Die Diensvergadering rus ons toe vir elke goeie werk
1 Die doel van die Diensvergadering is om ons aan te moedig en toe te rus om ’n groter aandeel aan die predikings- en dissipelmaakwerk te hê (2 Tim. 3:17). As ons egter nie goed voorberei vir die vergadering nie of nie toepas wat ons leer nie,saldit vir ons baie min voordele in- hou.
2 As jy voor die tyd voorberei, sal dit jou help om meer by die onderrigting baat te vind. Gaan deur die dele in die publikasies wat gebruik gaan word en bring hulle saam met jou sodat jy daarin kan volg en aan die bespreking kan deelneem. Luister aandagtig en maak aantekeninge om later te gebruik.
3 Die presiderende opsiener gaan sorgvuldig deur die verskillende dele van die vergadering. Ervare en bekwame ouere manne en bedieningsknegte word aangewys om die dele voor te berei (omAF bl. 70). Gemeentes wat slegs ’n paar ouere manne of bedieningsknegte het, kan ander bekwame broers aanwys om hulle te help (kmAF 12/76, Vraebus). Elke spreker moet deeglik voorberei, streng by die riglyne bly wat voorsien is en seker maak dat hy nie die tydgrens oorskry nie.
4 Die vergadering begin gewoonlik met aankondigings. Die broer wat aangewys is om die aankondigings te doen, moet die presiderende opsiener voor die tyd nader om uit te vind watter sake gemeld moet word. Dit kan briewe van die Genootskap insluit of herinneringe oor velddiensreëlings of velddiensrapporte. Ons hoor miskien van siekes wat besoek moet word of ons word oor besonderhede van toekomstige gemeentelike bedrywighede ingelig. Skenk noukeurig aandag sodat jy ingelig en gereed is om jou deel te doen.
5 As ’n deel op die vergadering gehoordeelname vereis, kan jy voorberei deur die materiaal deur te lees en die tekste na te slaan. Dink na oor hoe jy van plan is om die wenke toe te pas en watter kommentare jy kan lewer om ander aan te moedig. Jy kan dalk die praktiese waarde van die onderrigting toelig deur ’n kort ondervinding te vertel.
6 Wanneer daar ’n demonstrasie is, kan jy jou in soortgelyke omstandighede probeer voorstel en dink aan wat jy sou sê. Let op die argumente wat gebruik word en hoe die verkondiger daaroor redeneer. Probeer onthou wat jy die laaste keer gesê het toe jy in ’n soortgelyke situasie was en kyk hoe die punte wat gedemonstreer word jou kan help om in die toekoms beter resultate te verkry.
7 Diegene wat aan demonstrasies en onderhoude deelneem, moet voor die tyd goed oefen. Elkeen moet weet wat hy gaan sê en wat hy veronderstel is om op die verhoog te doen. Ongeoefende dele motiveer en moedig die gehoor gewoonlik nie aan nie. Sommige kom voorbereid om hulle deel aan die einde van die Wagtoring-studie op die verhoog te oefen en die broers wat met die mikrofone werk, in te lig oor wat nodig sal wees.
8 Die program sal soms ’n toespraak insluit wat oor ’n spesifieke gemeentelike behoefte handel of ’n Wagtoring-artikel wat van belang is. Luister aandagtig, neem die raad ter harte en probeer dit toepas.
9 Ons wil ‘toeberei wees vir elke goeie werk’ (2 Tim. 2:21). Die Diensvergadering is een van die voorsienings wat Jehovah maak om ons te help om dit te doen. Getroue bywoning en ’n opregte poging om te gebruik wat ons leer, sal ons beslis help sodat ons ons ‘bediening kan vervul’.—2 Tim. 4:5.