Ontvang God se gees, nie die gees van die wêreld nie

“Ons het nie die gees van die wêreld ontvang nie, maar die gees wat van God kom, sodat ons die dinge sou ken wat goedgunstig deur God aan ons gegee is.”—1 KOR. 2:12.

1, 2. (a) In watter opsig is ware Christene in ’n oorlog gewikkel? (b) Watter vrae sal ons bespreek?

WARE Christene is in ’n oorlog gewikkel! Ons vyand is magtig, geslepe en ’n geharde stryder. Hy het ’n wapen tot sy beskikking wat so doeltreffend is dat hy die oorhand oor die meeste mense gekry het. Maar ons hoef nie te voel dat ons magteloos is of nooit die stryd sal kan wen nie (Jes. 41:10). Ons het ’n verdedigingsmiddel tot ons beskikking wat ondeurdringbaar en onoorwinlik is.

² Ons oorlog is nie fisies nie; dit is geestelik. Ons vyand is Satan die Duiwel, en ’n belangrike wapen wat hy gebruik, is “die gees van die wêreld” (1 Kor. 2:12). Ons vernaamste verdedigingsmiddel teen sy aanvalle is God se gees. Om hierdie oorlog te oorleef en geestelik gesond te bly, moet ons vir God se gees vra en dan die vrug daarvan in ons lewe openbaar (Gal. 5:22, 23). Maar wat is die gees van die wêreld, en hoe het dit so sterk geword? Hoe kan ons vasstel of die gees van die wêreld ons beïnvloed? En wat kan ons by Jesus leer oor hoe om God se gees te ontvang en die gees van die wêreld te weerstaan?

Die gees van die wêreld—Waarom so deurdringend?

3. Wat is die gees van die wêreld?

³ Die gees van hierdie wêreld het sy oorsprong by Satan, “die heerser van die wêreld”, en dit is in stryd met God se heilige gees (Joh. 12:31; 14:30; 1 Joh. 5:19). Dit is die wêreld se oorheersende gesindheid, en dit beweeg mense om op ’n sekere manier op te tree. Hierdie dryfkrag stuur die mensegemeenskap in ’n rigting wat hulle in konflik met God se wil en voorneme laat kom.

4, 5. Hoe het die gees wat deur Satan bevorder word, so deurdringend geword?

⁴ Hoe het die gees wat deur Satan bevorder word, so deurdringend geword? Eerstens het Satan Eva in die tuin van Eden bedrieg. Hy het haar oortuig dat onafhanklikheid van God haar lewe sal verbeter (Gen. 3:13). Wat ’n leuenaar was hy tog! (Joh. 8:44). Toe het hy Adam deur middel van die vrou sover gekry om ontrou aan Jehovah te word. As gevolg van Adam se keuse is die mensdom in sonde verkoop, waardeur hulle ’n neiging geërf het om deur Satan se gees van ongehoorsaamheid beïnvloed te word.—Lees Efesiërs 2:1-3.

⁵ Satan het ook ’n groot aantal engele beïnvloed, wat demone geword het (Op. 12:3, 4). Dié verraad teen God is die een of ander tyd voor die Vloed van Noag se dag gepleeg. Hierdie engele het geglo dat dit vir hulle beter sal wees om hulle toegewese plekke in die hemel te verlaat en op die aarde vrye teuels aan onnatuurlike begeertes te gee (Jud. 6). Met die hulp van hierdie demone, wat nou terug is in die geesteryk, mislei Satan “die hele bewoonde aarde” (Op. 12:9). Ongelukkig bly die meeste mense onbewus van demoniese invloed.—2 Kor. 4:4.

Beïnvloed die gees van die wêreld jou?

6. Slegs hoe kan die gees van die wêreld ons beïnvloed?

⁶ Baie mense is onbewus van Satan se invloed, maar ware Christene hoef nie onkundig omtrent sy taktiek te wees nie (2 Kor. 2:11). Trouens, die gees van die wêreld kan ons slegs beïnvloed as ons dit toelaat. Kom ons ondersoek vier vrae wat sal help om te toon of ons deur God se gees of die gees van die wêreld beïnvloed word.

7. Wat is een manier waarop Satan ons van Jehovah probeer vervreem?

⁷ Wat openbaar my keuse van vermaak omtrent my? (Lees Jakobus 3:14-18.) Satan probeer ons van God vervreem deur ’n liefde vir geweld in ons hart aan te wakker. Die Duiwel weet dat Jehovah elkeen haat wat geweld liefhet (Ps. 11:5). Satan probeer dus gebruik maak van leesstof, rolprente, musiek en elektroniese speletjies—waarvan party die spelers aanspoor om growwe onsedelikheid en afgryslike wreedheid na te boots—om ons vleeslike begeertes op te wek. Satan gee nie om as ’n deel van ons hart lief is vir wat reg is nie, solank ’n deel daarvan lief is vir wat sleg is, dit wat hy bevorder.—Ps. 97:10.

8, 9. Watter vrae moet ons ons in verband met vermaak afvra?

⁸ Daarenteen beweeg God se gees diegene wat dit ontvang, om kuis, vredeliewend en vol barmhartigheid te wees. Dit sal goed wees as ons ons afvra: ‘Help die vermaak wat ek kies, my om goeie eienskappe aan te kweek?’ Die wysheid van bo is “nie huigelagtig nie”. Diegene wat deur God se gees beïnvloed word, preek nie vir hulle bure oor kuisheid en vrede en geniet dit dan om in die privaatheid van hulle huis na sadistiese geweld en onsedelikheid te kyk nie.

⁹ Jehovah verwag uitsluitlike toegewydheid. Satan sal egter tevrede wees met net een daad van aanbidding, soos wat hy van Jesus wou gehad het (Luk. 4:7, 8). Ons kan ons afvra: ‘Maak die vermaak wat ek kies, dit vir my moontlik om uitsluitlike toegewydheid aan God te gee? Maak my keuse dit vir my moeiliker of makliker om die gees van die wêreld te weerstaan? Moet ek enige veranderinge aanbring wat my toekomstige keuses betref?’

10, 11. (a) Watter gesindheid teenoor materiële besittings word deur die gees van die wêreld bevorder? (b) Watter gesindheid spoor God se geesgeïnspireerde Woord ons aan om te hê?

¹⁰ Wat is my gesindheid teenoor materiële besittings? (Lees Lukas 18:24-30.) Die gees van die wêreld bevorder “die begeerte van die oë” deur gierigheid en materialisme aan te wakker (1 Joh. 2:16). Dit het baie mense vasbeslote gemaak om ryk te wees (1 Tim. 6:9, 10). Hierdie gees probeer ons wysmaak dat ’n oorvloed materiële dinge blywende veiligheid sal bied (Spr. 18:11). Maar as ons toelaat dat ’n liefde vir geld ons liefde vir God verdring, sal Satan ’n oorwinning behaal het. Ons moet ons afvra: ‘Draai my lewe om die najaging van materiële geriewe en genot?’

¹¹ In teenstelling hiermee spoor God se geesgeïnspireerde Woord ons aan om ’n gebalanseerde beskouing van geld te hê en om hard te werk om ons en ons gesin van die lewensbenodigdhede te voorsien (1 Tim. 5:8). God se gees help diegene wat dit ontvang, om Jehovah se vrygewige persoonlikheid te weerspieël. Hulle staan bekend as gewers, nie nemers nie. Hulle heg groter waarde aan mense as aan dinge en deel met graagte wat hulle het wanneer hulle dit kan bekostig (Spr. 3:27, 28). En hulle laat nooit toe dat die najaging van geld voorkeur bo diens aan God geniet nie.

12, 13. Hoe kan God se gees ons ten goede beïnvloed, in teenstelling met die gees van die wêreld?

¹² Watter gees word deur my persoonlikheid weerspieël? (Lees Kolossense 3:8-10, 13.) Die gees van die wêreld bevorder die werke van die vlees (Gal. 5:19-21). ’n Ware toets van watter gees ons beïnvloed, ontstaan, nie wanneer dit goed gaan nie, maar wanneer dit sleg gaan, byvoorbeeld as ’n Christenbroer of -suster ons ignoreer, ons aanstoot gee of selfs teen ons sondig. Daarbenewens kan dit in die privaatheid van ons huis moontlik duidelik word watter gees heers. Dit is dalk gepas om ’n bietjie selfondersoek te doen. Vra jou af: ‘Het my persoonlikheid gedurende die afgelope ses maande meer soos Christus s’n geword of het ek weer in party van my slegte spraak- en gedragsgewoontes verval?’

¹³ God se gees kan ons help om “die ou persoonlikheid met sy gebruike” af te lê en ons met “die nuwe persoonlikheid” te beklee. Dit sal ons help om liefdevoller en goedhartiger te word. Ons sal geneig wees om mekaar vryelik te vergewe, selfs al lyk dit of ons ’n geldige rede tot klagte het. Ons sal nie meer met uitbarstings van “kwaadwillige bitterheid en toorn en gramskap en geskreeu en smadende taal” reageer wanneer ons meen dat ons veronreg is nie. Ons sal ons eerder inspan om “vol tere medelye” te word.—Ef. 4:31, 32.

14. Hoe beskou baie mense in die wêreld God se Woord?

¹⁴ Respekteer ek die Bybel se sedelike standaarde en het ek dit lief? (Lees Spreuke 3:5, 6.) Die gees van die wêreld weerspieël opstandigheid teen God se Woord. Diegene wat deur hierdie gees beïnvloed word, verontagsaam dele van die Bybel wat hulle nie pas nie en verkies eerder tradisies en filosofieë van mense (2 Tim. 4:3, 4). Party mense minag God se Woord heeltemal. Hulle bevraagteken die toepaslikheid en egtheid van die Bybel en word dus wys in hulle eie oë. Hulle verwater die rein standaarde daarvan oor egbreuk, homoseksualiteit en egskeiding. Hulle leer dat “goed sleg is en sleg goed” (Jes. 5:20). Het hierdie gees ons beïnvloed? Vertrou ons op menslike wysheid, onder andere ons eie idees, wanneer ons voor probleme te staan kom? Of streef ons daarna om die Bybel se raad te volg?

15. Wat moet ons doen eerder as om op ons eie wysheid te steun?

¹⁵ God se gees wek in ons respek vir die Bybel. Soos die psalmis beskou ons God se woord as ’n lamp vir ons voet sowel as ’n lig vir ons pad (Ps. 119:105). Ons steun nie op ons eie wysheid nie, maar vertrou eerder op God se geskrewe Woord om ons te help om tussen reg en verkeerd te onderskei. Ons leer nie net om die Bybel te respekteer nie, maar ook om God se wet lief te hê.—Ps. 119:97.

Leer uit Jesus se voorbeeld

16. Wat behels dit om “die denke van Christus” te hê?

¹⁶ As ons God se gees wil ontvang, moet ons “die denke van Christus” aankweek (1 Kor. 2:16). Om “dieselfde geestesgesindheid [te] hê as wat Christus Jesus gehad het,” moet ons weet hoe hy gedink en opgetree het en hom dan navolg (Rom. 15:5; 1 Pet. 2:21). Kom ons kyk na ’n paar maniere waarop ons dit kan doen.

17, 18. (a) Wat leer ons by Jesus oor gebed? (b) Waarom moet ons ‘aanhou vra’?

¹⁷ Bid vir God se gees. Voordat Jesus beproewinge deurgemaak het, het hy vir God se gees gebid om hom te help (Luk. 22:40, 41). Ons moet God ook vir sy heilige gees vra. Jehovah gee dit vryelik en oorvloedig aan almal wat in geloof daarvoor vra (Luk. 11:13). Jesus het gesê: “Hou aan vra, en vir julle sal gegee word; hou aan soek, en julle sal vind; hou aan klop, en vir julle sal oopgemaak word. Want elkeen wat vra, ontvang, en elkeen wat soek, vind, en vir elkeen wat klop, sal oopgemaak word.”—Matt. 7:7, 8.

¹⁸ Wanneer ons Jehovah se gees en hulp wil hê, moet ons nie te gou ophou om daarvoor te vra nie. Ons moet dalk meer dikwels en langer bid. Jehovah laat soms toe dat dié wat versoeke tot hom rig, die diepte van hulle besorgdheid en die opregtheid van hulle geloof toon voordat hy hulle gebede verhoor.a

19. Wat het Jesus altyd gedoen, en waarom moet ons hom navolg?

¹⁹ Gehoorsaam Jehovah ten volle. Jesus het altyd gedoen wat sy Vader behaag. By ten minste een geleentheid het die manier waarop Jesus ’n situasie die hoof wou bied, verskil van wat sy Vader wou hê. Tog het hy vol vertroue vir sy Vader gesê: “Laat . . . nie my wil nie, maar u wil geskied” (Luk. 22:42). Vra jou af: ‘Gehoorsaam ek God selfs wanneer dit nie maklik is nie?’ Gehoorsaamheid aan God is noodsaaklik om die lewe te verkry. Ons is volkome gehoorsaamheid verskuldig aan hom as ons Maker, die Bron en Onderhouer van ons lewe (Ps. 95:6, 7). Daar is geen plaasvervanger vir gehoorsaamheid nie. Ons kan nie God se guns daarsonder verkry nie.

20. Om wat het Jesus se lewe gedraai, en hoe kan ons hom navolg?

²⁰ Leer die Bybel goed ken. Toe Jesus Satan se regstreekse aanval op sy geloof weerstaan het, het hy die Skrif aangehaal (Luk. 4:1-13). Toe Jesus voor sy godsdiensteenstanders te staan gekom het, het hy God se Woord as sy gesag gebruik (Matt. 15:3-6). Jesus se hele lewe het daarom gedraai om God se wet te ken en te vervul (Matt. 5:17). Ons wil ook aanhou om ons verstand met die geloofversterkende Woord van God te voed (Fil. 4:8, 9). Dit kan vir party van ons ’n uitdaging wees om tyd vir persoonlike en gesinstudie te vind. Maar in plaas van tyd te vind, moet ons dalk eerder tyd maak.—Ef. 5:15-17.

21. Van watter reëling kan ons gebruik maak om ons te help om God se Woord beter te leer ken en dit toe te pas?

²¹ “Die getroue en verstandige slaaf” het ons gehelp om tyd vir persoonlike en gesinstudie te hê deur te reël dat ons elke week ’n aand vir Gesinsaanbidding het (Matt. 24:45). Maak jy wyse gebruik van hierdie reëling? Kan jy ’n stelselmatige studie van wat Jesus oor onderwerpe van jou keuse geleer het, by jou studiesessie insluit om jou te help om die denke van Christus te verkry? Jy kan die Watch Tower Publications Index gebruik om leersame inligting te vind oor die onderwerp waarvan jy wil leer. Van 2008 tot 2010 was daar byvoorbeeld in die publieke uitgawe van hierdie tydskrif ’n reeks van 12 artikels met die tema “Wat ons by Jesus leer”. Jy kan hierdie artikels as ’n grondslag vir studie gebruik. Die rubriek “Hoe sal jy antwoord?” het sedert 2006 in die Ontwaak! verskyn. Hierdie vrae was bedoel om jou kennis van God se Woord uit te brei en te verryk. Sluit gerus van tyd tot tyd inligting uit sulke artikels by julle program vir Gesinsaanbidding in.

Ons kan die wêreld oorwin

22, 23. Wat moet ons doen om die wêreld te oorwin?

²² As ons wil hê dat God se gees ons moet lei, moet ons die gees van die wêreld weerstaan. Dit is nie maklik om dit te doen nie. Ons moet moontlik worstel, hard stry (Jud. 3). Maar ons kan die oorwinning behaal! Jesus het vir sy dissipels gesê: “In die wêreld het julle verdrukking, maar skep moed! Ek het die wêreld oorwin.”—Joh. 16:33.

²³ Ons kan ook die wêreld oorwin as ons die gees daarvan weerstaan en alles in ons vermoë doen om God se gees te ontvang. Ja, “as God vir ons is, wie sal teen ons wees?” (Rom. 8:31). As ons God se gees ontvang en die leiding daarvan volg soos dit in die Bybel uiteengesit word, sal ons tevredenheid, vrede en geluk vind en verseker wees van die ewige lewe in die nuwe wêreld wat op hande is.

[Voetnoot]

Onthou jy?

• Waarom is die gees van die wêreld so deurdringend?

• Watter vier vrae moet ons ons afvra?

• Watter drie dinge leer ons by Jesus oor hoe om God se gees te ontvang?

[Prent op bladsy 8]

Hoe het party engele demone geword?

[Prent op bladsy 10]

Satan gebruik die gees van die wêreld om beheer oor mense uit te oefen, maar ons kan van die invloed daarvan losbreek