Gee aandag aan die bejaardes en siekes
1 Hoe versterkend is dit tog om talle ouer broers en susters in ons midde te hê wat baie jare in getroue Koninkryksdiens deurgebring het. Ja, diegene wat oor die jare heen ondervinding in Jehovah se diens opgedoen het, is vir ons almal ’n bron van bemoediging. Hulle grysheid is inderdaad ’n sierlike kroon en hulle teenwoordigheid verryk die gemeente.—Spr. 16:31.
2 Terwyl ons baat vind by die geestelike gawes wat sulke ouer persone ons kan bied, moet ons in gedagte hou dat die ouderdom ook verskillende probleme meebring (Pred. 12:1-5). Is ons bewus van die persoonlike behoeftes van ons ouer broers en susters en is ons gereed om vriendelike en liefdevolle bystand te verleen? (Joh. 13:34, 35). Hulle behoeftes kan grootliks verskil.
3 Soms het hulle geselskap nodig om die eensaamheid te verdryf, maar dikwels verlang hulle dalk praktiese bystand met vervoer, inkopies, huiswerk of ander roetinewerk. Hoewel ’n ouer broer of suster nog geestelik sterk is, is hulle miskien nie meer fisies in staat om na ’n aantal nodige dinge om te sien nie. Ander in die gemeente, hoewel nie bejaard nie, het dalk soortgelyke bystand nodig omdat hulle sieklik of gestrem is.
HOE KAN ONS HELP?
4 Dit is hoofsaaklik die verantwoordelikheid van gesinslede en ander familielede om bejaardes en siekes te help. Geestelike broers en susters moet egter besorgdheid toon en gereed wees om te help. Vervoer na die vergaderinge is een manier waarop hulp verleen kan word. Assosiasie met ons getroue bejaardes by vergaderinge beteken vir hulle baie, en as hulle gesondheid dit toelaat, sal hulle jou vriendelike uitnodiging om jou na die Koninkryksaal te vergesel gretig aanvaar. Nog ’n manier om liefde te toon, is om gasvry te wees en bejaardes vir ’n maaltyd of bloot Christelike omgang te nooi.
5 Probeer jy bejaardes betrek wanneer velddiensreëlings getref word? Hulle fisiese beperkinge mag vereis dat jy gebied kies wat vir hulle nie te veeleisend sal wees nie. Dit kan huisbewoners aanmoedig as ouer verkondigers jou op herbesoeke en Bybelstudies vergesel. Gewoonlik het hierdie bejaardes se ywer vir die bediening nog nie afgeneem nie, en as ons ons bes doen om te reël dat hulle ’n deel daaraan kan hê, sal hulle bly wees vir die geleentheid en bydra tot die getuienis wat gegee word.
6 Diegene wat nie die vergaderinge gereeld kan bywoon nie, mis ongetwyfeld die assosiasie met hulle broers. Kan stappe gedoen word om glanspunte van die vergaderinge met hulle te deel? Hulle sal dit ook waardeer as hulle die jongste publikasies kry. As die bejaarde nie meer so goed kan sien nie, sal hy dit op prys stel as iemand vir hom dele uit die Bybel en die Genootskap se publikasies lees.
7 Net die wete dat ons omgee, kan so baie beteken. ’n Kort, opbouende besoek of telefoonoproep kan iemand wat in die huis vasgekluister sit weer nuwe moed gee. Jy sal heel waarskynlik vind dat jou vreugde sal toeneem namate jy op hierdie manier die Bybelse bevel in 1 Johannes 3:18 gehoorsaam om “met die daad en in waarheid” lief te hê. Mag Jehovah al jou pogings seën om ons getroue bejaardes en siekes by te staan.