Het Abraham werklik kamele besit?

KAMELE was van die diere wat Abraham van Farao ontvang het, sê die Bybel (Gen. 12:16). Toe Abraham se kneg ’n lang reis na Mesopotamië onderneem het, het hy “tien kamele van die kamele van sy heer geneem”. Die Bybel sê dus uitdruklik dat Abraham omstreeks die begin van die tweede millennium VHJ kamele besit het.—Gen. 24:10.

Party aanvaar dit nie. Die New International Version Archaeological Study Bible sê: “Geleerdes het die historiese egtheid van hierdie verwysings na kamele betwis omdat die meeste glo dat hierdie diere eers omstreeks 1200 v.C., lank ná die tyd van Abraham, op groot skaal getem is.” Enige vroeëre Bybelse verwysing na kamele word dus beskou as ’n anachronisme, of iets wat chronologies uit sy plek is.

Ander geleerdes voer egter aan dat, hoewel die tem van kamele omstreeks die einde van die tweede millennium ’n belangrike faktor geword het, dit nie beteken dat kamele nie vroeër gebruik is nie. Die boek Civilizations of the Ancient Near East sê: “Onlangse navorsing dui daarop dat kamele die een of ander tyd in die derde millennium [VHJ] in die suidooste van Arabië getem is. Hierdie dier is waarskynlik eers vir sy melk, hare, leer en vleis geteel, maar dit was sekerlik nie lank voordat dit duidelik geword het dat dit ’n nuttige lasdier is nie.” Die datering tot voor Abraham se tyd word blykbaar gestaaf deur stukkies been en ander argeologiese oorblyfsels.

Daar bestaan ook geskrewe bewyse. Dieselfde naslaanwerk sê: “In Mesopotamië word die dier [die kameel] in spykerskriflyste gemeld en op etlike seëls uitgebeeld, wat toon dat hierdie dier Mesopotamië moontlik teen die begin van die tweede millennium bereik het”, dit wil sê teen Abraham se tyd.

Party geleerdes glo dat Suid-Arabiese koopmanne in die reukwerkhandel kamele gebruik het om hulle goedere noordwaarts deur die woestyn na plekke soos Egipte en Sirië te vervoer en sodoende kamele aan hierdie gebiede bekend gestel het. Die reukwerkhandel was moontlik reeds teen 2000 VHJ ’n algemene bedryf. Interessant genoeg, Genesis 37:25-28 meld Ismaelitiese koopmanne wat omtrent honderd jaar ná Abraham se tyd kamele gebruik het om reukwerk na Egipte te vervoer.

Kamele is dalk nie teen die begin van die tweede millennium VHJ in die antieke Nabye Ooste algemeen gebruik nie, maar dit wil voorkom of die bewyse bevestig dat hulle nie heeltemal onbekend was nie. The International Standard Bible Encyclopedia kom dus tot hierdie gevolgtrekking: “Dit is nie meer nodig om die verwysing na kamele in die aartsvaderlike verhale as anachronismes te beskou nie, aangesien daar oorgenoeg argeologiese bewyse is dat die kameel voor die tyd van die aartsvaders getem is.”