Bied die goeie nuus aan—Begin studies deur middel van die direkte benadering
1 Jesus het ons opdrag gegee om ‘dissipels te maak’ (Matt. 28:19). Om dit te doen, verg gewoonlik dat ons Bybelstudies met belangstellendes moet begin. As ons die direkte benadering in die huis-tot-huisbediening gebruik, sal dit ons help om vinnig Bybelstudies te begin. Dit toon ook duidelik wat een van ons groot oogmerke is wanneer ons mense besoek.
2 Wat kan ons sê wanneer ons die direkte benadering gebruik om Bybelstudies te begin? ’n Baie eenvoudige benadering is die beste. Ons kan sê: “Ek stel daarin belang om mense te help om die Bybel te verstaan en ek sal dit graag gratis met jou en jou gesin by julle huis wil studeer sonder dat julle onder verpligting staan. Ons kan julle Bybel gebruik. As julle nie een het nie, kan ek vir julle een in die hande kry.”
3 Nog ’n benadering kan wees: “Ek besoek mense vandag om persoonlike Bybelstudie aan te moedig wat hulle sal help om te verstaan wat met hierdie wêreld gaan gebeur en wat God vir ons in die toekoms gaan doen. Ek sal graag vir jou wil wys hoe jy jou Bybel ten beste kan benut. Jy staan onder geen verpligting nie en dit is heeltemal gratis.” As die huisbewoner inskiklik is, kan jy die traktaat Die lewe in ’n vreedsame nuwe wêreld of die Skepping-boek gebruik en miskien op bladsy 234, paragraaf 6, begin. Die eerste bladsye van hierdie hoofstuk beklemtoon Jehovah se belofte om die Paradys te herstel.
4 Gebruik Bybeltraktate: Baie het ge- vind dat traktate nuttig is wanneer ’n mens die direkte benadering gebruik. Wanneer die huisbewoner die deur oopmaak, kan jy vir hom die traktaat Die lewe in ’n vreedsame nuwe wêreld oopgevou gee sodat hy die hele illustrasie kan sien. Hou nog ’n traktaat in jou hand en lees of gee die vrae in die eerste twee paragrawe in jou eie woorde weer. Bespreek die antwoorde en lees ’n teks of twee wat die gedagtes steun. Meld dan dat jy die bespreking geniet het en tref reëlings om terug te gaan. Verduidelik kortliks hoe ons gratis tuisbybelstudieprogram werk, as dit gepas is, of reël eenvoudig om terug te gaan en nog ’n gedagte in die traktaat te bespreek.
5 Wanneer jy reël om terug te gaan, is dit goed om iets te noem waarin die huisbewoner sal belangstel. Dit kan in die vorm van ’n vraag wees. Dit sal die huisbewoner na jou volgende besoek laat uitsien wanneer die vraag beantwoord sal word.
6 Die Skepping-boek is in baie opsigte uitstekend. Dit voorsien tasbare bewys dat God bestaan. Dit toon waarom evolusie nie waar kan wees nie. Dit toon waarom ons ons vertroue op die Bybel as God se Woord kan stel. Die illustrasies in hoofstuk 18 en 19 sal die aandag van opregtes van hart boei en belangstelling in die Bybel en Jehovah se voornemens wek. Laat ons dus almal gebruik maak van elke geleentheid om Bybelstudies te begin en om die opdrag om ‘dissipels te maak’ na te kom.—Matt. 24:14; 28:19; Mark. 13:10.