Het jy geweet?

Wie was die “wyse manne” wat die baba Jesus kom besoek het?

▪ Volgens die verslag van Jesus se geboorte in die Evangelie van Matteus het besoekers uit “oostelike streke” wat die ster van ’n nuwe koning gesien het, vir die jong Jesus geskenke gegee. Die Griekse teks van die Evangelie noem hierdie besoekers maʹgoï, dit wil sê “magiërs”, of “wyse manne” (Matteus 2:1, voetnoot in NW; Ou Afrikaanse Bybelvertaling). Wat weet ons van hulle?

Die vroegste wesenlike inligtingsbron oor hierdie magiërs is die Griekse geskiedskrywer Herodotus. Volgens Herodotus, wat in die vyfde eeu VHJ gelewe het, het die magiërs tot ’n Persiese priesterlike klas behoort wat in sterrewiggelary, die uitlegging van drome asook towerspreuke gespesialiseer het. In Herodotus se tyd was Zoroastrisme die godsdiens van Persië. Die magiërs was dus waarskynlik Zoroastristiese priesters. “In ’n algemener sin”, sê The International Standard Bible Encyclopedia, “het ’n mágos in die Hellenistiese wêreld bonatuurlike kennis en vermoëns gehad en was hy soms ’n towenaar.”

’n Aantal vroeë “Christelike” kommentators, soos Justinus die Martelaar, Origines en Tertullianus, het die magiërs wat Jesus besoek het, as sterrewiggelaars beskryf. In sy boek On Idolatry het Tertullianus byvoorbeeld geskryf: “Ons weet dat daar ’n onderlinge verband tussen toordery en sterrewiggelary bestaan. Die sterrewiggelaars was dus die eerstes wat . . . vir Hom [Jesus] ‘geskenke’ gegee het.” In ooreenstemming met hierdie begrip gee baie Bybelvertalings maʹgoï as “sterrewiggelaars” weer.

Waarom het Matteus woorde uit die boek Sagaria aan die profeet Jeremia toegeskryf?

▪ Die betrokke Skrifgedeelte word in Matteus 27:9, 10 gevind, waar die Evangelieskrywer praat van die geld wat aan Judas Iskariot gegee is om Jesus te verraai. Die verse sê: “Toe is vervul wat gespreek is deur middel van die profeet Jeremia, wat gesê het: ‘En hulle het die dertig silwerstukke geneem, die prys van die man vir wie ’n prys vasgestel is, . . . en hulle het dit vir die pottebakker se stuk grond gegee.’” Die bron van die profesie oor die 30 silwerstukke is Sagaria, nie Jeremia nie.—Sagaria 11:12, 13.

Blykbaar is Jeremia, in plaas van Jesaja, soms eerste geplaas in die versameling boeke wat “die Profete” genoem word (Matteus 22:40). Toe Matteus dus hier van “Jeremia” gepraat het, het hy verwys na ’n hele deel van die Skrif wat na die naam van die eerste boek genoem is. Hierdie deel van die Skrif het Sagaria ingesluit. Jesus het eweneens etlike Bybelboeke wat as die Geskrifte bekend gestaan het, “Psalms” genoem. Toe hy dus gesê het dat alles vervul moet word wat “in die wet van Moses en in die Profete en Psalms” oor hom geskryf is, het hy na al die profesieë in die Hebreeuse Geskrifte verwys.—Lukas 24:44.