Hoe om bandopnames te beskou wat nie deur die Genootskap uitgegee is nie

Die Genootskap voorsien ’n oorvloed van geestelike voedsel in die vorm van kassette—van My boek met Bybelverhale tot die jongste nommers van Die Wagtoring. Maar ons moet die nodige versigtigheid aan die dag lê wat privaat bandopnames betref. Omdat ons ’n broederskap is wat mekaar vertrou, aanvaar en luister ons soms geredelik na bandopnames van ander sonder om na hulle oorsprong te verneem. Wanneer jy seker is wie die toespraak gehou het, soos ’n lid van die Bestuursliggaam of ’n ander getroue broer wat jy ken, sal die band jou ongetwyfeld opbou.

Maar soms word bande versprei met toesprake wat skynbaar deur ’n kringopsiener of ’n ryp broer van oorsee gehou is, en dit grens soms aan spekulasie of sensasie. Sal dit nie dan verstandig wees om Paulus se raad in 2 Timotheüs 3:14 te volg nie? Nadat Paulus teen indringers gewaarsku het, het hy daar beklemtoon hoe belangrik dit om te “weet” wie die persone is na wie ons luister. Ons moet seker maak dat ons nie na iets luister wat ‘verder gaan as die dinge wat in die Heilige Skrif geskryf is’ en die geestelike voedsel wat deur die getroue en verstandige dienskneg voorsien word nie.​—1 Kor. 4:6, NW.

Daar is ook berig dat bande met “Bybelliedjies” geadverteer word om kinders die Bybel te leer. Hierdie bande kom volgens berig van broers af en is in sommige gemeentes versprei. Hoewel die beweegrede skynbaar goed is, kan dit daarop neerkom dat ons ons verbintenis met die waarheid gebruik om wins uit ons broers te maak, nie waar nie? Jehovah se organisasie voorsien meer as genoeg om ons kinders op te lei, en daarom is ons nie ten gunste van die verspreiding van sulke bande nie. Mag ons alles ten volle benut wat Jehovah voorsien om ons geestelik aan te moedig en op te bou.​—Matt. 24: 45-47.