Het jy geweet?
Waarom was die welriekende olie wat Maria gebruik het, so duur?
’n Paar dae voor Jesus se dood het Maria, die suster van Lasarus, “gekom met ’n albaste fles welriekende olie, egte nardus, baie duur”, en dit op Jesus uitgegooi (Markus 14:3-5; Matteus 26:6, 7; Johannes 12:3-5). Markus en Johannes se verslae sê dat hierdie olie 300 denarii werd was—omtrent ’n jaar se loon vir ’n gewone arbeider.
Waar het hierdie duur olie vandaan gekom? Daar word oor die algemeen gemeen dat die nardus wat in die Bybel genoem word, afkomstig is van ’n klein aromatiese plant (Nardostachys jatamansi) wat in die Himalajas gevind word. Duur nardus is dikwels verdun en selfs nagemaak. Maar Markus sowel as Johannes gebruik die uitdrukking “egte nardus”. Die feit dat hierdie welriekende olie so duur was, gee te kenne dat dit waarskynlik van verre Indië gekom het.
Waarom sê Markus se verslag dat Maria “die albaste fles oopgebreek” het? ’n Albaste fles het gewoonlik ’n dun nek gehad wat goed verseël kon word om te verhoed dat die kosbare geur verlore gaan. In sy boek Discoveries From the Time of Jesus sê Alan Millard: “Dit is maklik om te sien hoe die opgewonde vrou [die nek van die fles] sou afbreek, en nie sou wag om dit oop te maak nie, wat die geur alles op een slag vrygestel het.” Dit sal verklaar waarom ‘die huis gevul is met die geur van die welriekende olie’ (Johannes 12:3). Dit was inderdaad ’n baie duur maar gepaste geskenk. Waarom? Hierdie dankbare vrou het kort tevore gesien hoe Jesus haar geliefde broer, Lasarus, opwek.—Johannes 11:32-45.
Jerigo—Een stad of twee?
Matteus, Markus en Lukas lewer almal verslag oor ’n wonderdadige genesing wat naby Jerigo plaasgevind het (Matteus 20:29-34; Markus 10:46-52; Lukas 18:35-43). Matteus sowel as Markus sê dat Jesus hierdie wonderwerk verrig het toe hy “uit” Jerigo uitgegaan het. Maar Lukas sê dat dit gebeur het toe Jesus “naby” Jerigo gekom het.
Was daar in Jesus se dag net een stad met die naam Jerigo of was daar twee? Die boek Bible Then & Now antwoord: “Teen die tyd van die Nuwe Testament was Jerigo herbou, omtrent ’n myl (1,6 km) suid van die ou stad. Herodes die Grote het ’n winterpaleis daar opgerig.” Dit word bevestig deur die boek Archaeology and Bible History wat sê: “Die Jerigo van Jesus se tyd was ’n dubbele stad. . . . Die ou Joodse stad was omtrent ’n myl van die Romeinse stad af.”
Jesus het dus moontlik die wonderwerk verrig terwyl hy die Joodse stad verlaat het en die Romeinse stad genader het of andersom. Dit is duidelik dat kennis van die omstandighede wat bestaan het toe die verslae geskryf is, help om ’n oënskynlike weerspreking op te klaar.
[Prent op bladsy 31]
Albaste fles vir welriekende olie
[Erkenning]
© Réunion des Musées Nationaux/Art Resource, NY