Weerstaan jy die gees van die wêreld?
“Ons het . . . nie die gees van die wêreld ontvang nie, maar die Gees wat uit God is.”—1 KORINTHIËRS 2:12.
1, 2. Watter tragedie wat deur giftige gas veroorsaak is, het in Bhopal, Indië, plaasgevind, maar watter dodeliker “gas” word wêreldwyd ingeasem?
OP ’N koel Desembernag in 1984 het iets skokkends in Bhopal, Indië, gebeur. In dié stad is daar ’n chemikalie-aanleg, en op daardie Desembernag het ’n klep in een van die gasopgaartenks onklaar geraak. Skielik het tonne metiel-isosianaat in die lug begin ontsnap. Hierdie dodelike gas is deur die wind tot in die huise en oor slapende gesinne gewaai. Duisende het omgekom, en talle ander is fisies geskend. Dit was die ergste nywerheidsongeluk tot op daardie tydstip.
2 Mense was bedroef toe hulle van Bhopal gehoor het. Maar hoewel daardie ongeluk so noodlottig was, het veel minder omgekom as gevolg van die gas wat daar ontsnap het as die aantal mense wat geestelik omkom as gevolg van ’n “gas” wat mense elke dag wêreldwyd inasem. Die Bybel noem dit “die gees van die wêreld”. Dit is daardie dodelike atmosfeer wat die apostel Paulus gekontrasteer het met die gees wat uit God is toe hy gesê het: “Ons het ewenwel nie die gees van die wêreld ontvang nie, maar die Gees wat uit God is, sodat ons kan weet wat God ons uit genade geskenk het.”—1 Korinthiërs 2:12.
3. Wat is “die gees van die wêreld”?
3 Wat presies is “die gees van die wêreld”? Volgens The New Thayer’s Greek English Lexicon of the New Testament beteken die woord “gees” (Grieks, pneuʹma) in ’n breë sin “die gesindheid of invloed wat die siel van elke persoon vervul en oorheers”. ’n Mens kan ’n goeie of ’n slegte gees, of gesindheid, hê (Psalm 51:12; 2 Timotheüs 4:22). ’n Groep mense kan ook ’n gees, of oorheersende gesindheid, hê. Die apostel Paulus het aan sy vriend Filemon geskryf: “Die genade van onse Here Jesus Christus sy met julle gees!” (Filemon 25). Die wêreld oor die algemeen het eweneens—maar op ’n veel groter skaal—’n oorheersende gesindheid, en dít is “die gees van die wêreld” waarna Paulus verwys het. Volgens Vincent se Word Studies in the New Testament “verwys die frase na die element van boosheid wat die onboetvaardige wêreld aandryf”. Dit is die sondige neiging wat hierdie wêreld se denke oorheers en ’n kragtige invloed op mense se optrede uitoefen.
4. Wie is die bron van die gees van die wêreld, en watter uitwerking het hierdie gees op mense?
4 Hierdie gees is giftig. Waarom? Omdat dit van “die owerste van hierdie wêreld”, Satan, afkomstig is. Daar word tereg van hom gepraat as “die owerste van die mag van die lug, van die gees wat nou in die kinders van die ongehoorsaamheid werk” (Johannes 12:31; Efesiërs 2:2). Dit is moeilik om hierdie “lug”, of “gees wat nou in die kinders van die ongehoorsaamheid werk”, te vermy. Dit kom oral in die mensegemeenskap voor. As ons dit inasem, begin ons die gesindhede, die doelwitte, daarvan aanneem. Die gees van die wêreld spoor ons aan om ‘na die vlees te lewe’, met ander woorde, in ooreenstemming met ons sondige onvolmaaktheid. Dit is dodelik, “want as julle na die vlees lewe, sal julle sterwe”.—Romeine 8:13.
Hoe om hierdie wêreld se gees te vermy
5. Hoe het een Getuie verstandig tydens die ramp in Bhopal opgetree?
5 Tydens die ramp in Bhopal het een Getuie van Jehovah as gevolg van die sirenes en die skerp reuk van die giftige gas wakker geskrik. Hy het dadelik sy gesin wakker gemaak en hulle vinnig in die straat ingeneem. Hy het net ’n oomblik stilgestaan om die windrigting te bepaal en toe deur die malende menigtes gebeur en sy gesin na die top van ’n heuwel buitekant die stad gelei. Daar kon hulle hulle longe met vars, skoon lug vul wat van ’n nabygeleë meer aangewaai is.
6. Waarheen kan ons gaan om van die gees van die wêreld af weg te kom?
6 Is daar ’n verhewe plek waarheen ons kan gaan om van die giftige “lug” van hierdie wêreld af weg te kom? Die Bybel sê daar is so ’n plek. Die profeet Jesaja het met betrekking tot ons dag voorspel en geskryf: “Aan die einde van die dae sal die berg van die huis van die HERE vasstaan op die top van die berge en verhewe wees bo die heuwels, en al die nasies sal daarheen toestroom. En baie volke sal heengaan en sê: Kom laat ons optrek na die berg van die HERE, na die huis van die God van Jakob, dat Hy ons sy weë kan leer en ons in sy paaie kan wandel. Want uit Sion sal die wet uitgaan en die woord van die HERE uit Jerusalem” (Jesaja 2:2, 3). Die verhewe plek van ware aanbidding, die verhewe “berg van die huis van die HERE”, is die enigste plek op hierdie planeet wat vry is van die verstikkende, giftige gees van hierdie wêreld. Daar vloei die gees van Jehovah vryelik onder getroue Christene.
7. Hoe is baie al van die gees van die wêreld gered?
7 Baie wat voorheen die gees van hierdie wêreld ingeasem het, geniet nou verligting soortgelyk aan dié wat daardie Getuie in Bhopal ondervind het. Nadat die apostel Paulus van “die kinders van die ongehoorsaamheid” gepraat het wat die lug, of gees, van hierdie wêreld inasem, sê hy: “Onder wie ons almal ook vroeër gewandel het in die begeerlikhede van ons vlees toe ons die wil van die vlees en van die sinne gedoen het; en ons was van nature kinders van die toorn net soos ook die ander. Maar God, wat ryk is in barmhartigheid, het ons deur sy grote liefde waarmee Hy ons liefgehad het . . . lewend gemaak saam met Christus” (Efesiërs 2:3-5). Diegene wat niks anders as die vergiftigde lug van hierdie stelsel van dinge inasem nie, is dood in ’n geestelike sin. Maar danksy Jehovah vlug miljoene vandag na die geestelike verhewe grond en ontvlug hulle daardie dodelike toestand.
Maniere waarop “die gees van die wêreld” geopenbaar word
8, 9. (a) Wat toon dat ons voortdurend teen die gees van die wêreld moet waak? (b) Hoe kan Satan se gees ’n verderflike invloed op ons hê?
8 Satan se dodelike lug is steeds oral om ons. Ons moet op ons hoede wees en nooit afwaarts begin dwaal en terug in die wêreld beland waar ons dalk geestelik kan verstik nie. Dit verg voortdurende waaksaamheid (Lukas 21:36; 1 Korinthiërs 16:13). Beskou byvoorbeeld die volgende feit. Alle Christene weet wat Jehovah se standaarde ten opsigte van sedelikheid is en sou nooit saamstem dat onreine gebruike soos owerspel, hoerery en homoseksualiteit aanvaarbaar is nie. Nogtans word ongeveer 40 000 persone elke jaar uit Jehovah se organisasie gesit. Waarom? In baie gevalle is dit juis as gevolg van hierdie onreine gebruike. Hoe kan so iets gebeur?
9 Dit gebeur omdat ons almal onvolmaak is. Die vlees is swak en ons moet voortdurend stry teen verkeerde neigings wat in ons hart opkom (Prediker 7:20; Jeremia 17:9). Maar daardie verkeerde neigings word deur die gees van hierdie wêreld gevoed. Baie in hierdie wêreld dink nie dat onsedelikheid verkeerd is nie, en die beskouing dat alles geoorloof is, is ’n deel van die geestesgesindheid van Satan se stelsel van dinge. As ons ons aan sulke denke blootstel, is die kanse ongetwyfeld groot dat ons soos die wêreld sal begin dink. Kort voor lank kan sulke onreine gedagtes verkeerde begeertes voortbring wat tot ernstige sonde aanleiding sal gee (Jakobus 1:14, 15). Ons sal dan van die berg van Jehovah se ware aanbidding afgedwaal het tot onder in die besmette laagtes van Satan se wêreld. Enigiemand wat gewillig daar bly, sal nie die ewige lewe beërwe nie.—Efesiërs 5:3-5, 7.
10. Wat is een manier waarop Satan se lug geopenbaar word, en waarom moet Christene dit vermy?
10 Die gees van die wêreld is oral om ons te sien. Daar is byvoorbeeld die ligsinnige, sarkastiese benadering wat baie teenoor die lewe het. Omdat hulle deur korrupte of onbevoegde politici en deur onsedelike, hebsugtige godsdiensleiers ontnugter is, praat hulle selfs van ernstige sake op ’n oneerbiedige wyse. Christene moet hierdie neiging weerstaan. Hoewel daar niks verkeerd is met ’n gesonde sin vir humor nie, moet ons dit vermy om ’n sarkastiese gees van oneerbiedigheid in die gemeente in te bring. ’n Christen se spraak moet vrees vir Jehovah en reinheid van hart weerspieël. (Jakobus 3:10, 11; vergelyk Spreuke 6:14.) Of ons nou oud of jonk is, ons spraak moet “altyd aangenaam wees, met sout besprinkel, sodat [ons] kan weet hoe [ons] iedereen moet antwoord”.—Kolossense 4:6.
11. (a) Wat is ’n tweede aspek van die gees van die wêreld? (b) Waarom is Christene anders as diegene wat hierdie aspek weerspieël?
11 Nog ’n algemene neiging waarin die gees van hierdie wêreld weerspieël word, is haat. Die wêreld word uitmekaargeskeur deur haat en vetes wat op rasse-, etniese, nasionale en selfs persoonlike verskille gegrond is. Hoeveel beter is toestande tog waar God se gees aan die werk is! Die apostel Paulus het geskryf: “Vergeld niemand kwaad vir kwaad nie; bedink wat goed is voor alle mense; as dit moontlik is, sover as dit van julle afhang, leef in vrede met alle mense. Moenie julle wreek nie, geliefdes, maar gee plek vir die toorn; want daar is geskrywe: Aan My kom die wraak toe, Ek sal vergeld, spreek die Here. As jou vyand dan honger het, gee hom iets om te eet; as hy dors het, gee hom iets om te drink, want sodoende sal jy op sy hoof vurige kole ophoop. Laat jou nie deur die kwaad oorwin nie, maar oorwin die kwaad deur die goeie.”—Romeine 12:17-21.
12. Waarom vermy Christene materialisme?
12 Die gees van hierdie wêreld bevorder ook materialisme. Baie is, as gevolg van die aansporing wat die handelswêreld gee, behep met die nuutste toestelle, die jongste modes, die nuutste modelle motors. Hulle is slawe van “die begeerlikheid van die oë” (1 Johannes 2:16). Die meeste mense meet hulle sukses in die lewe aan die grootte van hulle huis of aan hulle banksaldo. Christene, wat skoon geestelike lug op die verhewe berg van Jehovah se reine aanbidding inasem, weerstaan hierdie neiging. Hulle weet dat ’n meedoënlose najaging van materiële dinge tot hulle ondergang kan lei (1 Timotheüs 6:9, 10). Jesus het sy dissipels aan die volgende herinner: “Iemand se lewe bestaan nie uit die oorvloed van sy besittings nie.”—Lukas 12:15.
13. Op watter ander maniere word die gees van hierdie wêreld geopenbaar?
13 Daar is ander maniere waarop die gevaarlike “lug” van hierdie wêreld geopenbaar word. Een van hulle is die gees van opstandigheid (2 Timotheüs 3:1-3). Het jy agtergekom dat baie mense hulle nie meer aan gesag onderwerp nie? Het jy al by jou sekulêre werk gesien hoe baie mense nie werk tensy iemand hulle dophou nie? Hoeveel mense ken jy wat al wette oortree het—deur dalk oneerlik oor hulle belasting te wees of iets by die werk te steel? Het jy, as jy nog op skool is, al gevoel dat dit beter is om nie jou bes te doen nie omdat jou klasmaats neersien op dié wat akademies goed presteer? Dit is alles aspekte van die gees van die wêreld wat Christene moet weerstaan.
Hoe om hierdie wêreld se gees te weerstaan
14. In watter opsigte verskil Christene van nie-Christene?
14 Maar hoe kan ons die gees van die wêreld weerstaan wanneer ons in die wêreld lewe? Ons moet onthou dat ons geestelik gesproke geen deel van die wêreld is nie, ongeag waar ons ons fisies bevind (Johannes 17:15, 16). Ons doelwitte is nie dieselfde as hierdie wêreld se doelwitte nie. Ons het ’n ander beskouing van sake. Ons is geestelike mense, wat praat en dink “nie met woorde wat die menslike wysheid leer nie, maar met dié wat die Heilige Gees leer, sodat ons geestelike dinge met geestelike vergelyk”.—1 Korinthiërs 2:13.
15. Hoe kan ons die gees van die wêreld weerstaan?
15 Wat kan ’n persoon doen as hy hom in ’n gebied bevind wat met giftige gas besoedel is? Hy kan óf ’n gasmasker opsit wat aan ’n bron van skoon lug gekoppel is, óf hy kan fisies die gebied verlaat. As ons Satan se lug wil vermy, moet ons ’n kombinasie van hierdie metodes gebruik. Ons probeer so ver moontlik van enigiets wegbly waardeur die gees van die wêreld ons denke kan beïnvloed. Daarom vermy ons verkeerde omgang en stel ons ons nie bloot aan enige vermaak wat geweld, onsedelikheid, spiritisme, opstandigheid of enige ander werke van die vlees bevorder nie (Galasiërs 5:19-21). Aangesien ons in hierdie wêreld lewe, kan ons dit egter nie heeltemal verhoed dat ons aan hierdie dinge blootgestel word nie. Daarom tree ons verstandig op as ons ons aan ’n bron van geestelike vars lug koppel. Ons vul as ’t ware ons geestelike longe deur gereelde vergaderingbywoning, persoonlike studie, Christelike bedrywighede en omgang sowel as gebed. As ons dit doen en ons dalk van Satan se lug in ons geestelike longe kry, gee God se gees ons die krag om dit te verwerp.—Psalm 17:1-3; Spreuke 9:9; 13:20; 19:20; 22:17.
16. Hoe toon ons dat ons God se gees het?
16 God se gees verander ’n Christen in iemand wat merkbaar anders is as diegene wat ’n deel van hierdie wêreld is (Romeine 12:1, 2). Paulus het gesê: “Die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing. Teen sulke dinge is die wet nie” (Galasiërs 5:22, 23). God se gees gee ’n Christen ook ’n dieper begrip van sake. Paulus het gesê: “So ook ken niemand die verborge dinge van God nie, behalwe die Gees van God” (1 Korinthiërs 2:11, NAV). “Die verborge dinge van God” verwys in die algemeen na waarhede soos die losprysoffer, God se Koninkryk onder Jesus Christus, die hoop op die ewige lewe en die naderende vernietiging van hierdie goddelose wêreld. Met behulp van God se gees ken en aanvaar Christene hierdie leringe as die waarheid, en hulle het gevolglik ’n ander lewensbeskouing as mense van die wêreld. Hulle is tevrede om vreugde te put uit hulle huidige diens aan Jehovah, met die vooruitsig om hom tot in ewigheid te dien.
17. Wie het ’n voortreflike voorbeeld daarin gestel om die gees van die wêreld te weerstaan, en hoe?
17 Jesus het ’n voortreflike voorbeeld gestel vir diegene wat die gees van hierdie wêreld weerstaan. Kort nadat Jesus gedoop is, het Satan hom sover probeer kry om van sy diens aan Jehovah af te sien deur hom drie keer te versoek (Mattheüs 4:1-11). Met die laaste versoeking is Jesus die geleentheid gebied om oor die hele wêreld te regeer as hy net een daad van aanbidding teenoor Satan sou verrig. Jesus kon geredeneer het: ‘Wel, ek sal die daad van aanbidding verrig, en dan sal ek, nadat ek die heerskappy oor die wêreld verkry het, berou toon en Jehovah weer aanbid. As ’n wêreldheerser sal ek in ’n baie beter posisie wees om die mensdom te bevoordeel as wat ek nou as ’n timmerman van Nasaret is.’ Jesus het nie so geredeneer nie. Hy was bereid om te wag totdat Jehovah hom wêreldheerskappy gee (Psalm 2:8). Hy het by daardie geleentheid en by alle ander geleenthede in sy lewe die giftige invloed van Satan se lug weerstaan. Hy het sodoende hierdie geestelik besoedelde wêreld oorwin.—Johannes 16:33.
18. Hoe verheerlik dit God as ons die gees van die wêreld weerstaan?
18 Die apostel Petrus het gesê dat ons Jesus se voetstappe noukeurig moet navolg (1 Petrus 2:21, vgl. NW). Daar is geen beter voorbeeld as hy nie, nie waar nie? Gedurende hierdie laaste dae sink mense, onder die invloed van die gees van die wêreld, al hoe dieper in die verdorwenheid in. Hoe wonderlik is dit tog dat die verhewe plek van Jehovah se aanbidding rein en skoon bo so ’n wêreld uittroon! (Miga 4:1, 2). Die kragtige werking van God se gees kan ongetwyfeld duidelik gesien word uit die feit dat miljoene na God se plek van aanbidding opstroom, die aldeurdringende gees van hierdie wêreld weerstaan en Jehovah vereer en verheerlik! (1 Petrus 2:11, 12). Mag ons almal vasbeslote wees om in daardie verhewe plek te bly totdat Jehovah se gesalfde Koning hierdie goddelose wêreld uit die weg ruim en Satan die Duiwel en sy demone in die afgrond werp (Openbaring 19:19–20:3). Dan sal die gees van hierdie wêreld nie meer bestaan nie. Wat ’n geseënde tyd sal dit tog wees!
Kan jy verduidelik?
◻ Wat is die gees van die wêreld?
◻ Watter uitwerking het die gees van hierdie wêreld op mense?
◻ Wat is van die maniere waarop die gees van die wêreld geopenbaar word, en hoe kan ons dit vermy?
◻ Hoe toon ons dat ons God se gees het?
◻ Watter seëninge geniet diegene wat die gees van die wêreld weerstaan?
[Prent op bladsy 16, 17]
Die gees van die wêreld is van Satan afkomstig
As ons die gees van die wêreld wil vermy, moet ons na Jehovah se verhewe plek van aanbidding vlug