Waarom bly ons teruggaan?
1 Het jy jou al ooit daardie vraag afgevra, dalk terwyl jy vir ’n dag in die diens voorberei het? In sommige gebiede waar ons herhaaldelik werk, kan baie huisbewoners ons herken en ons sonder versuim wegwys. Slegs ’n paar reageer moontlik gunstig. Tog is daar kragtige redes waarom ons bly teruggaan.
2 In die eerste plek word ons beveel om aan te hou om die Koninkryksboodskap te verkondig totdat die einde kom (Matt. 24:14; 28:19, 20). Die profeet Jesaja het gewonder hoe lank hy met sy predikingswerk sou moes voortgaan. Die antwoord wat hy ontvang het, is in Jesaja 6:11 opgeteken. Daar bestaan geen twyfel nie—hy is beveel om met God se boodskap na die mense te bly teruggaan. Jehovah verwag eweneens vandag van ons om die mense wat in ons gebied woon te bly besoek, al wys hulle ons moontlik weg (Eseg. 3:10, 11). Dit is ’n heilige verantwoordelikheid wat aan ons toevertrou is.—1 Kor 9:17.
3 Nog ’n rede waarom ons moet bly teruggaan, is omdat dit ons ’n geleentheid bied om te toon hoe diep ons toegewydheid aan Jehovah is (1 Joh. 5:3). Hoe kan ons boonop nalaat om ons naaste liefdevol te probeer waarsku wanneer ons nadink oor wat die nabye toekoms vir die mensdom inhou? (2 Tim. 4:2; Jak. 2:8). As ons ons toewysing getrou uitvoer, bied dit hulle herhaalde geleenthede om op God se boodskap van redding te reageer sodat hulle nie sal kan sê dat hulle nie gewaarsku is nie.—Eseg. 5:13.
4 Daarbenewens weet ons nie wanneer party mense se gesindheid sal verander nie. Dit kan teweeggebring word deur ’n verandering in hulle persoonlike omstandighede, ’n tragedie in hulle gesin of wêreldtoestande wat hulle ernstig laat nadink oor hulle toekoms. Aan die ander kant kan iets wat ons by hulle deur sê ’n gunstige reaksie uitlok (Pred. 9:11; 1 Kor. 7:31). Mense verhuis ook. Ons vind moontlik nuwe inwoners in ons gebied wat na die goeie nuus sal luister—dalk jong volwassenes wat nou op hulle eie woon en ernstig oor hutle doel in die lewe nadink.
5 Sal ons bly teruggaan? Ja! Die Skrif gee ons voldoende motivering om keer op keer na die mense terug te gaan. Aan die einde, wanneer die predikingswerk voltooi is, sal Jehovah ons seën vir ons volgehoue pogings in die bediening, en hy sal diegene seën wat met waardering op die goeie nuus van die Koninkryk gereageer het.—1 Tim. 4:16.