Vraebus
• Wat moet op die gemeente se kennisgewingbord aangebring word?
Die kennisgewingbord in die Koninkryksaal verskaf informasie oor gemeentelike bedrywighede. Geen items moet sonder die goedkeuring van die presiderende opsiener op die kennisgewingbord aangebring word nie.
Sommige dinge wat op ’n gereelde grondslag daarop aangebring word, is: Roosters en toewysings vir die Diensvergadering en die Teokratiese Bedieningskool, lyste van openbare toesprake wat gereël is, voorsitters van die Openbare Vergadering en leestoewysings vir Die Wagtoring, samestelling en vergaderplek van Gemeentelike Boekstudies, kennisgewings oor die kringopsiener se volgende besoek asook ander verwante informasie, informasie oor ’n komende kring- of streekbyeenkoms en die skoonmaakrooster vir die Koninkryksaal. Soms sê die Genootskap ouere manne aan om sekere briewe of ander items daarop aan te bring. As iets buitengewoons opduik, kan die liggaam van ouere manne besluit of dit gepas sal wees om dit op die kennisgewingbord aan te bring.
Hoewel ’n kort aankondiging by een van die vergaderinge gemaak kan word oor ’n huwelik wat in die Koninkryksaal gaan plaasvind, moet ’n formele huweliksaankondiging nie op die kennisgewingbord aangebring word nie. Dit sal ook nie gepas wees om aankondigings oor gesellighede wat suiwer sosiaal van aard is daarop aan te bring nie, aangesien dit nie met gemeentelike bedrywighede verband hou nie.—Kyk Die Wagtoring, 1 Mei 1984, bladsy 21; Ons Koninkryksbediening, Augustus 1975, bladsy 4.
Die kennisgewingbord moet netjies en aantreklik gehou word. Dit moet groot genoeg wees sodat die nodige items wat hier uiteengesit word daarop aangebring kan word. Ou roosters en algemene items waarvan die gemeente reeds goed kennis dra, moet so gou moontlik verwyder word. Wanneer meer as een gemeente in dieselfde saal bymekaarkom, moet elke gemeente sy eie kennisgewingbord of ’n gedeelte van die bord hê wat duidelik geïdentifiseer is. Ons raai aan dat die presiderende opsiener of iemand onder sy leiding die bord van tyd tot tyd nagaan om seker te maak dat die items daarop nie oud nie, gepas en netjies is.