Is God ’n werklike persoon?

Algemene antwoorde:

◼ “Hy is oral, in alles. Hy is soos die wind.”

◼ “Hy is ’n ondefinieerbare intelligensie, ’n abstrakte krag.”

Wat het Jesus gesê?

◼ “In die huis van my Vader is daar baie wonings” (Johannes 14:2). Jesus het van God se figuurlike huis, of woning, gepraat.

◼ “Ek het van die Vader uitgegaan en in die wêreld ingekom. En ek verlaat die wêreld en gaan na die Vader toe” (Johannes 16:28). Jesus het geglo dat God ’n werklike Persoon is wat op ’n spesifieke plek woon.

JESUS het nie van God gepraat asof hy ’n abstrakte krag is nie. Inteendeel, hy het met God gepraat en tot hom gebid. Hy het Jehovah dikwels sy hemelse Vader genoem, ’n benaming wat toon hoe intiem sy verhouding met God was.—Johannes 8:19, 38, 54.

Dit is waar dat ‘geen mens God ooit gesien het nie’ en dat ‘God ’n Gees is’ (Johannes 1:18; 4:24). Maar dit beteken nie dat hy geen liggaam of vorm het nie. Die Bybel sê vir ons: “As daar ’n fisiese liggaam is, is daar ook ’n geestelike” (1 Korintiërs 15:44). Het Jehovah dus ’n geestelike liggaam?

Ja. Toe Jesus opgewek is, het hy “ingegaan . . . in die hemel self, om nou vir ons voor die aangesig van God te verskyn” (Hebreërs 9:24). Dit leer ons twee belangrike feite omtrent God. Eerstens, hy het ’n woning. Tweedens, hy is ’n Persoon, nie net ’n ondefinieerbare krag wat oral is nie.

Hoe kan God se invloed dan oral gevoel word? God kan sy heilige gees, of krag in werking, na enige plek in die heelal stuur. Soos ’n vader wat sy hand uitsteek om sy kinders te troos en te ondersteun, stuur God sy heilige gees uit om sy voorneme te volbring.—Psalm 104:30; 139:7.

Omdat God ’n Persoon is, het hy ook ’n persoonlikheid—selfs gevoelens—en is daar dinge waarvan hy hou en nie hou nie. Die Bybel sê vir ons dat hy sy volk liefhet, hom verbly in sy werke, afgodediens haat en gekrenk voel oor goddeloosheid (Genesis 6:6; Deuteronomium 16:22; 1 Konings 10:9; Psalm 104:31). In 1 Timoteus 1:11 word hy “die gelukkige God” genoem. Geen wonder Jesus het gesê dat ons kan leer om hierdie God met ons hele hart lief te hê nie!—Markus 12:30.a

[Voetnoot]

[Lokteks op bladsy 5]

Soos ’n vader wat sy hand uitsteek, stuur God sy heilige gees uit om sy voorneme te volbring