Ons lesers vra . . .

Stel God een ras bo die ander?

▪ Nee, hy doen dit nie. Die Bybel sê duidelik: “God [is] nie partydig . . . nie, maar in elke nasie is die mens wat hom vrees en regverdigheid beoefen, vir hom aanneemlik.”—Handelinge 10:34, 35.

God se beskouing van hierdie saak is ver verhewe bo dié van onvolmaakte mense. Baie mense glo dat een ras (gewoonlik hulle eie) verhewe is bo die ander. Sulke vooroordeel weerspieël die denke van Charles Darwin, wat geskryf het: “Dit is amper ’n uitgemaakte saak dat die beskaafde menserasse op die een of ander stadium in die toekoms . . . die onbeskaafde rasse sal uitwis en vervang.” Ongelukkig het baie al gely weens die toedoen van ander rasse wat hulleself as meerderwaardig beskou het.

Is daar enige grondige rede vir gevoelens van rassemeerderwaardigheid? Het die wetenskap byvoorbeeld bewys dat party rasse geneties meerderwaardig is terwyl ander minderwaardig is? Hoegenaamd nie. Die genetikus en professor Bryan Sykes van Oxford sê: “Daar is geen genetiese grondslag vir enige soort onbuigsame etniese of rasseklassifikasie nie. . . . Ek word gedurig gevra of daar Griekse DNS of ’n Italiaanse geen is, maar natuurlik is daar nie. . . . Ons is baie na aan mekaar verwant.”

Sulke bevindinge stem ooreen met wat ons in die Skrif lees. Die Bybel leer dat God net een man en een vrou geskep het, van wie alle ander mense afstam (Genesis 3:20; Handelinge 17:26). In God se oë is daar dus net een ras—die menseras.

Vir Jehovah maak iemand se velkleur of sy gelaatstrekke glad nie saak nie. Hy heg eerder waarde aan iets van veel groter belang—ons figuurlike hart, of die innerlike mens. Hy sê: “Mense oordeel ander volgens hulle voorkoms, maar ek oordeel mense volgens wat in hulle hart is” (1 Samuel 16:7, Contemporary English Version). Dit kan baie aanmoedigend wees as ons hierdie feit in gedagte hou. Hoe so?

Ongeag ons ras is baie van ons ontevrede met aspekte van ons fisiese voorkoms, maar ons kan min doen om sulke dinge te verander. Ons kan egter verander wat die meeste saak maak—die gedagtes en gevoelens van ons hart (Kolossense 3:9-11). As ons eerlik is met onsself, sal ons dalk besef dat ons geneig is om ten minste ’n bietjie meerderwaardig, of dalk minderwaardig, te voel teenoor mense van ’n ander ras. Aangesien nie een van hierdie beskouings met God se denke ooreenstem nie, moet ons ons inspan om al sulke gevoelens uit ons hart te verwyder.—Psalm 139:23, 24.

Terwyl ons daarna streef om Jehovah se beskouing van onsself en ander aan te kweek, kan ons seker wees van sy hulp. Sy Woord herinner ons: “Jehovah se oë deurloop die hele aarde om sy krag te toon ten behoewe van dié wie se hart volkome teenoor hom is” (2 Kronieke 16:9). Dit is waar ongeag aan watter ras ons behoort.