Rig belangstellendes na die organisasie
1 Jou eie ondervinding in die waarheid het jou ongetwyfeld bewus gemaak van hoe nodig ons die gemeente het om geestelik te kan groei en standvastig in die geloof te kan wees (Hebr. 10:24, 25). Jy moet gevolglik opreg daarin belangstel om jou Bybelstudente nie net te help om leerstellings goed te verstaan nie, maar ook om hartgrondige waardering vir die organisasie wat Jehovah gebruik op te bou (Luk. 6:40). Ons nuwe brosjure Jehovah se Getuies—Verenig in die uitvoering van God se wil wêreldwyd kan jou in hierdie opsig help.
2 Mense wat studeer, moet besef dat die struktuur en die metodes van Jehovah se organisasie op die Bybel gebaseer is. Om vooruitgang te maak, moet hulle ook besef dat hulle insig in Jehovah se weë kry, soos dit deur sy organisasie weerspieël word, en dat hulle nie net van nog ’n godsdiens leer nie.
GEBRUIK VAN NUWE BROSJURE
3 Reg aan die begin van die studiereëling moet die student ’n eksemplaar van die God se wil-brosjure ontvang en voor die tyd in kennis gestel word van die gedeeltes wat as deel van sy weeklikse studie hersien sal word. Hy kan dus vir die studie voorberei. Terwyl jy voorberei, moet jy nadink oor die student se vorige of huidige kerkverband sodat jy die verskil tussen sy kerk en Jehovah se Bybelgebaseerde organisasie beter kan beklemtoon. As jy vergelykings trek, sal dit dikwels die verskil by die student tuisbring. Slaan teksverwysings na en gebruik die hersieningsvrae wat aan die einde van die meeste van die 15 gedeeltes van die brosjure verskyn. Sodoende sal jy die persoon help om ’n duideliker begrip van Jehovah se organisasie te kry.
4 Ter toeligting: Wanneer die gedeelte “Gemeentes tot opbouing in liefde en eenheid” gedek word, kan jy vir die student vra hoe die godsdiensleiers van sy kerk aangestel en beskou word. Dan kan jy voortgaan om uit die Bybel te toon hoe dit verskil van wat in Jehovah se organisasie gesien en gedoen word. Dieselfde benadering kan gebruik word tydens ’n bespreking van die gedeelte oor hoe die werk gefinansier word wat op bladsy 28 begin. Dit sal die student help om Jehovah se weë te waardeer en hom beweeg om gunstig te reageer.
5 Onthou ook dat jy nie al die materiaal in ’n bepaalde gedeelte op een slag hoef te dek nie. Dit kan na gelang van die lengte, tydens verskeie studies gedek word. Slegs vyf of tien minute kan na elke studie afgestaan word om die hersieningsvrae te gebruik wat op die bespreekte gedeelte van die materiaal betrekking het, want die vrae beklemtoon die hoofgedagtes.
6 Vestig aandag op die foto’s en illustrasies wat dien om die gedagtes in die teks by die student in te skerp. Baie van die foto’s beeld die internasionale omvang van Jehovah se organisasie uit, asook die eenheid van God se volk ongeag ras, maatskaplike agtergrond of nasionaliteit. Slegs so ’n organisasie kan werklik Jesus se opdrag vervul om die goeie nuus wêreldwyd te verkondig.—Matt. 24:14.
7 Mense moet tussen Jehovah se organisasie en die van Satan kies. Hulle lewens is daarby betrokke (Hand. 26: 18). Ons kan hulle help om die regte keuse te doen deur ten volle gebruik te maak van die uitstekende instrumente wat Jehovah vir ons gegee het om belangtellendes na sy organisasie te rig. Ons moet beplan om dit by elke Bybelstudie te doen. So kan hulle ‘geregtigheid, geloof, liefde en vrede najaag saam met die wat die Here uit ’n rein hart aanroep’.—2 Tim. 2:22.