Van ons lesers

Energie Met brandstofpryse in my land wat die hoogte inskiet, wil ek graag my waardering uitspreek vir die voorbladreeks “Kan ons skoner energie bekostig?” (8 Maart 2005). Die gedagte dat ‘Jehovah God sal verseker dat die aarde se oorvloedige hulpbronne in God se nuwe wêreld regverdig verdeel word’, is gerusstellend.

M. N., Verenigde State

Sonnestelsel Ek dra feitlik geen kennis van die sterrekunde nie, maar ek het die artikel “Die man wat die geheime van die sonnestelsel ontsluier het” (8 Maart 2005) met groot belangstelling gelees. Kepler, wat die wette van planetêre beweging ontdek het, se prestasies is wonderlik. Maar wanneer ek dink aan die wysheid van Jehovah, wat hierdie wette geskep het, kan ek nie anders as om met eerbied vervul te word nie.

M. J., Japan

Sterrekunde is een van die baie dinge waarin ek belangstel. Ek was verbaas om te lees dat Johannes Kepler nie altyd ’n maklike lewe gehad het nie. Danksy Jehovah sal ek dalk in die nuwe wêreld die voorreg hê om die onbekende sterrestelsels van ons heelal saam met daardie geleerde van vervloë tye te bestudeer. Hou asseblief aan om sulke artikels te skryf wat beslis die moeite werd is om te lees!

S. M., Duitsland

Dankie dat julle ’n moeilike onderwerp vereenvoudig het sodat almal Jehovah se wonderlike skeppingswerke kan begin verstaan. Dit het my versterk om te lees oor Kepler se ontdekkings en oor sy ferm besluit om van valse godsdiens afgeskeie te bly! Ek is seker dat julle in die toekoms nóg tydige artikels sal voorsien.

S.M.C., Brittanje

Sy het meer gedoen Die artikel “Bly om meer te kan doen” (22 Februarie 2005) het my baie aangemoedig. Ek kon my met Claire Vavy se lewensverhaal vereenselwig, aangesien ons ewe oud is en ek al net so lank soos sy ’n voltydse evangeliedienaar is. Die feit dat die ondervinding deur ’n jong ongetroude volwassene vertel is, het my aandag die meeste getrek. As ’n ongetroude vrou is ek deur Claire se ywer en positiewe gesindheid versterk. In die foto’s van haar wat regdeur die artikel verskyn, kan ’n mens sien dat sy waarlik gelukkig is. Dit het weer eens vir my beklemtoon dat geluk nie deur ons status of besittings bepaal word nie, maar deur ons liefde vir Jehovah en ons diens aan hom.

Y. R., Verenigde State

Tamaties Ek is 12 jaar oud, en ek het gehou van die artikel “Die tamatie—’n baie veelsydige ‘groentesoort’” (8 Maart 2005). Ek is so bly dat Jehovah baie soorte lekker groente gemaak het. Ek was verbaas om te lees dat daar tot tamaties met strepe is! Dankie vir sulke interessante artikels.

M. F., Letland

Krokodille Die artikel “Glimlag—Vir ’n krokodil?” (8 Maart 2005) het my baie beïndruk. Ek het nog altyd gedink dat die krokodil ’n merkwaardige dier is. Ek was bly om so baie interessante feite te lees wat mense dalk kan beweeg om net soveel van krokodille te hou soos ek. Ek sien uit na Jehovah se nuwe wêreld, waar ons krokodille selfs beter sal kan leer ken!

L. I., Verenigde State

Van ons lesers Ek is met ’n beensiekte gebore. Die pragtige, opbouende briewe wat in “Van ons lesers” (8 Maart 2005) verskyn het oor die artikel “’n Nuwe gesig vir Mailyn” (22 Mei 2004) het my tot trane beweeg. Elke brief het iets baie spesiaals gehad waarmee ek my kon vereenselwig en waarby ek persoonlik kon baat vind.

M. J., Brittanje