Het jy al aandgetuieniswerk probeer?
1 Ons almal skep behae daarin om produktief in ons werk te wees. Aan die ander kant kan ons werk vermoeiend en onbevredigend word wanneer ons nie positiewe resultate kan sien nie. Betekenisvolle arbeid gee persoonlike bevrediging, en dit is ’n seën. (Vergelyk Prediker 3:10-13.) Ons kan hierdie beginsel op ons predikingswerk toepas. Ons weet uit ondervinding dat ons, wanneer ons van deur tot deur gaan en met mense oor die Bybel kan praat, geestelik verkwik terugkeer huis toe. Ons voel dat ons werklik iets bereik het.
2 In party gebiede het dit baie moeilik geword om mense gedurende sekere ure van die dag tuis te vind. Verslae toon dat meer as 50 persent van die mense in baie plekke nie tuis is wanneer ons hulle vroeg in die dag besoek nie. Baie gemeentes het hierdie probleem die hoof gebied deur reëlings te tref vir aandgetuieniswerk, en hulle het goeie resultate behaal. Verkondigers sê dat meer mense tuis is wanneer hulle later in die dag besoek word en dat mense oor die algemeen meer ontspanne en meer geneig is om na die Koninkryksboodskap te luister. Het jy al in jou gebied aandgetuieniswerk probeer?—Vergelyk Markus 1:32-34.
3 Ouer manne moet aandgetuieniswerk organiseer: In party gebiede is velddiensvergaderinge in die laatmiddag of vroeg in die aand goed ondersteun. Jong verkondigers wat in die middag van die skool af kom en volwassenes wat later in die dag met hulle sekulêre werk klaar is, kan in ag geneem word. Party verkondigers wat nie oor die naweke kan velddiens doen nie, vind dat aandgetuieniswerk gedurende die week ’n praktiese manier is waarop hulle gereeld aan die predikingswerk kan deelneem.
4 Daar is verskeie bedrywighede waaraan jy kan deelneem gedurende aandgetuieniswerk. Jy kan van huis tot huis getuig met behulp van tydskrifte of die lektuuraanbod vir die maand gebruik. Die aand is ’n goeie tyd om mense te besoek wat vroeër in die dag of oor naweke nie tuis was toe verkondigers hulle besoek het nie. Daar is dalk ook goeie gebied vir straatwerk, wat jou in staat sal stel om met mense in aanraking te kom wat van die werk af op pad huis toe is. Baie vind dat die aand die beste tyd is om herbesoeke te doen by diegene wat belangstelling getoon het.
5 Wees versigtig en verstandig: Dit kan in sekere gebiede gevaarlik wees om uit te gaan wanneer dit skemer word of nadat dit donker is. Dit sal verstandig wees om in pare of groepe op goed verligte strate te reis en om net die huise of woonstelgeboue te besoek waar julle ’n mate van sekerheid het dat julle veilig sal wees. Wanneer jy aan die deur klop, moet jy staan waar jy gesien kan word en jou duidelik identifiseer. Lê goeie oordeel aan die dag. Wanneer jy sien dat jy op ’n ongeleë tyd besoek aflê, soos wanneer die gesin eet, moet jy aanbied om op ’n ander tyd te kom. Dit is gewoonlik beter om jou getuieniswerk eerder tot die vroeë aandure te beperk as om laat besoek af te lê, wanneer die huisbewoners dalk gereedmaak om te gaan slaap.
6 Lang someraande is veral gepas vir aandgetuieniswerk. Terwyl ons ‘dag en nag heilige diens aan God verrig’, sal Jehovah beslis ons pogings seën.—Op. 7:15.