Vraebus

◼ Moet Jehovah se Getuies opnames of afskrifte van toesprake versprei?

Ons word versterk en aangemoedig deur Bybeltoesprake (Hand. 15:32). Dit is dus natuurlik dat ons sulke aanmoedigende inligting wil deel met dié wat nie teenwoordig was nie. Met die verskillende opneemtoestelle wat nou beskikbaar is, kan ’n toespraak baie maklik opgeneem en aan ander versprei word. Party het ’n versameling opgeneemde toesprake, waaronder toesprake wat baie jare gelede gehou is, en hulle leen of kopieer hierdie toesprake met goeie bedoelings vir vriende. Ander het al webwerwe geskep en toesprake daarop gesit sodat enigiemand dit kan aflaai.

Daar is natuurlik geen beswaar daarteen dat ons toesprake vir ons eie gebruik of vir lede van ons gesin opneem nie. En ouer manne sal dalk reël dat toesprake opgeneem word vir verswakte gemeentelede wat nie die vergaderinge kan bywoon nie. Maar daar is goeie redes waarom ons nie afskrifte of opnames van toesprake moet versprei nie.

Aangesien toesprake dikwels met die oog op plaaslike behoeftes gehou word, kan ons maklik gedagtes van ’n verspreide opname misverstaan, omdat ons nie weet teen watter agtergrond die toespraak gehou is nie. Dit sal ook vir ons moeilik wees om te bevestig wie die toespraak gehou het en wanneer, sodat ons seker kan wees dat die inligting wat aangebied word, met ons huidige begrip strook en juis is (Luk. 1:1-4). En die verspreiding van afskrifte of opnames van toesprake sal party dalk in die versoeking stel om ongepaste aandag en eer te gee of te aanvaar.—1 Kor. 3:5-7.

Die getroue en verstandige slaaf werk hard om die regte hoeveelheid geestelike voedsel op “die regte tyd” te voorsien (Luk. 12:42). Dit sluit die reëling in dat toesprake by plaaslike gemeentes van Jehovah se Getuies gehou word en oudio-opnames van die amptelike webwerf jw.org afgelaai kan word. Ons kan seker wees dat die getroue en verstandige slaaf en sy Bestuursliggaam sal voorsien wat ons nodig het om in die geloof standvastig gemaak te word.—Hand. 16:4, 5.