weer op die been kan kom as jy werkloos is?
Bied emosionele spanning die hoof
“Dit is moeiliker vir mans wanneer hulle hulle werk verloor”, aangesien hulle tradisioneel as die broodwinner van die gesin beskou word, verduidelik die sielkundige Janusz Wietrzyński. Hy het gesê dat dit “’n warboel van emosies” in ’n man kan ontketen, van woede tot berusting. Wanneer ’n vader afgedank word, kan dit sy gevoel van eiewaarde heeltemal afbreek en veroorsaak dat hy “met sy gesin begin stry”.
Adam, ’n Christenvader van twee, verduidelik hoe hy gevoel het toe hy sy werk verloor het: “Ek het maklik ontsteld geraak; alles het my geïrriteer. Selfs snags was al my drome oor werk en oor hoe ek kon sorg vir my kinders en my vrou, wat ook onverwags afgedank is.” Toe Ryszard en Mariola, ’n egpaar met ’n kind, albei hulle werk verloor het, het hulle ’n groot banklening gehad wat hulle moes terugbetaal. Die vrou vertel: “Ek was gedurig bekommerd, want my gewete het vir my gesê dat dit ’n fout was om die lening aan te gaan. Ek het aanhou dink dat dit alles my skuld was.” As ons ons in sulke situasies bevind, kan ons maklik kwaad, angstig of verbitterd voel, en ons emosies kan die oorhand oor ons kry. Hoe kan ons dan die negatiewe emosies beheers wat in ons opkom?
Die Bybel gee doeltreffende raad oor hoe om ’n positiewe gesindheid te behou. “Moet julle oor niks kwel nie”, het die apostel Paulus gemaan, “maar laat julle versoeke in alles deur gebed en smeking tesame met danksegging by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak” (Filippense 4:6, 7). Wanneer ons Jehovah in gebed nader, sal dit ons “die vrede van God” gee, ’n kalm gemoedstoestand wat gegrond is op ons geloof in hom. Adam se vrou, Irena, sê: “In ons gebede het ons Jehovah van ons situasie vertel en gesê hoe ons ons lewens nog meer sou vereenvoudig. My man, wat geneig is om hom gou te bekommer, het begin voel dat daar ’n oplossing sou kom.”
As jy onverwags jou werk verloor, is jy in ’n goeie posisie om Jesus Christus se raad in die Bergpredikasie toe te pas: “Hou op om julle te kwel oor julle siel, oor wat julle sal eet of wat julle sal drink, of oor julle liggaam, oor wat julle sal dra. . . . Hou dan aan om eers die koninkryk en sy regverdigheid te soek, en al hierdie ander dinge sal vir julle bygevoeg word” (Matteus 6:25, 33). Ryszard en Mariola het hierdie raad toegepas in hulle poging om hulle emosies te verwerk. “My man het my altyd vertroos en beklemtoon dat Jehovah ons nie sou verlaat nie”, sê Mariola. Haar man voeg by: “Deur saam in gebed te volhard, het ons nader aan God en aan mekaar gekom, en dit het ons die nodige vertroosting gegee.”
God se heilige gees sal ons ook help om die situasie te verwerk. Selfbeheersing, wat deur die gees in ons voortgebring kan word, kan ons help om kalm te bly en ons gevoelens te beheers (Galasiërs 5:22, 23). Dit is dalk nie maklik nie, maar dit is moontlik, want Jesus het belowe dat “die Vader in die hemel heilige gees [sal] gee aan dié wat hom vra”.—Lukas 11:13; 1 Johannes 5:14, 15.
Moenie jou geestelike behoeftes verwaarloos nie
Dit kan vir selfs die mees gebalanseerde Christen aanvanklik angswekkend wees as hy onverwags afgedank word, maar ons moenie ons geestelike behoeftes verwaarloos nie. Neem as voorbeeld die 40-jarige Moses, wie se hele lewe verander het toe hy sy posisie in die adelstand verloor het en ’n skaapwagter moes word, ’n werk wat die Egiptenare verag het (Genesis 46:34). Moses moes hom by sy nuwe omstandighede aanpas. Gedurende die daaropvolgende 40 jaar het hy Jehovah toegelaat om hom te vorm en voor te berei vir nuwe take in die toekoms (Eksodus 2:11-22; Handelinge 7:29, 30; Hebreërs 11:24-26). Moses het sy geestelike fokus behou ondanks die probleme waarmee hy te kampe gehad het, en hy was gewillig om Jehovah se opleiding te aanvaar. Laat ons nooit toelaat dat ongunstige omstandighede ons geestelike waardes oorskadu nie!
Hoewel dit traumaties kan wees as ’n mens skielik jou werk verloor, is dit ’n goeie tyd om ons bande met Jehovah God en sy volk te versterk. Adam, wat vroeër genoem is, het so gevoel. Hy sê: “Toe ek en my vrou albei ons werk verloor het, het die gedagte om van Christelike vergaderinge af weg te bly of ons deelname aan die evangelisasiewerk te verminder, nooit by ons opgekom nie. Hierdie beskouing het gekeer dat ons ons te veel oor die volgende dag bekommer.” Ryszard voel dieselfde: “Sonder die vergaderinge en velddiens sou ons nooit die situasie kon verwerk het nie; ons sou beslis verteer gewees het deur bekommernis. Geestelike gesprekke met ander is opbouend omdat dit ons aandag op hulle behoeftes vestig en dit van ons behoeftes wegneem.”—Filippense 2:4.
Ja, pleks van jou te bekommer oor werk, moet jy die ekstra tyd probeer gebruik vir geestelike bedrywighede, soos om persoonlike studie te doen, aan gemeentelike bedrywighede deel te neem of jou bediening uit te brei. Dan sal jy nie die lewe van die werkloses lei nie, maar eerder “baie [hê] om in die werk van die Here te doen”—wat vreugde sal verskaf aan jou sowel as enige opregte mense wat gunstig reageer op die Koninkryksboodskap wat jy verkondig.—1 Korintiërs 15:58.
Voorsien in die materiële behoeftes van jou gesin
Geestelike voedsel sal egter nie ’n leë maag vol maak nie. Dit is verstandig van ons om die volgende beginsel in gedagte te hou: “Ja, as iemand vir sy eie mense, en veral vir dié wat lede van sy huisgesin is, nie sorg nie, het hy die geloof verloën en is hy erger as ’n ongelowige” (1 Timoteus 5:8). “Hoewel die broers in die gemeente gou in ons fisiese behoeftes help voorsien”, erken Adam, “is ons as Christene verplig om ons in te span om werk te soek.” Ons kan staatmaak op die ondersteuning van Jehovah en sy volk, maar ons moet nooit vergeet dat ons die inisiatief moet neem om werk te soek nie.
Watter inisiatief? “Moenie met gevoude arms vir God sit en wag om iets te doen en hoop dat ’n wonderwerk sal plaasvind nie”, verduidelik Adam. “Moenie skroom om jou as een van Jehovah se Getuies te identifiseer wanneer jy werk soek nie. Werkgewers waardeer dit gewoonlik.” Ryszard gee hierdie raad: “Vra almal wat jy ken of hulle van enige werksgeleenthede weet, doen gereeld navraag by die personeelagentskap, lees advertensies soos: ‘Gesoek, vrou om na gestremde om te sien’; of ‘Tydelike werk: aarbeiplukkers nodig’. Hou aan soek! Moenie te kieskeurig wees nie, selfs al moet jy nederige werk doen of werk wat nie jou ideale verwesenlik nie.”
Ja, “Jehovah is [jou] helper”. Hy sal “jou hoegenaamd nie verlaat of jou ooit versaak nie” (Hebreërs 13:5, 6). Jy hoef jou nie onnodig te kwel nie. Die psalmis Dawid het geskryf: “Laat jou weg aan Jehovah oor en verlaat jou op hom, en hy sal optree” (Psalm 37:5). ‘Om ons weg aan Jehovah oor te laat’, beteken dat ons op hom vertrou en dinge op sy manier doen, selfs wanneer omstandighede nie vir ons gunstig lyk nie.
Adam en Irena kon hulle onderhou deur vensters te was en trappe in geboue skoon te maak en deur spaarsamig te wees in hulle aankope. Hulle het die personeelagentskap ook gereeld besoek. “Ons het altyd hulp ontvang net wanneer ons dit nodig gehad het”, sê Irena. Haar man voeg by: “Met verloop van tyd het ons agtergekom dat die dinge waaroor ons gebid het, nie noodwendig in ooreenstemming met God se wil was nie. Dit het ons geleer om op sy wysheid te vertrou en nie volgens ons eie begrip te handel nie. Dit is beter om kalm te wag op die oplossing wat God sal voorsien.”—Jakobus 1:4.
Ryszard en Mariola het verskeie los werkies gedoen, maar het terselfdertyd betrokke geraak by getuieniswerk in gebiede waar daar hulp nodig is. “Juis wanneer ons niks meer oorgehad het om te eet nie, het ons die nodige werk gekry”, sê Ryszard. “Ons het goed betaalde betrekkings van die hand gewys wanneer dit met ons teokratiese verantwoordelikhede sou inmeng. Ons het verkies om op Jehovah te wag.” Hulle glo dat Jehovah sake so bewerk het dat hulle ’n woonstel baie goedkoop kon huur en dat Ryszard uiteindelik ’n werk gevind het.
Dit kan baie traumaties wees as ’n mens jou werk verloor, maar waarom beskou jy dit nie as ’n geleentheid om self te sien dat Jehovah jou nooit sal versaak nie? Jehovah sorg vir jou (1 Petrus 5:6, 7). Hy het deur die profeet Jesaja belowe: “Moenie rondkyk nie, want ek is jou God. Ek sal jou versterk. Ek sal jou werklik help” (Jesaja 41:10). Moet nooit toelaat dat ’n onverwagte gebeurtenis, soos om jou werk te verloor, jou ontsenu nie. Doen alles wat jy kan en los dan die res in Jehovah se hande. Wag op Jehovah, “ja, in stilte” (Klaagliedere 3:26). Jy sal ryk seëninge ontvang.—Jeremia 17:7.
[Prent op bladsy 9]
Gebruik die tyd vir geestelike bedrywighede
[Prente op bladsy 10]
Leer om spaarsamig te wees, en moenie te kieskeurig wees wanneer jy werk soek nie