Spoor Bybelstudente aan om vooruitgang te maak
1 Die wêreld beskou vooruitgang hoofsaaklik uit ’n tegnologiese of materiële oogpunt. Maar Jehovah se volk is anders. Ons span ons eerder in om geestelike vooruitgang te maak. Ons is bly dat ons die aanmoediging ontvang het wat daartoe gelei het dat ons aktiewe en vrugbare dissipels van Christus geword het.—Joh. 15:8; 2 Pet. 1:5-8.
2 In die Evangelies word die term “dissipel” hoofsaaklik op diegene toegepas wat nie alleen in Christus se leer glo nie, maar dit ook noukeurig navolg (Matt. 28:19). Is Bybelstudente bewus van daardie feit? Hoe kan ons hulle aanspoor om vooruitgang te maak sodat hulle dissipels kan word?
RIG BELANGSTELLENDES NA DIE ORGANISASIE
3 Die student se vooruitgang hou definitief verband met sy waardering vir Jehovah se organisasie. Gevolglik is dit deel van ons verantwoordelikheid as onderrigters om studente na God se organisasie te rig. Ons word reeds jare lank aangespoor om vyf tot tien minute by elke Bybelstudiesessie daaraan te bestee om iets aangaande die organisasie te verduidelik. Die brosjure Jehovah se Getuies—Verenig in die uitvoering van God se wil wêreldwyd voorsien ’n uitstekende raamwerk om dit te doen. Het jou Bybelstudent ’n eksemplaar? Indien nie, moet jy sorg dat hy dadelik een kry. Spoor hom aan om dit te lees, en verduidelik vir hom dat jy by elke studie net ’n kort gedeelte daarvan sal bespreek.
4 Die informasie op bladsye 14 en 15 van die God se wil-brosjure is daarop gemik om waardering vir elk van die gemeentelike vergaderinge op te bou. Bespreek gerus elke week net een of twee paragrawe. Toon hoe daar by elke vergadering opleiding en onderrig gegee word om in ’n besondere behoefte te voorsien. Help die student om te besef dat geestelike groei die gevolg is van ons “onderlinge byeenkoms” (Hebr. 10:24, 25). Spoor hom hartlik aan om saam met ons by die Koninkryksaal te vergader. Daar sal hy self die eenheid en liefde ervaar wat ons as Jehovah se versamelde volk geniet.—Ps. 133:1, NAV; Joh. 13:35.
WAKKER GEESTELIKE GROEI AAN
5 Nuwelinge moet werklik studente van God se Woord word en vordering maak wat kennis, insig en toepassing van Bybelbeginsels betref. Daarom sal ons voortgaan met die studie in die Paradys op aarde-boek en Verenig in aanbidding- of Ware vrede-boek al word die student gedoop voordat hy hierdie publikasies voltooi het. Die student kan eksemplare van hierdie boeke kry al sal dit nog etlike maande duur voor hy gereed is om ’n tweede boek te bestudeer. Dit kan sy geestelike aptyt wek en hom aanspoor om bykomende leeswerk te doen wat sy vooruitgang sal bespoedig. Ons moet ook beklemtoon hoe waardevol dit is om ’n Wagtoring- en Ontwaak!-intekening te hê en om ander publikasies van die Genootskap te verkry sodat ’n mens met die “rantsoen op tyd” kan tred hou (Luk. 12:42). Diegene wat dit doen, sal in die geloof gewortel, opgebou en bevestig word.—Kol. 2:7.
6 As voornemende mede-Getuies van Jehovah het Bybelstudente ons hulp nodig as hulle tot volwassenheid gaan groei (Hebr. 5:14). Ons moet hulle prys wanneer hulle dit verdien, aangesien dit hulle sal aanmoedig om vooruitgang te maak (Filip. 3:16). Praat hy met familie en vriende oor die dinge wat hy leer? Het hy by die Teokratiese Bedieningskool aangesluit, indien hy aan die vereistes voldoen? Is dit sy begeerte om ’n verkondiger van die goeie nuus te word?
7 Indien ons as onderrigters ons plig doen, kan ons na Jehovah se oorvloedige seën uitsien (2 Kor. 9:6). Ons moet nooit die krag van gebed ten behoewe van Bybelstudente vergeet nie. Vra Jehovah om hulle te rig sodat hulle kan reageer op wat hulle leer (1 Kor. 3:6, 7). Mag hulle besliste stappe doen om daadwerklik met die gemeente om te gaan en sodoende verdere eer en lof op Jehovah se naam bring.