“Een van die beste dae in my lewe”

“DEPRESSIE is die algemeenste en seker die grootste geestesgesondheidsprobleem onder jongmense”, beweer Beyondblue, ’n staatsondersteunde agentskap in Australië. Volgens studies is daar elke jaar omtrent 100 000 jong Australiërs wat aan depressie ly.

Jong Christene is nie immuun teen depressie nie. Maar geloof in Jehovah het baie van hulle gehelp om negatiewe gevoelens te oorkom en ’n sukses van hulle jong lewe te maak. Gevolglik maak hulle ’n goeie indruk op ander. Hoe?

Beskou die ondervinding van die 18-jarige Claire. Sy en haar ma is in ’n gemeente van Jehovah se Getuies in Melbourne. Toe Claire se pa die gesin verlaat het, het sy aan depressie begin ly. Maar haar geloof in haar hemelse Vader, Jehovah, het sterk gebly. Eendag het die gesinsdokter, Lydia, by Claire se huis ’n draai gemaak om te sien hoe dit met Claire se ma gaan, wat siek was. Agterna het sy vriendelik aangebied om Claire na die winkelsentrum toe te neem. Op pad soontoe het sy Claire gevra of sy ’n kêrel het. Claire het verduidelik dat sy, as een van Jehovah se Getuies, nie sommer vir die pret verhoudings met seuns het nie. Dit het die dokter verbaas. Claire het toe verduidelik hoe die Bybel haar gehelp het om wyse besluite in haar lewe te maak. Aan die einde van hulle gesprek het Claire aangebied om vir die dokter ’n Bybelpublikasie te bring wat haar persoonlik baie gehelp het. Die titel van die boek was Vrae wat jongmense vra—Antwoorde wat werk.

Drie dae nadat Lydia die boek ontvang het, het sy Claire se ma gebel om te sê hoeveel sy die boek geniet het. Sy het toe nog ses boeke gevra om vir haar kollegas te gee. Toe Claire die boeke aflewer, het die dokter verduidelik dat sy werklik beïndruk was met Claire se geloof. Claire het aangebied om die Bybel met haar te studeer, en die dokter het ingestem.

Claire het die studie ’n paar maande lank gedurende die dokter se etensuur gehou. Toe het Lydia vir Claire gevra om tydens ’n seminaar ’n praatjie te hou oor die onderwerp van depressie onder jongmense. Hoewel Claire huiwerig gevoel het, het sy ingestem. Meer as 60 mense het die seminaar bygewoon. Vier geestesgesondheidsdeskundiges—almal volwassenes—het die gehoor toegespreek. Daarna was dit Claire se beurt. Sy het benadruk dat dit uiters belangrik is vir jongmense om ’n verhouding met God te hê. Sy het verduidelik dat Jehovah God diep besorg is oor jongmense en diegene help wat hulle tot hom wend vir hulp en vertroosting. Sy het ook haar oortuiging uitgespreek dat Jehovah binnekort ’n einde sal maak aan alle fisiese en geestesiektes (Jesaja 33:24). Wat was die gevolg van hierdie uitstekende getuienis?

“Baie het ná die sessie na my toe gekom en gesê hoe beïndruk hulle was om ’n jong persoon oor God te hoor praat”, het Claire gesê. “Ek het 23 eksemplare van die Jongmense vra-boek by hulle gelaat. Drie meisies in die gehoor het my hulle telefoonnommers gegee. Een van daardie meisies studeer nou die Bybel. Dit was een van die beste dae in my lewe.”