Gryp elke geleentheid aan om te getuig—Deel 1
1 Toe die apostel Paulus aan die Hebreeuse Christene geskryf het, het hy gemaan: “Laat ons dan gedurig . . . aan God ’n lofoffer bring, dit is die vrug van die lippe wat sy Naam bely” (Hebr. 13:15). Een manier waarop ons dit kan doen, is deur ons gemeente se velddiensreëlings gereeld te ondersteun. Nog ’n doeltreffende manier om aan God ’n lofoffer te bring, is deur geleenthede aan te gryp om informeel te getuig.
2 Gedurende die loop van ons daaglikse bedrywighede kom die meeste van ons in aanraking met ander mense. As ons wakker is om die geleenthede raak te sien en dan die poging aanwend, kan ons talle sade van Koninkrykswaarheid deur informele getuieniswerk saai. Dit verg dalk net ’n kort kommentaar of ’n vraag oor wêreldtoestande of plaaslike aangeleenthede om ’n gesprek aan te knoop wat die weg sal open om ’n getuienis te gee. Na gelang van die omstandighede en die reaksie van die persoon kan ons selfs lektuur aanbied.
WEES VOORBEREI
3 Suksesvolle informele getuieniswerk vereis voorbereiding. Is ons bereid om daardie moeite te doen? As ons ontleed wat ons gedurende die loop van ’n dag sal doen, aan die mense dink met wie ons dalk in aanraking sal kom en oorweeg wat ons kan sê om ’n gesprek aan te knoop, behoort ons verstandelik voorberei te wees en dit makliker te vind om informeel te getuig. Maak seker dat jy traktate, tydskrifte of ander lektuur byderhand het wat jy vir mense wat luister, kan aanbied. Wat van ’n Bybel? Die sakformaatbybel pas gemaklik in ’n handsak of ’n baadjiesak en kan gebruik word wanneer die geleentheid hom voordoen. Is daar iets anders wat ons kan doen om goed voorberei te wees?
4 Ons moet op die hoogte bly van die jongste gebeure wat met Bybelprofesie verband hou en voorberei wees om Bybelonderwerpe vir gesprekke in te lei wat byval sal vind by mense wat honger na die waarheid. Die rubrieke “Ons beskou die wêreld” en “Insig in die nuus” in ons tydskrifte is kosbare hulpe in hierdie opsig. As ons sulke nuusberigte in gedagte hou, kan ons met vertroue oor ’n onderwerp praat wat algemeen byval vind.
NEEM DIE INISIATIEF
5 Feitlik elke geleentheid wanneer ons met ander mense in aanraking kom, bied ons die kans om ’n getuienis te gee. Selfs verkondigers wat in die hospitaal is, het hulle situasie benut en het daarin geslaag om met dokters, verpleegsters, hospitaalpersoneellede, besoekers en ander pasiente oor die waarheid te praat. Ander verkondigers gebruik hulle etenspouse by die werk of by die skool en tyd wat hulle bestee om vir ’n afspraak te wag. Geleenthede om te getuig kan dalk opduik wanneer jy inkopies doen, met vakansie is, of wanneer jy per bus, vliegtuig of trein reis. Sommige verkondigers behaal welslae deur by hulle eie huise informeel te getuig wanneer verkoopsmanne, afleweraars, bure, familie en ander hulle besoek.—Kyk 1970 Yearbook, bladsye 97, 98, 231, 232 en 263, 264.
6 Hartgrondige waardering vir die waarheid en ’n bewustheid van die dringendheid van ons tyd behoort ons te beweeg om elke geleentheid aan te gryp om die wonderlike boodskap van hoop wat ons het met ander te deel. Mag ons steeds elke geleentheid benut om sade van Koninkrykswaarheid deur informele getuienis te saai.—Matt. 24:14.