Bied die Goeie Nuus Aan​—Met oortuigingskrag

¹ Is dit gepas vir bedienaars van die goeie nuus om mense te oortuig om die waarheid te aanvaar? Dit is beslis! (Hand. 18:4). Die apostel Paulus het Timotheüs daaraan herinner dat hy deur sy moeder en grootmoeder oortuig is om ’n gelowige te word (2 Tim. 3:14, NW). Om iemand te oortuig, beteken om hom te beweeg deur ’n dringende versoek, om ernstig met hom te redeneer oor ’n opvatting, ’n posisie of ’n handelwyse.

² Die apostel Paulus het oortuigingskrag goed benut. Terwyl hy in Athene was, “het sy gees in hom opstandig geword toe hy sien dat die stad vol afgodsbeelde was” (Hand. 17:16). Maar toe hy in die middel van die Areopagus gestaan het, het Paulus nie tromp-op vir sy toehoorders gesê dat hulle aanbidding van afgode vergeefs is nie. Hy het op ’n bekwame wyse ’n hewige, emosionele konfrontasie vermy en hulle aandag gevestig op “’n altaar . . . waarop geskrywe is: Aan ’n onbekende God”. Hy het daarna ’n kragtige getuienis gegee, met goeie gevolge.​—Hand. 17:23, 28, 29, 34.

TOON BEGRIP

³ Paulus het duidelik getoon dat oortuigingskrag meer vereis as net ’n emosionele aanbieding of baie woorde. Ons moet insig hê en begrip toon vir die gevoelens, opvattings en belangstellings van die mense met wie ons praat. Ons moet wakker en gou wees om te besef wanneer die huisbewoner se emosies dalk die werklike hindernis is in die weg van ’n openhartige bespreking van Bybelleerstellings.​—Spr. 16:23, NW.

⁴ Iemand glo miskien aan die onsterflikheid van die siel weens ’n sentimentele gehegtheid aan die herinnering van ’n afgestorwe dierbare. Wat sal die oortuigende manier wees om hom met die waarheid te help? Sal dit nie beter wees om oortuigingskrag te gebruik om die emosionele hindernis wat hy dalk het te oorkom en met hom te redeneer nie, pleks van reguit vir hom te sê dat wat hy glo verkeerd is en dat die siel sterf? Ons kan vir hom sê dat ons sy gevoelens verstaan omdat ons ook dierbares aan die dood afgestaan het. Ons het vertroosting gevind in die belofte van die opstanding, ’n tyd wanneer ons met afgestorwe dierbares herenig sal word en weer eens hulle geselskap sal geniet. Dan kan gepaste tekste gelees en bespreek word. As ons begrip toon en ons woorde met sout besprinkel, kan ons oortuigend wees wanneer ons die goeie nuus aanbied.​—Spr. 16:21, NW; Kol. 4:6.

GEBRUIK ILLUSTRASIES

⁵ Illustrasies kan doeltreffend wees om mense te oortuig om hul denke te verander. ’n Noemenswaardige voorbeeld is die taktvolle manier waarop Natan koning Dawid se hart bereik het (2 Sam. 12:1-14). Goed gekose illustrasies verbind intellektuele stimulering met emosionele trefkrag. Dit maak dit makliker vir mense om nuwe gedagtes te begryp. Die aarde kan byvoorbeeld met ’n huis en mense met huurders vergelyk word. As die huurders nie goed na die huis kyk nie, sal die eienaar nie die huis vernietig nie, maar hy sal die huurders uitsit. God sal dus nie die aarde vernietig nie, maar hy sal die slegte mense vernietig.​— Jes. 45:18.

⁶ Oortuigingskrag het sy beperkinge. As mense nie wil glo of veranderinge in hulle lewens wil aanbring nie, sal hulle bly soos hulle is (Matt. 13:14, 15). Maar daar is nog talle opregtes van hart in die wêreld wat met die boodskap van die Koninkryk bereik kan word. Ons moet elke redelike poging aanwend om oortuigingskrag in ons bediening te ontwikkel en te gebruik sodat ons hulle kan help.