Gebeure wat vir ons dag voorspel is — Wagtoring

Gebeure wat vir ons dag voorspel is

DIE Bybel voorspel dat God se Koninkryk blywende vrede en geluk op die aarde tot stand sal bring (Daniël 2:44). In die Onse Vader het Jesus sy dissipels geleer om te bid: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). In sy bekende profesie wat hy op die Olyfberg aan sy dissipels gegee het, het Jesus spesifieke gebeure en toestande voorspel wat die koms van daardie Koninkryk onmiddellik sou voorafgaan. Hierdie kenmerke maak saam ’n teken uit wat vir alle opregtes van hart duidelik sigbaar sou wees. Watter van die volgende aspekte van daardie teken is vir jou bekend?

Internasionale oorloë. Jesus het voorspel: “Nasie sal teen nasie opstaan en koninkryk teen koninkryk” (Matteus 24:7). Voor die Eerste Wêreldoorlog in 1914 was oorloë gewoonlik tot een gebied beperk. Die Eerste Wêreldoorlog het nie net groot dele van die wêreld verswelg nie, maar het ook die ontwikkeling bespoedig van die verskriklikste wapens wat die mens tot nog toe gesien het. Byvoorbeeld, die nuwe uitvinding, die vliegtuig, is gebruik om bomme op burgerlikes te werp. Massaproduksie van wapens het die slagting vergroot tot vlakke wat voorheen ondenkbaar was, en ongeveer die helfte van die 65 miljoen soldate wat gaan veg het, het gesneuwel of is gewond. Tog het die slagting met die verloop van die 20ste eeu vererger. Volgens een geskiedskrywer sal die aantal soldate en burgerlikes wat gedurende die Tweede Wêreldoorlog omgekom het, “vir ewig ontelbaar wees”. En die oorloë gaan tot vandag toe nog voort.

Wydverspreide voedseltekorte. “Daar sal voedseltekorte . . . wees”, het Jesus voorspel (Matteus 24:7). In 2005 het die tydskrif Science gesê: “Daar is 854 miljoen mense in die wêreld (ongeveer 14% van ons bevolking) wat chronies of erg ondervoed is.” In 2007 het ’n bron van die Verenigde Nasies berig dat 33 lande nie genoeg voedsel vir hulle burgers het nie. Hoe is dit moontlik terwyl die wêreld se graanproduksie toeneem? Om maar een ding te noem, grond en graan wat gebruik kan word om mense te voed, word eerder gebruik om etanol te vervaardig. “Een persoon kan ’n hele jaar lank gevoed word met die hoeveelheid graan wat nodig is om genoeg etanol te maak om ’n groot vuurwielaangedrewe SNV [sportnutsvoertuig] net een keer vol te maak”, berig die Suid-Afrikaanse koerant The Witness. En in ontwikkelde lande dwing die stygende voedselpryse baie mense om te kies tussen voedsel of ander noodsaaklikhede, soos medisyne of verhitting.

Groot aardbewings. Jesus het gesê: “Daar sal groot aardbewings wees” (Lukas 21:11). As dit vir jou lyk asof meer mense as ooit tevore deur aardbewings geraak word, is jy reg. “Ons sien skielik ’n drastiese toename in seismiese aktiwiteit regoor die wêreld”, het die Indiese seismoloog R. K. Chadha in 2007 gesê. “Niemand weet waarom nie.” Wat meer is, vinnige bevolkingsgroei in gebiede waar aardbewings dikwels voorkom, het veroorsaak dat hierdie rampe ’n groter tol eis. Die aardbewing wat die Indiese Oseaan in 2004 getref het en die tsoenami wat daarop gevolg het, het daardie jaar die “dodelikste in byna 500 jaar van aardbewings” en “die tweede dodelikste in die opgetekende geskiedenis” gemaak, sê die Amerikaanse Departement van Geologiese Opnames.

Hardnekkige siektes. ‘Daar sal pessiektes wees’, het Jesus voorspel (Lukas 21:11). Regoor die wêreld teister ou en nuwe siektes al hoe meer mense, en pogings om geneesmiddels te vind, is onsuksesvol. Byvoorbeeld, internasionale doelwitte om ’n einde aan malaria te maak, moes herhaaldelik hersien word omdat die siekte steeds onbeheersd voortwoed. Daarbenewens sterf miljoene weens ou siektes, insluitende tuberkulose (TB), wat nou saam met vigs en ander nuwe siektes voorkom. “Een derde van die wêreld se bevolking is tans besmet met die TB-basil”, berig die Wêreldgesondheidsorganisasie. Die organisasie meld ook dat MIV tot die TB-epidemie in baie lande bydra. Elke sekonde word nog ’n persoon met TB besmet, en TB word al hoe meer bestand teen geneesmiddels. In 2007 is ’n pasiënt in Europa gediagnoseer met TB wat “bestand is teen elke geneesmiddel wat ons het”, het die tydskrif New Scientist berig.

Sedelike en maatskaplike verval. “Weens die toename in wetteloosheid sal die liefde van die meeste verkoel”, het Jesus gesê (Matteus 24:12). Buiten wat Jesus voorspel het, het die apostel Paulus vooruitgewys na ’n ineenstorting van maatskaplike en sedelike waardes. Hy het die moeilike “laaste dae” beskryf wat sou aanbreek net voordat God se Koninkryk hierdie wêreldstelsel tot ’n einde bring. “Mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir die goeie, verraaiers, eiesinnig, opgeblase van trots, liefhebbers van genot eerder as liefhebbers van God, wat ’n vorm van godvrugtige toegewydheid het maar die krag daarvan verloën” (2 Timoteus 3:1-5). Het jy nie al gesien dat mense hierdie slegte eienskappe meer as voorheen openbaar nie?

Jesus en Paulus het nie al die geskiedkundige, maatskaplike en politieke faktore genoem wat vir hierdie wêreldtoestande verantwoordelik is nie. Hulle profesieë het nietemin die gebeure en gesindhede wat ons vandag sien, akkuraat voorspel. Wat van die toekoms? Die profesie van Jesaja wat ’n betroubare voorspelling van die Messias se koms gegee het, beskryf ook die voordelige veranderinge wat God se Koninkryk op die aarde gaan teweegbring. Ons sal in die volgende artikel hierna kyk.

[Prent op bladsy 6]

“Nasie sal teen nasie opstaan”

[Prent op bladsy 7]

‘Daar sal pessiektes wees’

[Erkenning]