Kom nader aan God
Die Vader van vaderlose seuns
“’N VADER van vaderlose seuns . . . is God in sy heilige woonplek” (Psalm 68:5). Hierdie geïnspireerde woorde dra ’n treffende les omtrent Jehovah God oor—hy is ingestel op die behoeftes van minderbevoorregtes. Sy besorgdheid oor kinders wat ’n ouer aan die dood afgestaan het, kon duidelik gesien word in die Wet wat hy aan Israel gegee het. Kom ons ondersoek die Bybel se eerste verwysing na die “vaderlose seun”,a wat in Eksodus 22:22-24 gevind word.
God waarsku: “Julle mag geen . . . vaderlose seun verdruk nie” (Vers 22). Dit was nie bloot ’n pleidooi om mensliewendheid nie; dit was ’n goddelike opdrag. ’n Kind wat sy pa—en gevolglik sy beskermer en broodwinner—deur die dood verloor het, was kwesbaar. Niemand moes so ’n kind in enige opsig “verdruk” nie. In ander Bybelvertalings word die woord “verdruk” weergegee as “sleg behandel”, “veronreg” en “uitbuit”. Om ’n vaderlose kind onreg aan te doen, was ’n ernstige saak in God se oë. Presies hoe ernstig was dit?
Die Wet sê verder: “As jy hom hoegenaamd verdruk, dan sal ek, as hy enigsins tot my roep, sy geroep sekerlik hoor” (Vers 23). Die verslag verander van die meervoud “julle” in vers 22 na die enkelvoud “jy” in vers 23. Die individu en die nasie as geheel het onder dieselfde verpligting gestaan om hierdie goddelike wet te gehoorsaam. Jehovah het hulle dopgehou; hy het sy oor geneig tot die vaderlose seuns, altyd gereed om op hulle hulpgeroep te reageer.—Psalm 10:14; Spreuke 23:10, 11.
Maar wat sou gebeur as iemand ’n vaderlose seun onreg aandoen en daardie kind dan rede gee om tot God uit te roep? “My toorn sal inderdaad ontvlam”, sê Jehovah, “en ek sal julle beslis met die swaard dood” (Vers 24). Een Bybelnaslaanwerk sê dat dit “letterlik beteken ‘en my neus sal warm word’, wat ’n idioom is vir siedende woede”. Let op dat Jehovah dit nie aan menseregters in Israel oorgelaat het om hierdie wet toe te pas nie. God sou self oordeel voltrek aan enigiemand wat ’n weerlose kind uitbuit.—Deuteronomium 10:17, 18.
Jehovah het nie verander nie (Maleagi 3:6). Sy hart gaan steeds uit na kinders wat net een ouer of geen ouers het nie (Jakobus 1:27). Een ding is seker—die Vader van die vaderlose seuns word met regverdige toorn vervul wanneer onskuldige kinders verdruk word. Diegene wat ’n weerlose kind wil uitbuit, sal nie aan “die brandende toorn van Jehovah” ontkom nie (Sefanja 2:2). Sulke goddelose mense sal leer dat dit “iets vreesliks [is] om in die hande van die lewende God te val”.—Hebreërs 10:31.
[Voetnoot]
a Die uitdrukking “vaderlose seun” kom ongeveer 40 keer in die Bybel voor. Hoewel die Hebreeuse woord wat so vertaal word, in die manlike vorm is, moet ons nie dink dat die basiese beginsels van sulke stellings meisies uitsluit wat ’n pa verloor het nie. Die Mosaïese Wet het ook die regte van vaderlose meisies gehandhaaf.—Numeri 27:1-8.