Geheim 1

Wees lief vir mense, nie vir geld en besittings nie

WAT LEER DIE BYBEL? “Die liefde vir geld is ’n wortel van allerhande skadelike dinge.”—1 Timoteus 6:10.

WAT IS DIE UITDAGING? Adverteerders oefen druk op ons uit om onvergenoeg te wees met wat ons het. Hulle wil hê dat ons ons moet afsloof om geld te kry sodat ons nuwer, beter, groter items kan koop. Geld is verloklik, en ons kan maklik daarop verlief raak. Maar die Bybel waarsku dat iemand wat rykdom liefhet, nooit vergenoeg sal wees nie. “Iemand wat silwer liefhet, sal nie genoeg kry van silwer nie, ook nie iemand wat rykdom liefhet, van inkomste nie”, het koning Salomo geskryf.—Prediker 5:10.

WAT KAN JY DOEN? Volg Jesus na, en leer om liewer te wees vir mense as vir dinge. Jesus was bereid om alles wat hy gehad het—selfs sy lewe—prys te gee weens sy liefde vir mense (Johannes 15:13). Hy het gesê: “Dit verskaf groter geluk om te gee as om te ontvang” (Handelinge 20:35). As ons dit ’n gewoonte maak om vir ander van ons tyd en middele te gee, sal mense dit ook vir ons doen. “Gee altyddeur”, het Jesus gesê, “en mense sal vir julle gee” (Lukas 6:38). Diegene wat geld en besittings najaag, bring baie pyn en lyding oor hulleself (1 Timoteus 6:9, 10). Daarenteen bring dit ware vergenoegdheid mee wanneer ons liefde gee en ontvang.

Kyk gerus of jy jou lewe kan vereenvoudig. Kan jy jou besittings verminder of minder besittings probeer bekom? As jy dit doen, sal jy moontlik vind dat jy meer tyd en energie het vir die belangriker dinge in die lewe—om mense te help en God te dien, wat jou alles gegee het wat jy het.—Matteus 6:24; Handelinge 17:28.

[Prent op bladsy 4]

“Gee altyddeur, en mense sal vir julle gee”