Rig Bybelstudente na Jehovah se organisasie
1 Bybelstudente moet vertroud raak met die organisasie van die “een kudde” waarvan Jesus in Johannes 10:16 gepraat het. Hulle moet besef dat dit noodsaaklik vir hulle redding is dat hulle hul tot Jehovah se organisasie verbind (Openb. 7:9, 10, 15, NW). Daarom moet ons begin om ons Bybelstudente na die organisasie te rig sodra ’n Bybelstudie gevestig is.
2 Help jou Bybelstudente om vertroud te raak met die baie aspekte van Jehovah se aardse organisasie. In lyn met die eerste-eeuse voorbeeld is Jehovah se hele volk verbonde aan gemeentes wat bestaan uit ouere manne, bedieningsknegte en verkondigers. Vandag geniet gemeentelede dit om vyf vergaderinge per week by te woon. Periodieke kring- en streekbyeenkomste word gedurende die jaar gehou, en by hierdie byeenkomste kry ons spesiale onderrig en ook geleenthede om met mede-Getuies van verskillende gebiede te assosieer. Daar is ook pioniers, sendelinge en reisende opsieners, sowel as ’n Bestuursliggaam wat die wêreldwye werk rig. Hoe kan jy jou Bybelstudente help om vertroud te raak met die verskeie aspekte van Jehovah se organisasie? Hoe kan jy hulle help om te besef dat die organisasie se struktuur op die Bybel gebaseer is?
GEBRUIK DIE UITVOERING VAN GOD SE WIL-BROSJURE
3 Die Uitvoering van God se wil-brosjure het omvattende informasie aangaande Jehovah se organisasie. Daarmee kan jy Bybelstudente progressief help om vertroud te raak met die organisasie en hulle help om die manier waarop dit werk te waardeer. ’n Goeie manier om hiermee te begin, is om te bespreek wat by die Koninkryksaal gebeur. Dit sal die student aanspoor om gemeentelike vergaderinge by te woon. Gaan die informasie op bladsye 14 en 15 saam met hom na voordat jy hom vir die eerste keer na die openbare toespraak nooi. Vestig sy aandag op die foto’s. Beskryf waar die plaaslike Koninkryksaal is en hoe dit lyk. Jy kan hom selfs ’n foto wys van die Koninkryksaal waar jy vergaderinge bywoon.
4 Wanneer die kringopsiener se besoek in die gemeente aangekondig word, moet jy bladsye 20 en 21 met jou Bybelstudent bespreek. Gebruik die vrae aan die einde van bladsy 21 om die hoofgedagtes na vore te bring. Bespreek die skriftuurlike agtergrond van ons huidige reëling met hom deur die eerste paragraaf op bladsy 20 te gebruik. Hierdie informasie sal jou student se besoek aan die Koninkryksaal betekenisvol maak.
5 Voor julle streekbyeenkoms, kringbyeenkoms of spesiale byeenkomsdag kan jy eweneens die inligting op bladsy 19 dek. Vestig sy aandag op wat ’n groot byeenkoms behels, en wys op die internasionale omvang wat in die foto’s op bladsy 18 voorgestel word. Wanneer jy kommentaar lewer oor die illustrasie wat die vrystelling van ’n nuwe publikasie toon, kan jy hom voorberei op ’n verdere bespreking van bladsye 24 en 25. Dek gedagtes op bladsye 22 en 23 om pionierdiens te verduidelik.
PAS JOU BY DIE BEHOEFTE AAN
6 Soos jy kan sien, is dit nie nodig om voor in die Uitvoering van God se wil-brosjure te begin nie. Jy kan eerder, wanneer die geleentheid en behoefte hulle voordoen, spesifieke gedagtes uit die brosjure bespreek wat die student sal help om Jehovah se organisasie te waardeer en wat hom sal aanspoor om met die plaaslike gemeente om te gaan.
7 As jy met oortuiging praat wanneer jy hierdie sake bespreek, sal dit ’n blywende indruk op jou student maak. Wees vurig van gees (Hand. 18:25). Maak ook seker dat jy, “wat ’n ander leer”, ’n goeie voorbeeld stel deur waardering vir Jehovah se organisasie te toon (Rom. 2:21). As jy dit doen, kan jy ander help om aan te sluit by die een kudde wat deur Jesus na die ewige lewe gelei word.