Ons moet ons gelofte dag ná dag vervul
1 Die psalmis Dawid is beweeg om vir Jehovah te sê: ‘Ek wil psalmsing tot eer van u Naam tot in ewigheid, om my geloftes te betaal, dag ná dag’ (Ps. 61:9). Dawid het geweet dat die aflê van ’n gelofte geheel en al vrywillig is. Maar hy het ook besef dat hy, indien hy ’n gelofte afgelê het, verplig was om dit te vervul. Hy het Jehovah nietemin geloof vir die geleentheid om sy geloftes dag ná dag te vervul.
2 Toe ons ons aan Jehovah toegewy het, het ons gewillig die gelofte afgelê om sy wil te doen. Ons het onsself verloën en het dit ons hoofstrewe in die lewe gemaak om Jehovah te dien (Luk. 9:23). Derhalwe moet ons ook ons gelofte dag ná dag betaal (Pred. 5:3-5). Ons openbare bekendmaking ten tye van ons waterdoop moet weerspieël word in ons hele lewenswyse, aangesien ons weet dat ‘’n mens met die mond openbare bekendmaking tot redding doen’ (Rom. 10:10). Dit sluit die verkondiging van die goeie nuus in (Heb. 13:15). Persoonlike omstandighede verskil grootliks, maar ons almal kan dag ná dag ons gedagtes gerig hou op die belangrikheid daarvan om die goeie nuus aan ander oor te dra.
3 Skep geleenthede om daagliks te getuig: Dit is ’n vreugdevolle ondervinding om die goeie nuus aan iemand anders oor te dra. Om dit daagliks te kan doen, moet ons geleenthede skep om te getuig wanneer ons omstandighede dit ook al toelaat. Diegene wat die inisiatief geneem het om informeel te getuig vir mense by die werk of in die skool en vir bure of ander wat hulle daagliks teëkom, het talle aangename ondervindinge gehad. Selfs om briewe te skryf of die telefoon te gebruik, kan ’n manier wees om vir ander te getuig. As ons van al hierdie maniere gebruik maak, sowel as gereeld tyd opsy sit om van deur tot deur te getuig en herbesoeke te doen, kan dit lei tot die spesiale vreugde wat ’n mens geniet wanneer jy ’n tuisbybelstudie hou. Ja, ons kan elke dag geleenthede skep om te getuig.
4 ’n Suster het Ondersoek die Skrif elke dag gedurende haar werkpouse begin lees. Sy het ’n werksmaat genooi om die dagteks saam met haar te lees, en dit het weldra tot ’n Bybelstudie met die vrou gelei. Hulle het elke dag, vyf dae per week, ’n halfuur gestudeer. ’n Ander werksmaat het gesien hoe hulle daagliks studeer. Hy het hom uiteindelik as ’n onbedrywige broer geïdentifiseer. Hy is deur die suster se ywer geraak en het met ’n ouer man in aanraking gekom om weer bedrywig te word. Hierdie suster het twee ander lewens op ’n positiewe manier geraak omdat sy die vervulling van haar gelofte dag ná dag deurgevoer het.
5 Wanneer ons beweeg word deur ’n hart wat oorloop van waardering vir al die goeie dinge wat Jehovah vir ons gedoen het, sal dit ons vreugde en bevrediging verskaf as ons ons toewydingsgelofte elke dag na ons beste vermoë vervul. Ons kan soos die psalmis sê: “Here, my God, ek wil U loof met my hele hart en u Naam vir ewig eer.”—Ps. 86:12.