Het ons dit nie al vantevore gehoor nie?
1 Natuurlik het ons! Jehovah herhaal baie dinge in sy Woord ter wille van sy volk. Jesus het dikwels sy leringe oor verskeie aspekte van die Koninkryk herhaal. Sy apostels het voortdurend geestelike dinge hersien met diegene wat stewig in die waarheid gegrond was.—Rom. 15:15; 2 Pet. 1:12, 13; 3:1, 2.
2 In ons tyd het Jehovah se organisasie gereël dat belangrike onderwerpe weer en weer by gemeentelike vergaderinge hersien word. Sekere publikasies is al herhaaldelik bestudeer. Ja, dit is belangrik om dinge wat ons al vantevore gehoor het weer te hoor!
3 Herhaling voorsien in ’n belangrike behoefte: Jehovah se herinneringe verbeter ons begrip, verruim ons beskouing en versterk ons vasbeslotenheid om geestelik op koers te bly (Ps. 119:129, NW). Die hersiening van God se standaarde en beginsels is soos om in ’n spieël te kyk. Dit help ons om onsself deeglik te ondersoek en die neiging te weerstaan om “’n vergeetagtige hoorder” te wees.—Jak. 1:22-25.
4 As ons ons nie voortdurend aan die waarheid herinner nie, sal ander dinge ons hart beïnvloed. God se herinneringe versterk ons om die verderflike invloede van Satan se wêreld te weerstaan (Ps. 119:2, 3, 99, 133, vgl. NW; Fil. 3:1). Die gereelde herinneringe wat ons aangaande die vervulling van God se voornemens ontvang, spoor ons aan om ‘aan te hou waak’ (Mark. 13:32-37). Die herhaling van skriftuurlike waarhede help ons om op die weg na die ewige lewe te bly.—Ps. 119:144, NW.
5 Hoe om persoonlik baat te vind: Ons moet ‘ons hart neig tot God se herinneringe’ (Ps. 119:36, NW). Wanneer ’n bekende onderwerp by ’n gemeentelike vergadering bespreek gaan word, moet ons voorberei, die teksverwysings naslaan en nadink oor hoe ons die inligting kan toepas. Ons moenie die skriftelike hersiening van die Teokratiese Bedieningskool oorslaan omdat ons dink dat dit onnodig is nie (Luk. 8:18). Ons moet nooit belangstelling verloor omdat basiese waarhede dikwels by ons vergaderinge herhaal word nie.—Heb. 5:11.
6 Laat ons dieselfde gesindheid openbaar as die psalmis wat gesê het: “In die weg van u herinneringe het ek my verheug, net soos oor alle ander waardevolle dinge” (Ps. 119:14, NW). Ja, ons het hierdie waardevolle dinge al vantevore gehoor en ons sal dit waarskynlik weer hoor. Waarom? Want Jehovah weet dit is belangrik dat ons dit moet hoor!