Verrig dag en nag heilige diens
1 Ons geniet ’n buitengewone voorreg. Dit is om getuies van Jehovah te wees. Ons maak deel uit van die wêreldwye organisasie van evangeliedienaars wat deur Jehovah gebruik word om die grootste Koninkryksverkondigingswerk te doen wat nog onderneem is! (Mark. 13:10). Neem ons, met die oog op die dringendheid van ons tye, na die beste van ons vermoë aan hierdie werk deel?
2 Ons weet nie hoeveel mense uiteindelik op ons predikingswerk sal reageer nie. Jehovah verseker ons dat dit “’n groot skare” sal wees, wat almal geken word aan die feit dat hulle ‘dag en nag heilige diens aan hom verrig’ (Op. 7:9, 15). Die meer as vyfmiljoen Getuies wat reeds in God se diens bedrywig is, is nie bloot belangstellende luisteraars nie en hulle is ook nie net vergaderingbywoners nie. Hulle is werkers wat die goeie nuus wêreldwyd verkondig!
3 Daar is elke dag geleenthede om Jehovah te loof, in die velddiens of informeel. Dink aan die groot getuienis wat gegee kan word as elkeen van ons die inisiatief neem om die waarheid elke dag aan net een persoon mee te deel. Ons waardering vir Jehovah moet ons beweeg om met entoesiasme oor hom te praat.—Ps. 92:2, 3.
4 Help ander om heilige diens te verrig: Jehovah seën ons voortdurend met uitbreiding (Hag. 2:7). Gedurende die afgelope diensjaar is gemiddeld 65 170 tuisbybelstudies elke maand gehou in die lande onder toesig van die Suid-Afrikaanse takkantoor. Ons studeer met hierdie mense met die doel om hulle te help om Jesus se dissipels te word (Matt. 28:19, 20). Baie van hulle het reeds goeie vordering gemaak deur gereeld die vergaderinge by te woon. Hulle het met hulle kennisse begin praat “oor die luisterryke dinge van God” wat hulle geleer het (Hand. 2:11). Kan hulle nou genooi word om aan die openbare bediening deel te neem?
5 Gedurende April moet ons ’n spesiale poging aanwend om nuwelinge wat aan die vereistes voldoen te nooi om saam met ons velddiens te doen. Het jou student al die begeerte uitgespreek om dit te doen? Indien wel, voldoen hy aan die skriftuurlike vereistes? (Sien Ons bediening-boek, bladsye 97-9.) Wanneer die student graag aan die velddiens wil deelneem, moet jy sy vooruitsigte met die presiderende opsiener bespreek, wat sal reël dat twee ouer manne die saak ondersoek. As die student aan die vereistes vir ’n ongedoopte verkondiger voldoen, kan jy hom nooi om saam met jou in die bediening uit te gaan. Diensopsieners en boekstudiehouers moet veral daarvan bewus wees om diegene te help wat dalk aan die vereistes voldoen om in April verkondigers te word.
6 Ouers kan daaroor nadink of hulle kinders aan die vereistes voldoen om ongedoopte verkondigers te word (Ps. 148:12, 13). As jou kind graag aan die Koninkryksdiens wil deelneem en hy goeie gedrag handhaaf, kan jy een van die ouer manne op die dienskomitee nader om die situasie te bespreek. Nadat twee ouer manne die saak met jou en die kind bespreek het, kan hulle besluit of hy aan die vereistes voldoen om as ’n verkondiger gereken te word. Daar is spesiale rede tot vreugde wanneer kinders God saam met ons loof!
7 Jehovah alleen is ons heilige diens waardig (Luk. 4:8). Mag elkeen van ons ons wonderlike voorreg gebruik om hom “grootliks” te loof.—Ps. 109:30, vgl. NW; 113:3.