Trek ten volle voordeel uit die Diensvergaderinge
1 Die innige begeerte van elke kneg van God moet wees: “Leer my, HERE, u weg: ek sal in u waarheid wandel; verenig my hart tot die vrees van u Naam” (Ps. 86:11). Die Diensvergadering verskaf spesifieke instruksies om ons te help om Jehovah se werk, die verkondiging van die goeie nuus van sy Koninkryk, uit te voer. Trek jy werklik voordeel uit die Diensvergadering deur die raad wat gegee word in te neem?
VOORDELE VAN GOEIE VOORBEREIDING
2 Voorbereiding is nodig as ons soveel moontlik voordeel wil trek uit die instruksie wat tydens die Diensvergadering gegee word. Waarom? Deeglike voorbereiding maak die verstand en hart ontvanklik vir instruksie. As jy die materiaal voor die tyd bestudeer, daaroor peins en die tekste ontleed wat gebruik word, sal jy in ’n beter posisie wees om die geestelike voedsel wat aangebied word in te neem en te onthou. Jou eie kommentare, deelname aan demonstrasies of toesprake sal betekenisvoller wees. Jou hart sal gevul word met tevredenheid, omdat jy jou bes gedoen het.—Ex. 23:19a; Spr. 16:23.
3 Wanneer ’n mens voorberei, is dit nuttig as elke lid van die gesin ’n eksemplaar het van die publikasies wat gebruik word. Voorbereiding is veral belangrik vir diegene wat dele op die Diensvergaderingprogram het. Toewysings moet lank voor die tyd gemaak word sodat deelnemers genoeg tyd het om voor te berei.
VOORDELE VAN DEELNAME EN TOEPASSING
4 Het jy opgelet dat deelname aan die vergaderinge grootliks daartoe bydra dat jy hulle geniet? Soos Die Wagtoring van 15 September 1972 op bladsy 423 verduidelik het: “Ware geloof kom wanneer ’n mens jou eie geloof in Jehovah onder jou Christen-broers betuig. Dit is nie dat ’n mens verplig voel om kommentaar te maak, en dan ontspan en die res van die vergadering aan ander oorlaat nie....Dit is ons liefde vir Jehovah wat ons vervul en wat oorborrel sodat ons Jehovah wil seën en ons liefde vir hom wil betuig.”
5 Ons het ’n toewysing van Jehovah om die goeie nuus te verkondig. Hy voorsien liefdevol baie instruksie deur die Diensvergadering sodat elkeen van ons in ’n posisie is om die beste Koninkryksgetuienis moontlik te gee. As die Groot Onderrigter verwag Jehovah resultate van die instruksie wat hy sy volk gee. (Kyk Deuteronomium 17:10.) As jy dit wat jy leer, beoefen en toepas, sal dit jou tot voordeel strek, en jy sal kan sê: “Ek het gedoen soos U my beveel het.”—Eseg. 9:11.
6 Jy sal ook die vreugde smaak om jouself en diegene wat na jou luister te red (1 Tim. 4:16). Die Diensvergadering hou ongetwyfeld talle geestelike voordele in. Mag jy en jou gesin vasbeslote wees om daardie voordele ten volle te benut!