Skenk aandag aan die bejaardes in ons midde
1 ’n Christenverantwoordelikheid waarin ons almal deel kan hê, is om ons ouer broers en susters in ag te neem. Na verloop van jare sal hierdie dierbares moontlik liggaamlike probleme ondervind. Weens faktore buite hulle beheer is sommige nie in staat om soveel soos voorheen in Jehovah se diens te verrig nie (Pred. 12:1-6). En soos die res van ons ondervind hulle ook die druk van hierdie ou stelsel.
2 Die Woord van God wys daarop dat die verantwoordelikheid om vir die bejaardes te sorg hoofsaaklik op gesinslede rus (1 Tim. 5:8). Ons moet nietemin ook individueel en as ’n gemeente “vir ’n bejaarde man agting betoon”.—Lev. 19:32, NW.
WAT ONS KAN DOEN
3 Namate Jehovah se organisasie groei en nuwe gemeentes gestig word, bevind party bejaardes hulleself in gemeentes waar min mense hulle goed ken. Ons besef dat hulle moeite doen om vergaderinge by te woon. Groet ons hulle dus of leer ons hulle beter ken deur die inisiatief te neem om ’n gesprek te begin? Het ons hulle in hul huise besoek? Of bly ons telefonies met hulle in voeling wanneer dit gepas is? Het ons hulle besoek, nie net om te vra hoe dit met hulle gaan nie, maar ook om te sien of daar iets is wat ons vir hulle kan doen? Het hulle vervoer nodig, of iemand om takies te verrig of hulle met noodsaaklike sakebelange te help? Dit is prysenswaardig dat sommige in die gemeente hierdie dinge wel doen, maar is daar meer van ons wat moontlik in staat is om sulke broederlike besorgdheid te betoon? (Vergelyk Lukas 10:36, 37.) Bedagsaamheid teenoor bejaardes is ’n voorreg waarin almal deel kan hê.
4 Die ouere manne kan die gemeente op hoogte hou namate spesiale behoeftes opduik. Maar ons kan individueel aanbied om bejaardes te help met dinge wat vir hulle miskien moeilik of te veel is om te hanteer. Het hulle iemand nodig om vir hulle te lees of hulle in die velddiens uit te neem, hoewel hulle net in beperkte mate kan deelneem? Neem ons tyd om ons broers en susters te besoek wat in verpleeginrigtings is of wat andersins weens liggaamlike probleme aan die huis gekluister is?—Spr. 3:27.
5 Soos voorspel in God se Woord is baie mense vandag ‘ongehoorsaam aan hulle ouers, ondankbaar en onheilig, sonder natuurlike liefde’ (2 Tim. 3:2, 3). Maar as Christene wil ons die egosentriese gees van die wêreld vermy. Ons wil nie te besig wees om die geselskap van bejaardes te geniet wat goeie voorbeelde van liefde en toegewydheid aan Jehovah is nie. Hulle getroue vergaderingbywoning en deelname aan velddiens in die mate waartoe hulle in staat is, is bemoedigend, veral as ons besef hoeveel moeite hulle doen.
GESINDHEID VAN BEJAARDES
6 Ons moet bejaardes nooit laat voel dat hulle ’n las vir die gemeente geword het of dat hulle nie meer waardeer word nie, bloot omdat hulle kragte afgeneem het en hulle nie meer soveel soos voorheen kan doen nie. Aan die ander kant is dit wonderlik om ’n waarderende gees by bejaardes te sien. Dit is prysenswaardig wanneer hulle nie krities of veeleisend word nie. Hulle positiewe gesindheid help hulle om nie altyd te kla nie, met die wete dat Jehovah hulle kan help om die beproewinge wat met die ouderdom gepaard gaan te deurstaan. As ’n gemeente en as individue wil ons voortgaan om die getroue bejaardes in ons midde liefdevol in ag te neem.—Vergelyk Hebreërs 10:32-34.