Gaan jy aan die informele getuieniswerk deelneem?
1 Ons gewone lewensroetine sluit bepaalde tye in wanneer ons met mense oor Jehovah praat. Ons ruim tyd in om formeel van huis tot huis te getuig, herbesoeke te doen en Bybelstudies te hou. Maar daar is baie ander geleenthede wat minder formeel is waar ons met mense oor die waarheid kan praat. Ons noem hierdie predikingswerk informele getuieniswerk.
2 Sommige verkondigers vind baie geleenthede om aan hierdie vorm van die bediening deel te neem. Dink aan maniere waarop ons ’n getuienis kan gee aan besoekers, familielede, kollegas, skoolmaats, mense wat ons ontmoet terwyl ons inkopies doen en diegene wat ons tussen huise ontmoet terwyl ons velddiens doen. Gaan jy van hierdie geleenthede gebruik maak om ’n informele getuienis te gee?
3 Beplan vooruit: Voorbereiding en goeie beplanning sal ons help om op ’n doeltreffende wyse informeel te getuig. In hierdie opsig is ons goed toegerus met ’n verskeidenheid publikasies wat ons help om dit te doen. Benewens Die Wagtoring en die Ontwaak! het ons etlike traktate met gedagteprikkelende titels om belangstelling aan te wakker. Daar is brosjures wat mense van verskillende agtergronde en godsdienste sal interesseer. Ons het ook sakformaatboeke wat onderwerpe bespreek wat van aktuele belang is. Watter publikasies gebruik julle graag? Dink as ’n gesin hieroor na. Oefen dan wat julle gaan sê wanneer die geskikte geleentheid hom voordoen.
4 Terwyl jy met vakansie is: ’n Uitstekende tyd om informeel te getuig, is terwyl jy met vakansie is. Beplan jy ’n rit per vliegtuig, trein of bus? Neem dan ’n Bybel en een van die publikasies wat hierbo genoem word saam met jou. As ’n mens hierdie publikasies lees terwyl jy van openbare vervoer gebruik maak, kan dit dikwels tot ’n gesprek aanleiding gee. As jy per motor reis, kan jy dink aan wat jy gaan sê wanneer jy by ’n vulstasie stilhou of ’n restaurant besoek of terwyl jy in ’n hotel bly. Jy kan vir sulke geleenthede ’n paar traktate byderhand hou om aan belangstellendes te gee. As jy op ’n pragtige strand of in ’n park is, kan jy moontlik vir iemand begin getuig deur te vra: “Sou dit nie wonderlik wees as die hele aarde só kon gelyk het nie?”
5 Aan familielede: Ons ongelowige familielede weet gewoonlik dat ons Getuies van Jehovah is. Hulle is dalk nuuskierig oor wat ons glo en doen, maar huiwer om ons te vra omdat hulle nie wil hê dat ons vir hulle moet ‘preek’ nie of omdat hulle nie by ’n lang bespreking betrokke wil raak nie. Waarom noem jy nie ’n interessante punt oor die waarheid nie, en gee die familielid dan ’n geleentheid om die bespreking voort te sit as hy wil? Of jy kan eenvoudig noem waar jy die laaste byeenkoms bygewoon het en hulle een van die publikasies wys wat daar vrygestel is. Kinders vind dikwels ’n horende oor by familielede.
6 Ons wil te alle tye bewus bly van geleenthede om ’n informele getuienis te gee. Maar onthou die belangrikheid daarvan om vriendelik te wees en opregte belangstelling in die ander persoon te toon (Spr. 15:23; 1 Pet. 3:15). Hierdie predikingsmetode dra goeie vrug, en Jehovah se knegte behoort daaraan deel te neem. Laat ons liefde vir ons medemens ons beweeg om, net soos Jesus, by elke geleentheid oor die waarheid te praat!—Matt. 5:14-16.