Onthou jy?

Het jy dit geniet om onlangse nommers van Die Wagtoring te lees? Wel, kyk of jy die volgende vrae kan beantwoord:

• Wanneer het die sterrewiggelaars Jesus besoek?

Een uitgawe van die Bybel lewer die volgende kommentaar: “Die Magiërs [het] Jesus nie op die aand van sy geboorte by die krip besoek, soos die herders nie. Hulle het ’n aantal maande later gekom.” Teen daardie tyd was Jesus ’n “kindjie” en het hy in ’n huis gewoon (Matt. 2:7-11). As Jesus op die nag van sy geboorte goud en waardevolle geskenke gegee is, sou Maria dan 40 dae later net twee voëls by die tempel geoffer het?—1/1, bladsy 31.

• Wat kan baie doen om hulle lewe te verryk?

’n Mens vra dalk: ‘Kan ek my omstandighede verander en my lewe vereenvoudig?’ Amy het dit gedoen. Sy was welaf, maar nie gelukkig nie. Sy het besef dat sy byna van die geloof af op ’n dwaalspoor gebring is omdat sy ’n loopbaan in hierdie wêreld nagejaag het. Gevolglik het sy besluit om Koninkryksbelange eerste te stel en kon sy ’n tyd lank pionier. Amy sê: “Ek geniet nou ’n gevoel van voldoening wat ek nooit ervaar het toe ek [sekulêre doelwitte nagejaag het] nie.”—1/15, bladsy 19.

• Wat kan party moeders help om vervulling te vind?

Baie moeders doen sekulêre werk. Party doen dit om in hulle gesin se basiese behoeftes te voorsien, en ander om finansiële onafhanklikheid te verkry of om vir luukshede te betaal. Nog ander doen dit omdat hulle hulle werk geniet. Christenmoeders speel ’n onontbeerlike rol by die huis—veral wanneer ’n kind nog klein is. Party het besluit om minder sekulêre werk te doen of om op te hou werk sodat hulle meer aandag aan die gesin kan skenk, wat groot vervulling meebring.—2/1, bladsye 28-31.

• Na watter “geslag” het Jesus verwys in sy woorde wat in Matteus 24:34 opgeteken is?

Jesus het die woord “geslag” dikwels in ’n negatiewe sin gebruik wanneer hy met of van goddelose mense gepraat het. Maar nie in hierdie geval, toe hy gepraat het met sy dissipels wat weldra met heilige gees gesalf sou word nie. Hulle sou in die beste posisie wees om die gevolgtrekkings te maak wat in Matteus 24:32, 33 genoem word. Dit wil dus voorkom asof Jesus, in die eerste-eeuse sowel as die moderne toepassing van sy woorde, na sy gesalfde volgelinge verwys het.—2/15, bladsye 23-4.

• Hoe was die Wet ’n tugmeester, soos Galasiërs 3:24 sê?

’n Eertydse tugmeester was dikwels ’n vertroude slaaf wat ’n kind se veiligheid verseker het en toegesien het dat die vader se wense gerespekteer word. Op soortgelyke wyse het die Wet die Jode teen verderflike invloede beskerm, soos huwelike met heidene. Maar soos die geval was met ’n kind se tugmeester, het die Wet ’n tydelike rol gespeel totdat Christus gekom het.—3/1, bladsye 18-21.

• Watter eienskappe moet ons in ooreenstemming met Jakobus 3:17 aan die dag lê?

Omdat ons kuis is, moet ons goddelose dinge onmiddellik verwerp (Gen. 39:7-9). Ons moet ook vredeliewend wees, en aggressiwiteit of gedrag vermy wat die vrede versteur. Dit sal dus goed wees as elkeen van ons ons afvra: ‘Is ek bekend as iemand wat vrede maak of iemand wat die vrede versteur? Het ek dikwels meningsverskille met ander? Neem ek maklik aanstoot of gee ek ander dikwels aanstoot? Of vergewe ek maklik en dring ek nie daarop aan dat my persoonlike standaarde gevolg moet word nie?’—3/15, bladsye 24-5.

• Waarom het Jesus ’n blinde man geleidelik genees? (Mark. 8:22-26).

Die Bybel gee nie ’n presiese verduideliking nie. Maar deur die blinde man geleidelik te genees, het Jesus hom moontlik kans gegee om daaraan gewoond te raak om te kan sien. Dit was ’n blyk van Jesus se liefdevolle besorgdheid oor die blinde man.—4/1, bladsy 30.