Opsieners wat die leiding neem—die presiderende opsiener
1 Dit is ’n ernstige verantwoordelikheid om as ’n opsiener in die gemeente te dien (Hand. 20:28; 1 Tim. 3:1). Hierdie artikel is die eerste van ’n reeks wat die verskillende pligte van Christen- ouer manne uiteen sal sit sodat ons almal die belangrike werk kan waardeer wat hulle ten behoewe van ons doen.
2 Die Genootskap stel die presiderende opsiener aan om vir ’n onbepaalde tydperk te dien. Terwyl die presiderende opsiener sake koördineer, help dit die ouer manne om behoorlik aandag te skenk aan hulle toegewese pligte (Ons bediening-boek, bl. 41-2). Wat behels dit?
3 Die presiderende opsiener ontvang gemeentelike pos en gee dit dan dadelik vir die sekretaris om te behartig. Ter voorbereiding vir ouermanvergaderinge verkry die presiderende opsiener voorstelle by die ouer manne oor sake wat bespreek moet word en stel hy die agenda op. Hy dien ook as voorsitter by ouermanvergaderinge. Wanneer besluite geneem word, sorg hy dat dit behoorlik deurgevoer word. Hy hou toesig oor die voorbereiding van die Diensvergadering en die rooster vir openbare toesprake. Hy keur alle aankondigings goed wat aan die gemeente gedoen word, magtig die betaling van alle normale bedryfskostes en sien toe dat die kwartaallikse ouditering van die gemeentelike rekeninge gedoen word.
4 As voorsitter koördineer die presiderende opsiener die werk van die Gemeentelike Dienskomitee. Wanneer ’n Bybelstudent vra om as ’n ongedoopte verkondiger erken te word of wanneer ’n ongedoopte verkondiger gedoop wil word, reël die presiderende opsiener dat ouer manne saam met die student vergader. Die presiderende opsiener neem ook die leiding in die voorbereiding vir die kringopsiener se besoek sodat die gemeente ten volle by die spesiale week van bedrywigheid baat kan vind.
5 Die presiderende opsiener het verskeie verantwoordelikhede. Terwyl hy “in alle erns” nederig na sy verantwoordelikhede omsien, kan ons almal ons deel bydra deur met die ouer manne saam te werk (Rom. 12:8). As ons “gehoorsaam” en “onderdanig” is aan dié wat die leiding onder ons neem, kan hulle hulle werk met groter vreugde doen.—Heb. 13:17.