Verkondig die goeie nuus met gretigheid
1 “Ek verlang om julle te sien . . . Vandaar die gretigheid van my kant om ook aan julle . . . die goeie nuus bekend te maak.” Dit is hoe die apostel Paulus sy gevoelens aan die begin van sy brief aan die broers in Rome uitgedruk het. Waarom was Paulus gretig om hulle te besoek? Hy het gesê: “Sodat ek ook onder julle . . . vrugte kan insamel . . . Want ek skaam my nie oor die goeie nuus nie; dit is trouens God se krag tot redding.”—Rom. 1:11-16.
2 Paulus het hierdie selfde gretigheid weerspieël toe hy met die ouer manne van Efese gepraat het. Hy het hulle herinner: “Van die eerste dag dat ek die landstreek Asië betree het, . . . [het] ek my nie daarvan weerhou . . . om julle in die openbaar en van huis tot huis te leer nie. Maar ek het aan Jode sowel as Grieke deeglik . . . getuig” (Hand. 20:18-21). Paulus was vasbeslote om die goeie nuus van redding in sy hele toegewese gebied te verkondig en Koninkryksvrug te oes. Wat ’n uitstekende gees om na te volg!
3 Ons kan ons afvra: ‘Toon ek dieselfde gretigheid om die goeie nuus in my omgewing te verkondig? Is die predikingswerk vir my bloot ’n plig of is ek eerder gretig om soveel mense moontlik van die goeie nuus te vertel? Het ek my persoonlike omstandighede biddend oorweeg? Het ek alles moontlik in ons gebied probeer, soos om van deur tot deur, op straat, in sakegebied, per telefoon en informeel te getuig?’
4 Dien gretig gedurende April: April is ’n goeie tyd om ons persoonlike deelname aan die predikingswerk te vergroot. Die verminderde uurvereiste sal dit vir meer moontlik maak om hulppionierdiens te doen. Dalk sal jou omstandighede jou toelaat om gedurende April en Mei as ’n hulppionier te dien. Of dalk kan jy weens die aangepaste uurvereiste as ’n gewone pionier inskryf. Kan jy, as jy ’n gemeentelike verkondiger is, hierdie maand en volgende maand meer tyd as gewoonlik aan die diens wy en diegene ondersteun wat pionierdiens kan doen? Dit sal Jehovah se hart verbly!
5 Koninkryksverkondigers moet voortgaan om, soos Paulus, gretigheid te openbaar deur meer in die predikingswerk te doen. As ons ons bes in die bediening doen, sal dit ons ware vreugde verskaf. Paulus het hierdie vreugde in sy heilige diens gehad. Dit sal goed wees as ons sy uitstekende voorbeeld navolg.—Rom. 11:13; 1 Kor. 4:16.