Weerstaan “die gees van die wêreld”
“Ons het nie die gees van die wêreld ontvang nie, maar die gees wat van God kom.”—1 KOR. 2:12.
1, 2. (a) Waarom is kanaries in die verlede by Britse myne aangehou? (b) Met watter gevaar het Christene te kampe?
IN 1911 het die Britse owerheid ’n wet uitgevaardig wat bedoel was om die lewens van steenkoolmynwerkers te red. Elke myn moes twee kanaries aanhou. Waarom? As ’n brand in ’n myn uitgebreek het, het reddingswerkers die kanaries saam met hulle ondergronds geneem. Die klein voëltjies is gevoelig vir gifgasse, soos koolstofmonoksied. As die lug besoedel geraak het, het die voëltjies tekens van benoudheid getoon, selfs afgeval van die stokkie waarop hulle gesit het. Hierdie vroeë waarskuwing was lewensbelangrik. Koolstofmonoksied is ’n kleurlose, reuklose gas wat die dood veroorsaak deurdat dit rooibloedselle verhinder om suurstof aan die liggaam te lewer. As niks die reddingswerkers teen die gevaar gewaarsku het nie, kon hulle flou word en dan sterf sonder om ooit te besef dat hulle vergiftig word.
2 In geestelike sin bevind Christene hulle in ’n soortgelyke situasie as die mynwerkers. Hoe so? Toe Jesus sy dissipels die opdrag gegee het om die goeie nuus wêreldwyd te verkondig, het hy geweet dat hy hulle in ’n gevaarlike milieu instuur, wat deur Satan en die gees van die wêreld oorheers word (Matt. 10:16; 1 Joh. 5:19). Die nag voor sy dood was Jesus so besorg oor sy dissipels dat hy tot sy Vader gebid het: “Ek versoek u nie om hulle uit die wêreld weg te neem nie, maar om oor hulle te waak weens die bose.”—Joh. 17:15.
3, 4. Watter waarskuwing het Jesus sy dissipels gegee, en waarom moet dit vir ons van belang wees?
3 Jesus het sy volgelinge gewaarsku teen die gevaar van ’n geestelike slaap wat tot die dood kan lei. Sy woorde het spesiale betekenis vir ons, aangesien ons gedurende die voleinding van die stelsel van dinge lewe. Hy het sy dissipels vermaan: “Bly . . . wakker [sodat] julle daarin sal slaag om te ontkom aan al hierdie dinge wat bestem is om te gebeur en om voor die Seun van die mens te staan” (Luk. 21:34-36). Maar gelukkig het Jesus ook belowe dat sy Vader heilige gees sou voorsien om hulle geheue te verfris en om hulle te help om wakker te bly en sterk te wees.—Joh. 14:26.
4 Wat van ons wat vandag lewe? Is dieselfde heilige gees beskikbaar om ons te help? Indien wel, wat moet ons doen om dit te ontvang? Wat is die gees van die wêreld, en hoe is dit werksaam? En hoe kan ons hierdie wêreld se gees met welslae weerstaan?—Lees 1 Korintiërs 2:12.
Heilige gees of die wêreld se gees?
5, 6. Wat kan heilige gees vir ons doen, maar wat moet ons doen om dit te ontvang?
5 Die heilige gees is nie net in die eerste eeu voorsien nie. Dit is vandag geredelik beskikbaar, en God se gees kan ons die krag gee om te doen wat reg is en ons ook krag gee in sy diens (Rom. 12:11; Fil. 4:13). Dit kan ook tere eienskappe in ons voortbring, soos liefde, goedhartigheid en goedheid, wat aspekte van “die vrugte van die gees” is (Gal. 5:22, 23). Maar Jehovah God dwing nie onwillige mense om sy heilige gees te ontvang nie.
6 Dit sal dan redelik wees vir ons om te vra: ‘Wat kan ek doen om heilige gees te ontvang?’ Wel, die Bybel toon dat daar ’n aantal dinge is wat ons kan doen. ’n Belangrike stap is heel eenvoudig—vra God daarvoor. (Lees Lukas 11:13.) Nog ’n nuttige stap is om die raad in God se geesgeïnspireerde Woord te bestudeer en toe te pas (2 Tim. 3:16). Nie almal wat die Bybel bloot lees, ontvang natuurlik God se gees nie. Maar wanneer ’n opregte Christen God se Woord bestudeer, kan hy die gevoelens en beskouing wat in die geïnspireerde Woord weergegee word, sy eie maak. Dit is ook noodsaaklik dat ons erken dat Jehovah Jesus aangestel het as Sy verteenwoordiger en as die een deur wie God sy gees voorsien (Kol. 2:6). Gevolglik wil ons ons lewe vorm na Jesus se voorbeeld en leringe (1 Pet. 2:21). Hoe meer ons daarna streef om soos Christus te wees, hoe meer sal ons heilige gees ontvang.
7. Hoe word mense deur die gees van die wêreld beïnvloed?
7 Daarteenoor beïnvloed die gees van die wêreld mense om Satan se persoonlikheid te weerspieël. (Lees Efesiërs 2:1-3.) Die gees van die wêreld is op ’n aantal maniere werksaam. Soos ons vandag oral om ons kan sien, werk dit opstand teen God se standaarde in die hand. Dit bevorder “die begeerte van die vlees en die begeerte van die oë en die spoggerige vertoon van ’n mens se lewensmiddele” (1 Joh. 2:16). Dit bring vleeslike werke voort, soos hoerery, afgodediens, spiritisme, jaloesie, vlae van toorn en dronkenskap (Gal. 5:19-21). En dit bevorder afvallige praatjies wat skend wat heilig is (2 Tim. 2:14-18). Een ding is seker, hoe meer ’n persoon toelaat dat hy deur die gees van die wêreld beïnvloed word, hoe meer sal hy soos Satan word.
8. Watter keuse moet ons almal maak?
8 Ons kan nie in ’n geestelike leemte lewe nie. Elke persoon moet kies wat hy sal toelaat om sy lewe te rig—heilige gees of die wêreld se gees. Diegene wat nou deur die gees van die wêreld oorheers word, kan losbreek van die invloed daarvan en toelaat dat heilige gees hulle lewe rig. Maar die teenoorgestelde is ook moontlik. Diegene wat ’n ruk lank deur heilige gees gelei is, kan deur die gees van die wêreld verstrik word (Fil. 3:18, 19). Kom ons kyk hoe ons die wêreld se gees kan weerstaan.
Herken vroeë waarskuwingstekens
9-11. Wat is party van die waarskuwingstekens wat kan aandui dat ons besig is om voor die gees van die wêreld te swig?
9 Die Britse steenkoolmynwerkers wat vroeër gemeld is, het kanaries gebruik om hulle vroegtydig teen gifgas in die lug te waarsku. As ’n mynwerker ’n voëltjie van sy stokkie sien afval het, het hy geweet dat hy vinnig moet optree as hy wil bly lewe. Wat is in geestelike sin party van die vroeë waarskuwingstekens wat aandui dat ons deur die gees van die wêreld beïnvloed word?
10 Toe ons aanvanklik die waarhede in God se Woord geleer het en daarna ons lewe aan Jehovah toegewy het, het ons waarskynlik die Bybel ywerig gelees. Ons het heel moontlik vurig en dikwels gebid. En ons het dit geniet om gemeentelike vergaderinge by te woon en het elke vergadering beskou as ’n bron van geestelike verkwikking, soos ’n oase vir ’n dorstige man. Dit alles het ons gehelp om los te breek van die wêreld se gees en vry te bly daarvan.
11 Probeer ons nog steeds om die Bybel elke dag te lees? (Ps. 1:2). Bid ons dikwels en uit ons hart? Geniet ons gemeentelike vergaderinge en woon ons elke week almal by? (Ps. 84:10). Of het ons party van hierdie goeie gewoontes verloor? Dit is so dat daar miskien baie dinge is wat eise aan ons tyd en energie stel, en dit kan ’n uitdaging wees om ’n goeie geestelike roetine te handhaaf. Maar gestel party van ons goeie gewoontes het mettertyd verswak. Is ons dalk besig om voor die gees van die wêreld te swig? Sal ons nou ’n kragtige poging aanwend om die goeie gewoontes wat ons vroeër gehad het, te hernieu?
Moet “nooit beswaar word” nie
12. Op wie het Jesus vir sy dissipels gesê om te “let”, en waarom?
12 Wat anders kan ons doen om die gees van die wêreld te weerstaan? Kort voordat Jesus sy dissipels vermaan het om ‘wakker te bly’, het hy hulle teen ’n paar spesifieke gevare gewaarsku. “Let op julleself”, het hy gesê, “dat julle harte nooit beswaar word met oormatige etery en strawwe drinkery en sorge van die lewe, en dié dag skielik, in ’n oomblik, oor julle kom soos ’n strik nie.”—Luk. 21:34, 35.
13, 14. Watter soort vrae oor etery en drinkery kan ons ons gepas afvra?
13 Dink ’n bietjie aan hierdie waarskuwing. Het Jesus dit veroordeel om kos en drank te geniet? Nee! Hy was bewus van Salomo se woorde: “Ek het te wete gekom dat daar vir [die mensekinders] niks beters is nie as om bly te wees en om goed te doen in die lewe; en ook dat elke mens eet en inderdaad drink en die goeie sien vir al sy harde werk. Dit is die gawe van God” (Pred. 3:12, 13). Maar Jesus het geweet dat die gees van die wêreld ’n gebrek aan selfbeheersing met betrekking tot hierdie dinge bevorder.
14 Hoe kan ons seker wees dat die wêreld se gees nie ons verstand vergiftig het wat die gevare van oormatige etery of strawwe drinkery betref nie? Ons kan ons afvra: ‘Hoe reageer ek wanneer ek raad oor vraatsug in die Bybel of in ons publikasies lees? Is ek geneig om hierdie vermaning as ontoepaslik of te streng te verwerp, terwyl ek miskien my dade verskoon of regverdig?a Hoe beskou ek die raad oor alkohol, en gebruik ek dit—indien enigsins—in matigheid terwyl ek “dronkenskap” heeltemal vermy? Beskou ek hierdie raad as onbelangrik en voel ek dat dit om die een of ander rede nie op my van toepassing is nie? Tree ek verdedigend op of raak ek kwaad wanneer ander besorgdheid oor my drinkery uitspreek? Spoor ek ander aan om hierdie Bybelraad as onbelangrik af te maak?’ Ja, ’n persoon se gesindheid dui aan of hy voor die wêreld se gees swig of nie.—Vergelyk Romeine 13:11-14.
Moenie deur sorge verstik word nie
15. Teen watter menslike neiging het Jesus gewaarsku?
15 Nog ’n baie belangrike stap om die gees van die wêreld te weerstaan, hou verband met hoe ons sorge hanteer. Jesus het geweet dat ons as onvolmaakte wesens geneig is om ons oor alledaagse dinge te kwel. Hy het liefdevol vir sy dissipels gesê: “Hou op om julle te kwel” (Matt. 6:25). Dit is verstaanbaar dat ons besorg sal wees oor belangrike kwessies, soos om God te behaag, Christelike verantwoordelikhede na te kom en ons gesin van die lewensbenodigdhede te voorsien (1 Kor. 7:32-34). Wat kan ons dan uit Jesus se waarskuwing leer?
16. Watter uitwerking het die wêreld se gees op baie mense?
16 Die wêreld se gees, met sy klem op die spoggerige vertoon van ’n mens se lewensmiddele, wek ongesonde sorge by baie mense. Hulle probeer ons wysmaak dat geld sekuriteit bied en dat ’n persoon se waarde nie aan sy geestelike eienskappe gemeet word nie, maar aan die hoeveelheid en die gehalte van sy besittings. Diegene wat deur hierdie propaganda mislei word, sal hulle afsloof om rykdom te vergaar en is voortdurend daaroor besorg om die nuutste, die grootste, die mees gesofistikeerde produkte te verkry (Spr. 18:11). So ’n verdraaide beskouing van materiële dinge wek sorge wat ’n persoon se geestelike groei verstik.—Lees Matteus 13:18, 22.
17. Hoe kan ons voorkom dat ons deur sorge verstik word?
17 Ons kan voorkom dat sorge ons verstik as ons Jesus se gebod gehoorsaam: “Hou dan aan om eers die koninkryk en [God se] regverdigheid te soek.” As ons dit doen, verseker Jesus ons, sal die dinge wat ons werklik nodig het, vir ons bygevoeg word (Matt. 6:33). Hoe kan ons toon dat ons hierdie belofte glo? Een manier is deur eers God se regverdigheid te soek—deur te bly by God se standaard van wat reg is in verband met geldsake. Byvoorbeeld, ons weier om valse gegewens op ons belastingopgawes te verstrek of om selfs “klein” leuens in ons saketransaksies te vertel. Ons doen alles in ons vermoë om ons finansiële verpligtinge na te kom en laat ons ‘Ja Ja beteken’ wanneer dit by die betaling van skuld kom (Matt. 5:37; Ps. 37:21). Sulke eerlikheid maak ’n mens miskien nie ryk nie, maar dit bring God se goedkeuring mee, het ’n rein gewete tot gevolg en verminder sorge grootliks.
18. Watter goeie voorbeeld het Jesus vir ons gestel, en hoe strek dit ons tot voordeel as ons hom navolg?
18 Om eers die Koninkryk te soek, beteken dat ons die regte prioriteite moet hê. Beskou Jesus se voorbeeld. Hy het soms ’n kledingstuk van goeie gehalte gedra (Joh. 19:23). Hy het kos en wyn saam met goeie vriende geniet (Matt. 11:18, 19). Maar besittings en vermaak was soos smaakmiddels in sy lewe, nie die hoofdis nie. Jesus se voedsel was om Jehovah se wil te doen (Joh. 4:34-36). Die lewe is uiters bevredigend wanneer ons Jesus se voorbeeld navolg! Ons smaak die vreugde om mense wat vertrap word, te help om vertroosting uit die Skrif te put. Ons geniet die liefde en ondersteuning van die gemeente. En ons maak Jehovah se hart bly. Wanneer ons die regte prioriteite het, is besittings en genot nie ons meesters nie. Dit is eerder knegte, of middele, wat ons help om Jehovah te aanbid. En hoe bedrywiger ons is in werk wat God se Koninkryk ondersteun, hoe kleiner is die moontlikheid dat ons deur die gees van die wêreld oorweldig sal word.
Hou aan “om die gees te bedink”
19-21. Hoe kan ons aanhou “om die gees te bedink”, en waarom moet ons dit doen?
19 Gedagtes gaan dade vooraf. Wat baie mense onbesonne dade noem, is dikwels dade wat deur vleeslike denke aangedryf word. Die apostel Paulus herinner ons dus daaraan dat ons ons denke moet bewaak. Hy het geskryf: “Dié wat in ooreenstemming met die vlees is, rig hulle verstande op die dinge van die vlees, maar dié wat in ooreenstemming met die gees is, op die dinge van die gees.”—Rom. 8:5.
20 Hoe kan ons voorkom dat ons denke—en gevolglik ons dade—deur die gees van die wêreld oorheers word? Ons moet oppas wat ons in ons verstand laat ingaan en moet die wêreld se propaganda sover moontlik daaruit probeer hou. Wanneer ons byvoorbeeld vermaak kies, weier ons om ons verstand te laat besoedel deur programme wat onsedelikheid of geweld verheerlik. Ons besef dat God se heilige, of rein, gees nie in ’n vuil verstand sal woon nie (Ps. 11:5; 2 Kor. 6:15-18). Verder nooi ons God se gees in ons verstand in deur middel van gereelde Bybellees, gebed, bepeinsing en vergaderingbywoning. En ons werk saam met hierdie gees as ons gereeld aan die Christelike predikingswerk deelneem.
21 Ons moet beslis die gees van die wêreld en die vleeslike begeertes wat dit bevorder, weerstaan. Dit is egter die ywerige inspanning werd, want soos Paulus sê, “om die vlees te bedink, beteken die dood, maar om die gees te bedink, beteken lewe en vrede”.—Rom. 8:6.
[Voetnoot]
a Vraatsug is ’n geestesgesindheid, wat gekenmerk word deur ’n gulsige of buitensporige oorgawe aan kos. Dit word dus nie deur ’n persoon se liggaamsgrootte bepaal nie, maar deur sy gesindheid teenoor kos. Iemand kan van normale grootte of selfs maer wees en kan nogtans ’n vraat wees. Daarenteen is party mense oorgewig weens ’n kwaal, of oorerflikheidsfaktore kan tot vetsug bydra. ’n Vername punt is of iemand, ongeag sy of haar gewig, buitensporig gulsig is met betrekking tot kos.—Sien “Vrae van lesers” in Die Wagtoring van 1 November 2004.
Onthou jy?
• Wat moet ons doen om heilige gees te ontvang?
• Wat is party van die maniere waarop die wêreld se gees ons kan beïnvloed?
• Hoe kan ons die gees van die wêreld weerstaan?
[Prent op bladsy 21]
Bid vir heilige gees voordat jy werk toe of skool toe gaan
[Prente op bladsy 23]
Ons moet ons verstand rein hou, goeie sakegebruike handhaaf en matig in gewoontes wees