Toon liefdevolle belangstelling in “vaderlose seuns”
1 Jehovah is “’n vader van vaderlose seuns” (Ps. 68:5). Sy besorgdheid oor hulle welsyn word weerspieël in dié gebod wat hy aan die eertydse nasie Israel gegee het: “Julle mag geen weduwee of vaderlose seun verdruk nie. As jy hom hoegenaamd verdruk, dan sal ek, as hy enigsins tot my roep, sy geroep sekerlik hoor” (Eks. 22:22, 23). God se Wet het ook ’n reëling ingesluit om in die materiële behoeftes van sulke persone te voorsien (Deut. 24:19-21). Onder die Christelike reëling word ware aanbidders aangespoor “om na wese en weduwees in hulle verdrukking om te sien” (Jak. 1:27). Hoe kan ons soos Jehovah liefdevolle belangstelling toon in diegene wat in enkelouergesinne of godsdienstig verdeelde gesinne grootword?
2 Geestelike opleiding: As jy ’n enkelouer is of ’n ongelowige huweliksmaat het, kan dit ’n uitdaging wees om ’n gereelde tuisbybelstudie met jou kinders te hou. Maar ’n gereelde en sinvolle Bybelstudie is noodsaaklik as jy wil hê dat hulle gebalanseerde, ryp volwassenes moet word (Spr. 22:6). Dit is ook baie belangrik om daagliks met hulle oor geestelike dinge te gesels (Deut. 6:6-9). Soms sal jy dalk mismoedig voel, maar moenie moed opgee nie. Wend jou tot Jehovah om krag en leiding terwyl jy ‘aanhou om jou kinders in die dissipline en verstandsregulering van Jehovah op te voed’.—Ef. 6:4.
3 As jy hulp nodig het om jou skriftuurlike verantwoordelikhede na te kom, moet jy die ouer manne laat weet. Hulle sal dalk praktiese wenke kan gee of jou kan help om ’n goeie geestelike roetine vir jou huisgesin uit te werk.
4 Hoe ander kan help: In die eerste eeu het Timoteus ’n ywerige kneg van Jehovah geword al het hy in ’n godsdienstig verdeelde huis grootgeword. Die ywerige pogings van sy ma en ouma om hom van kleins af die heilige geskrifte te leer, het ongetwyfeld baie hiermee te doen gehad (Hand. 16:1, 2; 2 Tim. 1:5; 3:15). Maar hy het ook baat gevind by omgang met ander Christene, waaronder die apostel Paulus, wat na Timoteus verwys het as sy “geliefde en getroue kind in die Here”.—1 Kor. 4:17.
5 Hoe voordelig is dit tog vandag ook as geestelik volwasse broers en susters liefdevolle belangstelling in die vaderlose seuns en dogters in die gemeente toon! Ken jy elkeen se naam? Gesels jy met hulle by die Christelike vergaderinge en by ander geleenthede? Nooi hulle om saam met jou velddiens te doen. Moontlik kan jy hulle, saam met hulle enkel- of gelowige ouer, nou en dan by julle gesinstudie of by reëlings vir heilsame ontspanning insluit. Wanneer hierdie jongmense jou as hulle vriend beskou, sal hulle meer geneig wees om jou voorbeeld en aanmoediging ter harte te neem.—Fil. 2:4.
6 Jehovah stel intens belang in vaderlose seuns en dogters, en hy seën ons liefdevolle pogings om hulle te help om die waarheid hulle eie te maak. Baie wat in enkelouergesinne of verdeelde huise grootgeword het, het sulke aanmoediging ontvang en dien nou getrou as pioniers, bedieningsknegte, ouer manne, reisende opsieners, sendelinge of lede van die Bethelgesin. Mag ons almal na maniere soek om ‘verruim te word’ in ons liefde vir vaderlose kinders, in navolging van ons hemelse Vader.—2 Kor. 6:11-13.