“Die oorlog wat alle oorloë sal beëindig”
‘Ek belowe julle dat dit die laaste oorlog sal wees—die oorlog wat alle oorloë sal beëindig.’—WOODROW WILSON, AMERIKAANSE PRESIDENT (1913-21).
DIT was die hoë verwagtinge van een wêreldleier aan die einde van die Eerste Wêreldoorlog, omtrent 90 jaar gelede. Daardie wêreldwye konflik was so afgryslik dat die oorwinnaars wou—en moes—glo dat al hulle opofferings blywende voordele sou meebring. Maar menseoorloë los selde probleme op en sal dus beslis nie die diepgewortelde probleem van oorlog self uit die weg kan ruim nie.
Omtrent 20 jaar nadat president Wilson hierdie oorhaastige belofte gemaak het, het die Tweede Wêreldoorlog uitgebreek. Dit het veel meer dood en vernietiging as sy voorloper veroorsaak. Twee dekades se tegnologiese vooruitgang het die mensdom groter vermoë gegee om massaslagtings aan te rig. Toe die Tweede Wêreldoorlog geëindig het, het wêreldleiers besef dat die skrikbeeld van oorlog groter is as ooit tevore.
In 1945 het die Amerikaanse generaal Douglas MacArthur verklaar: “Ons het ons laaste kans gehad. As ons nie met ’n beter en regverdiger stelsel vorendag kom nie, is Armageddon ons voorland.”
Generaal MacArthur het geweet wat twee atoombomme gedurende die laaste dae van die Tweede Wêreldoorlog aan Nagasaki en Hirosjima gedoen het. Die skrikwekkende vernietiging wat oor hierdie twee Japannese stede gebring is, het hom ’n nuwe betekenis aan die woord “Armageddon” laat heg—’n volskaalse kernoorlog wat die einde van die beskawing op ons planeet kan beteken.
Die mensdom is nog steeds baie besorg oor ’n moontlike kernslagting. Teen die 1960’s het die wêreld se supermoondhede ’n strategie uitgewerk van “wedersyds versekerde vernietiging”. Hulle doelwit was om genoeg missiele of afleweringstelsels te hê om die vernietiging te verseker van 25 persent van die vyand se burgerlike bevolking en 50 persent van sy nywerheidsvermoë—ongeag watter kant die oorlog begin het. Min mense het hierdie strategie om wêreldvrede te bewaar, enigsins bemoedigend gevind.
Kernwapens neem vandag toe, en plaaslike oorloë eis nog steeds tallose lewens. Die moontlikheid van ’n kernoorlog bly ’n bedreiging vir die mensdom. Hoewel mense graag ’n einde aan oorlog wil sien, glo min dat ’n oorlog of enige ander strategie hierdie doelwit kan bereik.
Maar die Bybel beskryf ’n unieke oorlog wat ’n einde aan alle oorloë sal maak. Dit noem hierdie oorlog “Armageddon”—dieselfde woord wat mense dikwels met ’n kernramp assosieer. Hoe kan Armageddon werklik ’n einde aan oorlog maak? Die volgende artikel sal hierdie vraag bespreek.
[Foto-erkenning op bladsy 3]
DTRA Photo
[Foto-erkenning op bladsy 4]
Nagasaki, Japan, 1945: USAF photo