’n Gesprek met ’n buurman—Wat is die heilige gees?

JEHOVAH SE GETUIES geniet dit om die Bybel met ander mense te bespreek. Is daar ’n spesifieke Bybelvraag waaroor jy al gewonder het? Is daar enige van die opvattings of godsdiensgebruike van Jehovah se Getuies waarvan jy meer wil weet? Moet dan nie huiwer om daaroor te vra die volgende keer dat jy ’n Getuie teëkom nie. Hy of sy sal dit graag met jou bespreek.

Hier volg ’n tipiese gesprek tussen een van Jehovah se Getuies en ’n buurman. Kom ons stel ons voor dat ’n Getuie met die naam Johan besoek aflê by die huis van ’n man met die naam André.

Wat bedoel jy met “heilige gees”?

André: Ek het gehoor dat Jehovah se Getuies nie Christene is nie. Julle glo nie aan die heilige gees nie.

Johan: Laat ek jou eerstens verseker dat ons wel Christene is. Dit is my geloof in Jesus Christus wat my vanoggend na jou deur laat kom het. Hy is immers die Een wat sy volgelinge beveel om te preek. Maar sê my, presies wat bedoel jy met “heilige gees”?

André: Ek bedoel die heilige gees, die derde persoon in die Drie-eenheid, die helper wat Jesus belowe het om vir ons te stuur. Hierdie helper is vir my baie belangrik. Ek wil die werking van die heilige gees in my lewe voel.

Johan: Dit is hoe baie mense die heilige gees verstaan. Ek het ’n ruk gelede die geleentheid gehad om te ondersoek wat die Bybel oor hierdie onderwerp leer. As jy ’n paar minute het, sal ek graag vir jou wys wat ek geleer het.

André: Ja, ek het ’n paar minute.

Johan: Terloops, my naam is Johan, en joune?

André: André. Aangename kennis.

Johan: Aangename kennis, André. Om nie te veel van jou tyd in beslag te neem nie, wil ek op net een aspek van hierdie onderwerp konsentreer. Jy het gesê dat die heilige gees die helper is wat Jesus ons belowe het. Ek stem saam. Maar is dit jou mening dat die heilige gees ’n persoon is, wat gelyk is aan God?

André: Ja, dit is wat ek geleer is.

Is die heilige gees ’n persoon?

Johan: Kom ons kyk na ’n Skrifgedeelte wat ons sal help om vas te stel of die heilige gees ’n persoon is of nie. Jy ken dalk hierdie verse. In Handelinge 2:1-4 lees ons: “In die loop van die dag van die Pinksterfees was hulle almal op dieselfde plek bymekaar, en skielik het daar ’n gedruis uit die hemel gekom soos dié van ’n voortstuwende, stywe bries, en dit het die hele huis gevul waarin hulle gesit het. En tonge soos van vuur het vir hulle sigbaar geword en is verdeel, en een het op elkeen van hulle gaan sit, en hulle is almal met heilige gees vervul en het in ander tale begin praat, net soos die gees aan hulle gegee het om te spreek.”

André: Ja, ek ken die verslag.

Johan: Wel, André, kan een persoon met ’n ander persoon vervul word?

André: Natuurlik nie.

Johan: Kom ons gaan ’n bietjie verder in dieselfde hoofstuk, na vers 17. Die eerste deel van die vers sê: “‘In die laaste dae’, sê God, ‘sal ek van my gees op elke soort vlees uitstort.’” André, sou jy sê dat God ’n deel kan uitstort van ’n God wat aan hom gelyk is?

André: Nee.

Johan: Johannes die Doper het ’n ander beskrywing gegee van hoe mense met die heilige gees vervul word. Dit is in Matteus 3:11. Gee jy om om hierdie vers te lees?

André: “Ek doop julle wel met water weens julle berou; maar die een wat ná my kom, is sterker as ek, wie se sandale ek nie werd is om uit te trek nie. Hy sal julle met heilige gees en met vuur doop.”

Johan: Dankie. Het jy opgelet wat Johannes die Doper gesê het met die heilige gees gedoen sou word?

André: Hy het gesê dat mense met heilige gees gedoop sou word.

Johan: Dis reg. Let op dat hy ook gesê het dat mense met vuur gedoop sou word. Dit is voor die hand liggend dat vuur nie ’n persoon is nie. Dink jy hierdie vers sê dat heilige gees wel ’n persoon is?

André: Nee.

Johan: Volgens die tekste wat ons gelees het, is die heilige gees dus nie ’n persoon nie.

André: Dit lyk nie so nie.

In watter sin ’n “helper”?

Johan: Maar jy het vroeër die term “helper” gebruik. Jesus het in Johannes 14:26 na die heilige gees verwys as ’n “helper”. Kom ons lees dit saam: “Die helper, die heilige gees, wat die Vader in my naam sal stuur, dié sal julle alles leer en julle herinner aan alles wat ek julle vertel het.” Party dink dat hierdie teks die idee ondersteun dat die heilige gees ’n persoon is, iemand wat mense sal help en leer.

André: Ja, dis hoe ek dit nog altyd verstaan het.

Johan: Maar is dit moontlik dat Jesus dalk beeldspraak gebruik het? Let nou op wat Jesus in Lukas 7:35 oor wysheid gesê het: “Nietemin, die wysheid word deur al sy kinders geregverdig.” Sou jy sê dat wysheid ’n persoon is, dat dit werklik kinders het?

André: Nee. Hy gebruik beslis beeldspraak hier.

Johan: Ek stem saam. Jesus se punt is dat wysheid gesien word aan resultate. Die Bybel gebruik ’n vorm van beeldspraak wat verpersoonliking genoem word—dit wil sê, dit praat van iets wat leweloos is asof dit lewendig is. Ons gebruik dikwels sulke beeldspraak in ons eie gesprekke. Op hierdie pragtige oggend sal dit byvoorbeeld heel natuurlik wees vir iemand om te sê: “Trek die gordyne oop sodat die son kan inkom”, nie waar nie?

André: Ek sou dit self sê.

Johan: En sou jy na die son verwys as ’n persoon wat as ’n gas in jou huis inkom?

André: Nee, natuurlik nie. Dis net ’n manier van praat.

Johan: Is dit dan moontlik dat Jesus, toe hy van die heilige gees as ’n helper, of onderrigter, gepraat het, beeldspraak gebruik het?

André: Ek veronderstel so. Dit sal ooreenstem met die tekste wat jy gelees het oor die heilige gees wat uitgestort word en mense wat daarmee gedoop word. Maar as die heilige gees nie ’n persoon is nie, wat is dit dan?

Wat is die heilige gees?

Johan: Jesus vertel vir ons in Handelinge 1:8 wat die heilige gees is. Sal jy dit asseblief lees?

André: “Julle sal krag ontvang wanneer die heilige gees op julle kom, en julle sal getuies van my wees in Jerusalem sowel as in die hele Judea en Samaria en tot in die mees afgeleë deel van die aarde.”

Johan: Let op dat Jesus die heilige gees met krag verbind. En as jy dink aan die verse wat ons reeds gelees het, waar sou jy sê kom hierdie krag vandaan?

André: Van God die Vader.

Johan: Dis reg. Die heilige gees is dieselfde krag wat God gebruik het om die heelal te skep. Die tweede vers in die Bybel verwys hierna. Genesis 1:2 sê: “God se werkende krag het heen en weer oor die oppervlak van die waters beweeg.” Die Hebreeuse woord wat hier met “werkende krag” vertaal word, word ook met “gees” vertaal. Dit is die onsigbare werkende krag deur middel waarvan God sy voorneme volbring en sy wil openbaar. Kom ons kyk na nog net een teks. Dit is Lukas 11:13. Sal jy asseblief hierdie vers lees?

André: “As julle, hoewel julle goddeloos is, dan weet hoe om goeie gawes aan julle kinders te gee, hoeveel te meer sal die Vader in die hemel heilige gees gee aan dié wat hom vra!”

Johan: As die Vader in die hemel beheer het oor die heilige gees en dit gee aan dié wat hom daarvoor vra, kan die heilige gees dan gelyk wees aan die Vader?

André: Nee. Ek sien jou punt.

Johan: Ek wil jou nie langer ophou nie, André. Jy het gesê dat jy net ’n paar minute het. Maar laat ek jou ’n vraag vra om ons bespreking op te som. Wat sou jy sê is die heilige gees na aanleiding van die tekste wat ons gelees het?

André: God se werkende krag.

Johan: Dis reg. En toe Jesus in Johannes 14:26 van die heilige gees as ’n helper, of onderrigter, gepraat het, het hy ’n vorm van beeldspraak gebruik wat verpersoonliking genoem word.

André: Ek het dit nooit geweet nie.

Johan: Ons kan iets baie gerusstellends uit Jesus se woorde leer.

André: Wat is dit?

Johan: Ons kan God vir sy heilige gees vra om ons in moeilike omstandighede te help. Ons kan ook vir sy gees vra om ons te help om die waarheid oor hom te leer.

André: Dis interessant. Ek sal daaroor moet dink.

Johan: Voordat ek gaan, wil ek jou nog iets gee om aan te dink. Aangesien die heilige gees God se werkende krag is, sal jy sekerlik saamstem dat God dit kan gebruik om enigiets te doen wat hy verlang.

André: Beslis.

Johan: Waarom het hy dan nie hierdie onbeperkte krag gebruik om ’n einde te maak aan al die lyding en goddeloosheid wat ons vandag in die wêreld sien nie? Het jy al ooit hieroor gewonder?a

André: Ja, ek het nogal.

Johan: Kan ek volgende week dieselfde tyd terugkom en dan bespreek ons dit?

André: Ja, ek sal bly wees. Sien jou dan.

[Voetnoot]