Laat ons vooruitgang duidelik wees
1 Hoe voel jy wanneer iemand vir die eerste keer in die Wagtoring-studie antwoord of wanneer hy sy eerste toespraak in die Teokratiese Bedieningskool hou? Vind jy nie sy vooruitgang aanmoedigend nie? Wat van jou eie geestelike vooruitgang? Is dit vir jou en vir ander duidelik? Hou jy tred met die groei van Jehovah se organisasie vandag? Ons wil nie wees soos diegene van wie Paulus gesê het nie: “Julle [het] weer nodig dat ’n mens julle die eerste beginsels van die woorde van God moet leer” (Hebr. 5:12). Hoe kan ons ons “vooruitgang vir almal duidelik” laat wees? —1 Tim. 4:15.
VOORUITGANG IN LEER EN GEDRAG
2 Paulus het vir Timotheüs gesê: “Let op jouself en op die leer” (1 Tim. 4:16). Die Diensvergadering leer ons om ons onderrigvermoë te verbeter. Dit behandel artikels in Ons Koninkryksbediening oor hoe om by tuisbybelstudies, op herbesoeke en in die huis-tot-huisbediening te onderrig. Pas ons die raad toe en verbeter ons ons vaardigheid in alle aspekte van die diens?—Spr. 22:29.
3 Die Teokratiese Bedieningskool gee uitstekende wenke om ons te help om die goeie nuus vir ander aan te bied. Beskou jy dit as Jehovah se voorsiening sodat jy geestelike vooruitgang kan maak? As jy aan die Teokratiese Bedieningskool deelneem, sal jy jou bekwaamheid in die predikingswerk verbeter en ’n goeie voorbeeld vir ander stel.—Kyk Skool-Handleiding, bladsye 8, 9.
4 Ons toon ook vooruitgang as ons ons hele lewe in ooreenstemming bring met Jehovah se vereistes vir oorlewing tot in sy nuwe aarde. Ons begin hierdie maand om die Oorlewing-boek by die Gemeentelike Boekstudie te bestudeer. Dit bespreek Bybelprofesieë wat nadruk lê op die wonderlike vooruitsigte wat vir oorlewendes op hierdie aarde wag. Berei jy deeglik voor, slaan jy die tekste na en peins jy oor die inligting wat aangebied word? Stel jou dit gerus ten doel om gereeld by die Gemeentelike Boekstudie te antwoord en ook kommentaar te lewer oor die gesiteerde tekste. Probeer om die raad wat elke week bespreek word persoonlik toe te pas. Laat dit vir almal duidelik wees dat Jehovah se Woord op jou inwerk.—1 Thess. 2:13.
STEL DOELWITTE
5 Geestelike vooruitgang word ook getoon deur diensvoorregte na te streef. Kan jy in die komende maande hulppionierdiens doen? Kan jy jou by die immer toenemende geledere van gewone pioniers voeg? Kan jy dit doen wanneer jy vanjaar jou skoolloopbaan voltooi? Kan jy dien waar daar hulp nodig is? Kan jy sendingwerk of Betheldiens nastreef? (Kyk Oms bediening, hoofstuk 9.) Broers in die gemeente kan vooruitgang openbaar deur te streef na die “voortreflike werk” van ’n bedieningskneg of ’n ouere man (1 Tim. 3:1, 13). Bespreek hierdie saak gerus met die ouere manne in jou gemeente of met jou kringopsiener.
6 Watter doelwitte kan ons stel sodat ons ons vooruitgang duidelik kan maak? Almal kan daarna streef om die vrug van die gees in groter mate te openbaar (Gal. 5:22). Dit is ook belangrik om vergaderinge gereeld by te woon, ywerige verkondigers van die goeie nuus te wees en te probeer om ander gemeentelede te help en aan te moedig. Span jy jou op hierdie gebiede in? ‘Vervul jy jou bediening’? (2 Tim. 4:5). Kom jy jou teokratiese toewysings getrou na en bly jy op die hoogte van huidige waarhede deur God se Woord en die jongste geestelike voedsel wat deur die “dienskneg” verskaf word ywerig te bestudeer?—Matt. 24:45-47.
7 Die bestendige stroom nuwelinge na die berg van die huis van Jehovah vereis geestelike groei van ons almal (Jes. 2:2, 3; 60:22). Hierdie stelsel nader sy einde! Dit is noodsaakliker as ooit dat ryp persone hulle verantwoordelikheid aanvaar! Wees dus “vlytig in hierdie dinge, leef daarin, sodat jou vooruitgang vir almal duidelik kan wees”.—1 Tim. 4:13-15.)