Bied die uitdaging van die huis-tot-huis-bediening die hoof
1 Die gedagte om van huis tot huis te gaan en vreemdelinge te besoek, bied ’n ware uitdaging vir baie wat ware aanbidding aanneem. Maar ware liefde vir Jehovah help ’n mens om hierdie uitdaging die hoof te bied, en selfs diegene wat van nature baie skaam is, het al gevorder tot by die punt waar hulle voltydse predikers van die goeie nuus geword het.
2 Die Bybel toon duidelik dat die vroeë Christene die goeie nuus van God se Koninkryk verkondig het deur van huis tot huis te gaan (Hand. 5:42; 20:20, 21, NW). As Christene in hierdie 20ste eeu het ons ook ’n aandeel in hierdie werk. Ons liefde vir God en vir ons naaste spoor ons aan om hierdie werk te doen selfs al kom ons onverskilligheid, ergernis, minagting en direkte teenkanting teë.
3 Wat ons bereik deur die uitdaging die hoof te bied: Elke keer wanneer ons iemand besoek, probeer ons ’n paar saadjies van waarheid saai, omdat ons weet dat die gesamentlike resultaat Koninkryksvrug kan voortbring (Pred. 11:6). ’n Persoon se omstandighede verander. Iets gebeur dalk wat ’n huisbewoner laat dink aan wat een van ons by die deur gesê het, en volgende keer is hy dalk ontvankliker vir ons boodskap.
4 Ons bediening van huis tot huis gee diegene wat na waarheid en regverdigheid neig die geleentheid om van Jehovah en sy voornemens te leer, wat hulle op die weg na die ewige lewe plaas. Diegene wat wêreldse genietinge najaag, word dus liefdevol gewaarsku dat hulle moet verander om Jehovah se goedkeuring weg te dra. Hierdie bediening maak ook Jehovah se naam bekend en strek hom tot eer, of die huisbewoner nou luister of nie.—Eseg. 3:11.
5 Om in die bediening te werk, help ons om die vrugte van die gees, soos onselfsugtige liefde, vreugde, vrede en lankmoedigheid aan te kweek (Gal. 5:22). Dit help ons om nederig en simpatiek te wees omdat dit beteken dat ons aan ander goed doen. Deur besig te bly in Jehovah se diens word ons teen die wêreld beskerm.—1 Kor. 15:58.
6 Hulp om die uitdaging die hoof te bied: Nuwelinge moet leer hoe om aan hierdie uiters opwindende werk deel te neem. Hulle het dikwels ’n gebrek aan vertroue en word derhalwe ontmoedig deur die blote gedagte om van huis tot huis te gaan. Ons kan algemene besware met hulle bespreek en wat ons in antwoord daarop kan sê. Ons kan oefen om van die puik wenke in die Redenering-boek te gebruik oor hoe om op gesprekdempers te reageer. Waarom bied jy nie aan om hulle te help om vir die velddiens voor te berei nie? Hulle kan ook baie hulp ontvang deur die velddiensvergaderinge gereeld by te woon en daarna saam met meer ervare verkondigers te werk. Om saam met ’n groep te werk, kan ’n mens baie versterk.
7 Wanneer ons van huis tot huis gaan, het ons die voorreg om ons God, Jehovah, te verteenwoordig. Watter groter eer kan enigeen hê as om God se medewerker te wees? (1 Kor. 3:9). As ons op hom vertrou, sal sy gees ons help om die uitdaging van die huis-tot-huis-bediening die hoof te bied.—2 Kor. 3:5.