“Laat ons na die huis van Jehovah gaan!’
1 Dawid het ywerig gereageer op die uitnodiging: ‘Laat ons na die huis van Jehovah gaan!’ (Ps. 122:1). Jehovah se “huis”, wat deur die tempel voorgestel is, was die vergaderplek vir diegene wat ’n begeerte gehad het om die ware God te aanbid. Dit was ’n heiligdom van veiligheid en vrede. Vandag is die wêreldwye Christengemeente God se “huis”, “’n pilaar en grondslag van die waarheid” (1 Tim. 3:15). Al die voorsienings vir redding word deur hierdie kanaal beskikbaar gestel. Daarom moet ‘al die nasies daarheen toestroom’ as hulle graag die seëninge wil geniet wat onder God se Koninkryksheerskappy beloof word.—Jes. 2:2.
2 Hierdie “huis” bestaan uit meer as 69 000 gemeentes in 229 lande. Die deure van Koninkryksale oor die hele wêreld is oop, en meer as viermiljoen ywerige werkers rig die uitnodiging: “Kom! . . . Laat hom wat wil, die water van die lewe neem, verniet” (Openb. 22:17). Baie het hierdie boodskap gehoor en met waardering daarop gereageer. Ander het daarmee in aanraking gekom, maar het nog nie na Jehovah se huis gegaan deur met die Christengemeente te assosieer nie. Sulke mense het ’n “geestelike behoefte” wat bevredig kan word deur voorsienings wat net in die gemeente aangetref word (Matt. 5:3, NW). Ons lewe in swaar tye, en die einde van hierdie stelsel kom vinnig nader. ’n Onverskillige of huiwerige gesindheid kan veroorsaak dat hulle gevaarlik baie tyd verspil. Dit is dringend dat mense daarna streef om ‘tot God te nader’ deur nader aan sy organisasie te kom (Jak. 4:8). Hoe kan ons hulle help?
3 Rig belangstellendes na die organisasie: Ons moet van ons eerste besoek af by belangstellendes hulle aandag op die organisasie vestig. Hoewel ons self moontlik tekste kan vind en grondleerstellings kan verduidelik, is ons nie die bron van sulke kennis nie. Alles wat ons geleer het, het van die organisasie af gekom, deur die dienskneg-klas wat “voedsel op tyd” gee (Matt. 24:45-47). Nuwelinge moet van die begin af besef dat nie net ons of selfs die plaaslike gemeente by ware aanbidding betrokke is nie; daar is ’n georganiseerde, teokratiese, wêreldwye genootskap wat onder Jehovah se leiding werk.
4 Die leiding wat ons ontvang, kom van Jehovah af wat beloof het om ons te lei en te onderrig (Ps. 32:8; Jes. 54:13). Hierdie onderrig word hoofsaaklik deur ons lektuur oorgedra. As ons belangstellendes kan help om ’n hoë agting vir die lektuur te ontwikkel, en hulle besef dat dit ’n bron van lewensreddende onderrig is, sal hulle dit veel eerder lees en die boodskap daarvan toepas as om vinnig daarvan ontslae te raak. Ons moet hierdie lektuur altyd só aanbied en gebruik dat respek daarvoor opgebou word. Dit leer nuwelinge om die organisasie te waardeer en op sy voorsienings staat te maak.
5 Laat belangstellendes weet dat daar ’n sentrale vergaderplek in die gemeenskap is waar onderrig gereeld voorsien word. Gee hulle die Koninkryksaal se adres en die vergadertye. Verduidelik die verskil tussen ons vergaderinge en die godsdiensvergaderinge wat hulle moontlik in die verlede bygewoon het. Almal is welkom; daar is geen kollektes of persoonlike versoeke om geld nie. Hoewel aangestelde bedienaars die programme behartig, het almal die geleentheid om deel te neem deur kommentaar te lewer en ’n deelname aan programdele te hê. Gesinne is welkom; kinders word in ons Bybelbesprekings ingesluit. Ons bedienaars dra nie spesiale gewade of klere nie. Die Koninkryksaal is smaakvol versier en het geen kerse of beelde nie. Diegene wat die vergaderinge bywoon, is hoofsaaklik inwoners van die plaaslike buurt.
6 Rig belangstellendes tydens Bybelstudies progressief na die organisasie: Die hoofdoel van ’n Bybelstudie is om die waarheid van God se Woord te leer. Dit moet ook by die student ’n waardering vir Jehovah se organisasie opbou en hom bewus maak van die noodsaaklikheid om ’n deel daarvan te word. Die groot werk wat deur Jesus en sy dissipels in die eerste eeu gedoen is, het opregtes aangetrek en hulle verenig om onder ’n sentrale bestuursliggaam te werk. In gemeenskappe waar daar ’n goeie reaksie was, is gemeentes gevorm om gereelde opleiding en onderrig te gee. Diegene wat daar vergader het, is geestelik versterk, en dit het hulle gehelp om tye van beproewing te verduur (Hebr. 10:24, 25; 1 Pet. 5:8-10). In ons dag is dit Jehovah se voorneme ‘om alle dinge onder een hoof in Christus te verenig’ (Ef. 1:9, 10). As gevolg daarvan het ons ’n wêreldwye “broederskap”.—1 Pet. 2:17.
7 Die weeklikse Bybelstudie moet onderrig insluit wat studente sal help om die organisasie te waardeer en om voorsienings vir hulle redding te benut. Gebruik elke week ’n paar minute en vertel of beskryf iets wat toon hoe dit funksioneer. Jy kan nuttige gesprekspunte vind in Die Wagtoring van 1 November 1984. Die brosjure Jehovah se Getuies in die twintigste eeu en Jehovah se Getuies—Verenig in die uitvoering van God se wil wêreldwyd bespreek belangrike fasette van die organisasie en hoe dit ons tot voordeel kan strek. As jy reël dat Bybelstudente na die video Jehovah’s Witnesses—The Organization Behind the Name kyk, sal hulle self kan sien wat die organisasie verrig. Gekose verslae en ondervindinge uit die Yearbook kan die sukses toon van die werk in ander lande en kulture. Ander publikasies kan ook gebruik word. Verduidelik progressief oor ’n tydperk dinge soos waarom ons van huis tot huis gaan, die doel van ons vergaderinge, hoe ons ons werk finansier en die wêreldwye omvang van ons bedrywigheid.
8 As nuwelinge ander Getuies leer ken, kan dit ’n stimulerende uitwerking op hulle hê en hulle begrip van die gemeente vergroot. Om dit te kan doen, moet jy ander verkondigers nooi om nou en dan die studie by te woon. Iemand in die gemeente wat ’n soortgelyke agtergrond het of in soortgelyke dinge belangstel, kan jou student help om dinge in ’n nuwe lig te beskou. ’n Ouere man kan jou dalk vergesel net om kennis te maak. Dit kan ’n ware seën wees as jy reël dat die kringopsiener of sy vrou die studie besoek. As daar Getuies naby jou Bybelstudent bly en hulle die Bybelstudent leer ken, kan dit as verdere aanmoediging vir die student dien om gemeentelike vergaderinge by te woon.
9 Moedig nuwelinge aan om vergaderinge by te woon: Nuwelinge moet besef hoe belangrik dit is om die vergaderinge by te woon. Probeer hulle belangstelling wek. Wys vir hulle artikels wat in die Wagtoring-studie behandel gaan word. Noem die titels van komende openbare toesprake. Vertel hulle van die hoofpunte van die materiaal wat in die Teokratiese Bedieningskool en Gemeentelike Boekstudie behandel gaan word. Sê hoe jy voel oor wat jy by hierdie vergaderinge leer en waarom jy dit wil bywoon. Bied indien moontlik vervoer aan. ’n Telefoonoproep voor die vergadering kan bykomende aanmoediging verskaf om vergaderinge by te woon.
10 Wanneer ’n Bybelstudent ’n vergadering bywoon, moet ons hom welkom laat voel. Stel hom aan ander voor, onder andere die ouere manne. Stel hom aan die spreker voor as hy die openbare toespraak bywoon. Wys hom waar alles in die Koninkryksaal is. Verduidelik die doel van die lektuur- en tydskriftoonbanke, bydraebussies, biblioteek en jaarteks. Sê vir hom dat die saal nie net ’n huis van aanbidding is nie, maar dat dit ook ’n sentrum is waarvandaan die predikingswerk plaaslik georganiseer word.
11 Verduidelik hoe ons vergaderinge gehou word. Wys vir die student die publikasies wat ons gebruik. Sê vir hom dat die Bybel ons vernaamste handboek is. Almal kan deelneem, onder andere jong kinders. Verduidelik dat al die musiek en lirieke in ons liedereboek deur Jehovah se Getuies gekomponeer is om in ons aanbidding te gebruik. Vertel hom van die verskillende agtergronde van dié wat die vergaderinge bywoon. Lewer positiewe kommentare oor die vriendelikheid en gasvryheid wat daar heers. Hierdie vriendelike, opregte belangstelling kan een van die grootste faktore wees wat die student aanspoor om weer te kom.
12 Waarom party dalk huiwer: Ten spyte van al jou pogings huiwer party dikwels om nader aan die organisasie te kom. Moenie gou tou opgee nie. Probeer jou in hulle plek stel. Hulle het tot nou toe moontlik nie werklik gedink dat dit nodig is om kerkdienste by te woon nie, buiten op spesiale geleenthede. Familielede of hegte vriende oefen dalk druk op hulle uit. Hulle voel dalk geïntimideer deur bure wat neerhalende aanmerkings maak. En hulle kan natuurlik aan ander afleidings blootgestel word wat met sosiale bedrywighede en ontspanning gepaardgaan. Hulle beskou sulke dinge dalk as onoorkomelike hindernisse; jy moet hulle help om dinge in die regte perspektief te sien en “hulle van die belangriker dinge te vergewis”.—Filip. 1:10.
13 Gee skriftuurlike redes waarom hulle moet volhard. Lê nadruk daarop dat ons almal die aanmoediging en geestelike opbouing wat ons uit ons onderlinge assosiasie kry dringend nodig het (Rom. 1:11, 12). Jesus het dit duidelik gestel dat familieteëstand nie ’n grondige rede is om te huiwer nie (Matt. 10:34-39). Paulus het ons aangespoor om nie skaam te wees om ons in die openbaar as Jesus se dissipels te identifiseer nie (2 Tim. 1:8, 12-14). Persoonlike strewes en afleidings moet beheer word; anders kan dit ’n strik word (Luk. 21:34-36). Diegene wat Jehovah se seën verdien, moet heelhartig en nooit halfhartig wees nie (Kol. 3:23, 24). As jy by hulle waardering vir sulke Bybelbeginsels opbou, kan dit vir hulle die weg tot geestelike vordering baan.
14 Die deure is oop: Jehovah se huis van ware aanbidding is bo alle ander verhewe. Die uitnodiging word in 229 lande oor die wêreld heen gerig: “Kom laat ons optrek na die berg van die HERE, . . . dat Hy ons sy weë kan leer en ons in sy paaie kan wandel” (Jes. 2:3). ’n Positiewe reaksie van nuwelinge kan hulle lewe red. Een van die beste maniere waarop ons belangstellendes kan help, is deur hulle na Jehovah se organisasie te rig.